Ee akuno wawa, e Baibolo ikatupa uwusinincizyo wuno wukalanjizya ukuti akuno wawa. Ikatuwomelezya ukuzenga isuwilo litu mwe Leza, ukupitila mukuwomvya ‘amaka ya kupelulula’ nga “na mano ya kumanya,” asa mukutungululwa vye na vino awa mumipepele wakalanda. (Waroma 12:1; 1 Yohani 5:​20) Mulole vino Baibolo yalandapo vyo vingatwavwa ukuzumila ukuti molimonye Leza akuno wawa:

•   Cimwi cino cikalanjizya ukuti e Kelewula akuno wawa, avino ivya mwi yulu na munsi vyalonganikwa icete. E Baibolo ikati: “Na cawuzimanye, kweni ing’anda ikazengwa numuntu wumwi achaleka we Leza awino welewula ivintu vyonsi.” (Waheberi 3:4) Ya-a amazwi yatatala nu kwivwa swinya na wantu awavule wano wasambilila wakazumila ukuti co-o acisinka. a

•   Swe wantu tukalonda ukumanya cino twawela munsi. Nanti tungakwata vyonsinye vino tukalonda mu wumi, co-o ceni cikasyala. Tusileka ukuvwamba ukumanya cino twawela munsi. Ko-o ukulonda akuno e Baibolo ikakwita ukuti wano “wamanya kuno wasaluka mu myezo.” Wano wasaluka mu myezo wamanya ukuti wakalonda ukumanya Leza nu kumupepa. (Mateyu 5:3; Ukuwumbulika 4:​11) Ukuvwamba ukumanya ivya kwe Leza kusipelela vye pa kutwavwa ukumanya ukuti akuno wawa, lelo kukatwavwa nukumanya ukuti we Kelewula wa lukundo swinya wino akalonda tumumanye.​—Mateyu 4:4.

•   Amawusesemo ya mu Baibolo yano yalandizilwe lya nkani lyo kwasyala imyaka imivule pakuti yize yaficiliswe, yizile ayificiliswa pa mpindi yilyanye yino yalinji nu kuficiliswa penepo. Pa mulandu wa kuti amasesemo yonsinye yizile ayifiliswa wulyanye vino yalanzilwe, yakatwavwa ukusinincizya ukuti yafumile kwe Leza.​—2 Peter 1:​21.

•   Wano walemvile e Baibolo wamanyile ivye sayansi ukulusye na wantu wanji wano walinjiko pa mpindi iyili yonganye nawo. Ku cakulolelako, kali awantu wamanyile ukuti insi yisile pa cinyama icikulu cino calinji ngati anzomvu, nanti e kapoli, nanti e cilume wa ng’ombe. Lelo e Baibolo ikalanda ukuti e Leza wawisile “insi pa lwelele.” (Job 26:7) E Baibolo ikalanda uwusaka sana ukuti insi “yawulungana.” (Ayizeya 40:22, futunoti; Douay Version) Awavule wakalanda ukuti cino e Baibolo ikalondololela icete ivintu amulandu wakuti e Leza umweneco nye awino wawanenanga ivya kulemba.

•   E Baibolo ikakwasuka amawuzyo amavule amawome aya kuti umuntu nga atazanile ivya suko angasolapo nukuzumila ukuti kutawa Leza. Ikakwasuka amawuzyo ndi vino: Nga ca kuti e Leza awa maka nkaninye swinya watukunda nu kutukunda, amulandu ci wuno atafumizyapo uwuyimvi ni ntazi? Amulandu ci wuno imipepele isikwavwila awantu ukutalika ukucita ivizima lelo ayino yikalenga wacita ni viwipe?​—Tito 1:​16.