Ee, Muma nyisowa gik ma nyiso gadier ni Nyasaye nitie. Ojiwowa ni wager yiewa kuom Nyasaye ka watiyo gi ‘nyalowa mar paro’ kendo ka ‘wanono weche e yo matut,’ kar yie ayiea gi weche ma dinde wacho. (Jo-Rumi 12:1; 1 Johana 5:20) Ne ane paro moko ma yudore e Muma:

• Gik mangima manie piny gi polo nyiso ni nitie Jachuech. Muma wacho niya: “En adier ni ot ka ot nigi ng’at mogere, to jal ma ne ogero gik moko duto en Nyasaye.” (Jo-Hibrania 3:4) Kata obedo ni wechego nyalo nenore ka gima giyot kamano, josomo mang’eny neno ni wechego oting’o adiera mapek ahinya. *

• Kaka dhano, wagomboga ng’eyo gimomiyo wangima. To mano en gombo ma wan-go kata ka wan gi gige ringruok moromo. Ma e gima Muma luongo ni “riyo mar ng’eyo Nyasaye.” Oriwo bedo gi gombo mar ng’eyo kendo lamo Nyasaye. (Mathayo 5:3; Fweny 4:11) Bedo ni wan gi riyo mar ng’eyo Nyasaye nyiso ni Nyasaye nitie kendo ni en Jachuech ma jahera ma dwaro ni wachop gombo ma wan-go mar ng’eye.​—Mathayo 4:4.

• Weche ma ne okor e Muma chon notimore mana kaka nokorgi. Bedo ni ne gitimore mana kaka nokorgi nyiso ni ne giwuok kuom ng’at moro ma nigi teko moloyo dhano.​—2 Petro 1:21.

• Jondik Muma nong’eyo weche sayans moloyo joma ne odak e kindegi. Kuom ranyisi, chon ji mang’eny ne paro ni piny osir gi le kaka liech, anguch bungu, kata dhiang’. Kata kamano, Muma to wacho ni “piny liero ma onge gima osire.” (Ayub 26:7) Bende, Muma lero e yo makare ni piny ‘olworore’ kata ‘ong’inore.’ (Isaya 40:22, weche moler piny) Ji mang’eny paro ni jondik Muma nong’eyo gigo nikech ne giwuok kuom Nyasaye.

• Muma chiwo dwoko mag penjo mang’eny matek. Ka ng’ato ok oyudo dwoko makare mag penjogo, mano nyalo miyo owach ni Nyasaye onge. Penjogo gin kaka: Ka Nyasaye en jahera kendo en gi teko, ang’o momiyo richo kod chandruok opong’o piny? Ang’o momiyo kinde mang’eny din kelo mana gik maricho to ok gik mabeyo?​—Tito 1:16.