¿Axpe tok at Dios?

TUʼN TOK QBʼIʼN TOJ

¿Axpe tok at Dios?

Aju in tzaj ttzaqʼweʼn Tyol Dios

Ateʼ nim techel toj Xjan Uʼj tuʼn tel qnikʼ tiʼj qa ax tok at Dios. Ax ikx in tzaj tqʼamaʼn qa il tiʼj tuʼn tajbʼen «qnabʼl» tuʼntzun tok qeʼxix qkʼuʼj tiʼj Dios, twitzju tuʼn t-xi qnimen aju nimen kyuʼn kykyaqil xjal (1 Juan 5:20; Romanos 12:1). Qo xnaqʼtzan tiʼj junjun techel toj Xjan Uʼj aʼyeju in tzaj kyyekʼin qa ax tok at Dios.

Tuʼnju nukʼuʼn tten tkyaqilju at twitz kyaʼj ex twitz Txʼotxʼ ex jaku qo anqʼin twitz, in nel qnikʼ tiʼj qa at jun bʼinchalte tkyaqil. In tzaj tqʼamaʼn Tyol Dios jlu: «Tkyaqil ja at jun o bʼinchante; ex atzunju o bʼinchante tkyaqil, ate Dios» (Hebreos 3:4). Ateʼ xjal in kubʼ kyximen qa nya nim toklen jlu, pero ateʼ xjal at kyojtzqibʼil in nok qeʼ kykʼuʼj tiʼj. a
Qkyaqilx qaj tuʼn tel qnikʼ tiʼj tiquʼn atoʼ tzalu twitz Txʼotxʼ, porke qa mintiʼ ma tzʼel qnikʼ tiʼj mlayx ten ttxolil qanqʼibʼil. Nya oʼkx at toklen jlu tukʼilju at tajbʼen qe sino ax ikx at toklen tukʼilju tuʼn tel qnikʼ tiʼj «qa at tajbʼen Dios» qe, toj juntl yol, tuʼn tok qojtzqiʼn Dios ex tuʼn qkʼulin oʼkx te (Mateo 5:3; Apocalipsis 4:11). Tuʼn jlu in nel qnikʼ tiʼj qa ax tok at Dios, aju kubʼ bʼinchante qe tuʼn qximen tiʼj ex tuʼn qtzalaj (Mateo 4:4).
Japun kywi nim profecía kyaj qʼamaʼn toj Tyol Dios tej otoqxi tzikʼ nim abʼqʼi tkubʼlen tzʼibʼin. Tuʼnju japun kywi yol, in nel qnikʼ tiʼj qa nya kyximbʼetz xjal tkuʼx toj (2 Pedro 1:21).
Kyqʼama aj tzʼibʼil tiʼj Tyol Dios junjun tiʼchaq mintiʼ el kynikʼ xjal tiʼj toj ambʼil aju. Jun techel, ateʼ junjun xjal kubʼ kyximen qa tkubʼtoq Txʼotxʼ tibʼaj jun elefante, tibʼaj jun jabalí, tibʼaj jun tor moqa tibʼaj alkyexku juntl txkup. Atzunte Xjan Uʼj tqʼama jlu: «Jaw tyobʼan [Dios] txʼotxʼ tibʼaj ju mintiʼ at» (Job 26:7). Tej tkubʼ tzʼibʼin Isaías 40:22 toj tnejel yol, ax ikx in tzaj qʼamaʼn qa ik tten Txʼotxʼ ik tzeʼn jun círculo moqa ik tzeʼn jun pelot. Tuʼnju el kynikʼ aj tzʼibʼil tiʼj Tyol Dios kyiʼj tiʼchaq ik tzeʼn jlu, in kubʼ kyximen nim xjal qa a Dios tzaj qʼamante kye.
In tzaj tqʼoʼn Tyol Dios tzaqʼwebʼil kyiʼj nimku xjel in che ximen xjal tiʼj, ik tzeʼn qe jlu: Qa bʼaʼn te Dios ex qa at nimxix tipumal, ¿tiquʼn at nim nya bʼaʼn ex yajbʼil? ¿Tiquʼn o tzaj nim nya bʼaʼn kyuʼn okslabʼil? (Tito 1:16). Aju tzaqʼwebʼil in tzaj tqʼoʼn Tyol Dios kyiʼj xjel lu ex kyiʼj junjuntl, jaku tzʼonin tiʼja tuʼn tok qeʼ tkʼuʼj tiʼj qa at Dios.

a Jun techel, tqʼama astrónomo Allan Sandage jlu tiʼjju at twitz kyaʼj: «In kubʼ nximane qa aju nukʼbʼil at kyxol tiʼchaq at twitz kyaʼj, nya noq tuʼnx tibʼ bʼant sino atlo jun kubʼ ximente tuʼn tten. Toj nwitze mlay tzʼel qnikʼ tiʼj Dios, pero tuʼnju at qchwinqlal, jaku kubʼ qximen qa at jun bʼinchal qe tiʼchaq».