Mulugu ohukalawo?
Yowakula ya mBibliyani
Hee. mBibliyani dhihikalamo dhithu dhowinjhiva dhinoniha wihina Mulugu ohukalawo. Bibiliya ononikongomedha olabihedha makalelo ehu ‘oopendda’ ni ‘enonelo’ yehu wihina nikanne ni nunnuwihe nroromelo ninnihuna wa Mulugu, ohiya orumedha baahi ndhe gereja dhinahudhihiwa. (Romanos 12:1; 1 João 5:20) Kabeni noone monelo dhinaharela dhinakumela mBibliyani:
Mwaha elabo yavati ni yodhulu okala yowegeredheyene ni okanna egumi yowoniha yowihina ohukalawo Mpaddusi. Bibiliya onihina: ‘Ehinoneya wihina nyumba eri yatene enamagiwa ni muthu, mbwenye dhithu dhatedhene apadduse di Mulugu.’ (Hebreus 3:4) Naarive madhu ala enafwanyeya va yolebela ela egaali ookweya, athu owinjhiva oohudhera ehonelamo wihina madhu ala bakopolo ni beebaribari. a
Naarive niganna dhithu dhatedhene nnahowelihu mwigumini, nnothuwathuwesa vanlubale onona mwahaya bwaddi nidhe nipaddusiwege. Eyo enereya mwaha “nnomurabulela Mulugu,” ni nnofuna omwebedha oliye. (Matewuji 5:3; Apocalipse 4:11) Omurabulela Mulugu kunoniha baahi wihina Mulugu ohukalawo, mbwenye wihina oliye di Mpaddusi oodhivela ni anafuna wihina nakwanihedhe dhofuna dhehu. — Matewuji 4:4.
Naarive dhovuhulela dha mBibliyani dhigaalebiwe yaka ni yakadhene mundduli, dhihakwanela ninga mwalebiwiwa. Mwilaboni kaawo muthu ananda werana ethu ninga yela, eyo enoniha wihina dhovuhulela ndha dha mBibliyani dhinadhela wa muthu anna enonelo ompitha muthu di muthu. — 2 Pedro 1:21.
Anamaleba a Bibiliya yahikanna enonelo wodhela Siyensiya wapitha athu a mudhidhi yole. Motajhiha, kale athu yarumedha wihina elabo eseyihiwe ni anenyama ninga thebo, guluwe ya mukokolani obe ng’ombe. Mbwenye Bibiliya anowoniha wi Mulugu ‘ohutadela elabo yavati ahiseyihile ethu.’ (Jó 26:7) Nimakalelo mamodhave, Bibiliya onowoga wi elabo eli ninga bola. (Isaías 40:22) Athu owinjhiva enorumedha wihina anamaleba Bibiliya yahikanna nikavihero na Mulugu bumwahaya edhe ekannege enonelo ela.
Bibiliya baahi dinavaha dhowakula dha makoho oorusa eliwo. Ohukanna dhowakula dha makoho ala enomuthukulela muthu wubuwela wi Mulugu kaawo. Motajhiha: Akala Mulugu dodhivela ni dakopolo, mwahaya bwaddi mwilaboni mudhaala makathamiho ni obure? Mwahaya bwaddi gereja dhigathukulela athu werana dhithu dhabure ohiya dhapama? — Tito 1:16.
a Motajhiha, astronomu dhaala anithaniwa Allan Sandage ahiwoga wodhela elabo yavati ni yodhulu egi: “Ginoona wihina makalelo elabo eliwa yowegeredheyene enotonyihedha wihina ohukalawo muthu eegeredhile. Miyo kaginonne dhithu dhowinjhiva wodhela Mulugu, mbwenye gihinona wihina duliyene baahi anna kopolo dhowerana dhithu dhatedhene.”
