Biblia techiluia seki tlamantli tlen kiteititia melauak kajki toTajtsin Dios. Noijki techititia tla tiknekij tikneltokaskej melauak kajki toTajtsin Dios moneki tikitaskej nochi tlen onka uan amo san tikkakiskej tlen oksekimej kijtouaj (1 Juan 5:20; Romanos 12:1). Ma tikitakan ken techititia Biblia melauak kajki toTajtsin Dios.

•   Nochi tlen onka kiteititia ikaj otlachijchi. Biblia kijtoua: “Nochi kali non tikitah, onka se akin okichijchi, pero nochi tlan onka ilwikak iwa ipan tlaltíkpaktli, Dios okichijchi” (Hebreos 3:4). Miakej ixtlamatkej kineltokaj tlen kijtoua nin texto. a

•   Tinochtin tiknekij tikmatiskej tleka nikan tikatej uan timoyolkokouaj tla amo tikmatij. Ijkon timomachiliaj porque Biblia kijtoua nochtin “moneki kitemoskej toTajtsin Dios”, non kijtosneki moneki tikixmatiskej uan tikueyichiuaskej (Mateo 5:3, TNM; Apocalipsis 4:11). Tlen yotikitakej techititia kajki toTajtsin Dios uan techtlasojtla. Ye otechchijchi ma tiknekikan tikixmatiskej uan ijkon tiyolpakiskej (Mateo 4:4).

•   Yiuejkika Biblia okijto seki profecías uan omochi ijkon ken omoijto. Non kiteititia toTajtsin Dios otlanauati ma moijkuilokan nonmej profecías uan amo san tlakamej okijkuilojkej (2 Pedro 1:21).

•   Akinmej okijkuilojkej Biblia okimatiayaj seki tlamantli tlen ixtlamatkej okimatkej satepan. Yiuejkika sekimej okineltokayaj tlaltikpak okatka ipan se ueyi yolkatl. Pero Biblia kijtoua “tlaltikpak amitlaj itech mokitskijtok” (Job 26:7). Noijki Biblia kijtoua tlaltikpak “tolontik” (Isaías 40:22). Miakej kineltokaj toTajtsin Dios okinmatilti akinmej okijkuilojkej Biblia ken kajki tlaltikpak.

•   Biblia kijtoua tlen kinekij kimatiskej akinmej amo kineltokaj kajki Dios. Sekimej kijtouaj: Tla toTajtsin Dios yolkuali uan kipia chikaualistli, ¿tleka onka miak tlamantli amo kuali uan titlajyouiaj? ¿Tleka religiones kichiuaj tlen amo kuali? (Tito 1:16). Tlen Biblia tlanankilia uelis kinpaleuis ma kineltokakan kajki toTajtsin Dios.