Eye, Baibolo yupeleka maumboni omvwika akuti Mulungu aliko. Ivi vutitang’isha kuti tikokhulupilila ngako Mulungu, osati mwakungokhulupilila tyala paliye umboni vavuphunzisa vipembezo, koma mwakukatishila ntchito “mphamvu [zasu] za kuganiza” komasoti “nzelu.” (Aroma 12:1; 1 Yohane 5:20) Onani ndandanda iyi yokonkhapo ya mfundo zufumila m’Baibolo:

•   Kunkhalapo kwa chilengedwe cholinganijiwa luweme mwamene muli vamoyo vusimikijila kuti kuli Nyamalenga. Baibolo yunena kuti: “Nichendi kuti, ng’anda iliyonse imangiwa na munthu muyakine, koma epanga vinthu vonse ni Mulungu.” (Aheberi 3:4) Olo kuti mfundo yamene iyi ni yosavuta, ŵanthu anyinji ophunzila ngako ayiwona kunkhala yamphamvu ngako. a

•   Sewo monga ŵanthu, tufunishisha kumvwisha tanthauzo komasoti cholinga cha moyo wasu. Iyi ni njala yatingasale nayo pavuli pakuti tafwana vosoŵa vasu vakuthupi. Iyi ni mbali ya chinthu chayutomola Baibolo kuti “chosoŵa [chasu] chauzimu,” chamene chuyangijilapo kunkhala na chifuno chofuna kuziŵa komasoti kulambila Mulungu. (Mateyu 5:3; Chivumbulutso 4:11) Chosoŵa chauzimu chamene ichi chupelekalini tyala maumboni akuti kuli Mulungu, koma chuwoneshasoti kuti yove ni Nyamalenga wachikondi wamene ofuna kuti tikhutilishe chosoŵa chamene ichi.—Mateyu 4:4.

•   Maulosi ofotokozewa luweme ali m’Baibolo, elembewa kukali vyaka mahandiledi kuti nthawe yake izafwike, ndipo ekwanilishiwa ndendende monga ni mwechinenelewa. Kukwanilishiwa mwachilungamo kwa maulosi amene aŵa komasoti kufotokozewa kwawo luweme owonesha mwamphamvu kuti aliyefumile ku munthu yayi koma ku chimake cha mphamvu kupambana munthu.—2 Petulo 1:21.

•   Ŵanthu elemba Baibolo enzeziŵa vinthu viyakinepa nkhani ya sayansi kupambana ŵanthu a mu nthawe yawo. Mwachisanzo, kale ŵanthu anyinji enzekhulupilila kuti chalo chilinkhazike pansana pa nyama, iyakine monga nzovu, mnjili olo ng’ombe. Mosiyana na vamene ivi, Baibolo yunena kuti Mulungu “ekoloŵeka chalo m’malele.” (Yobu 26:7) Molingana na vamene ivi, Baibolo yufotokoza ndendende mwachilili chalo kuti chili monga ni “mbulumbulu” olo kuti “chalaundi.” (Yesaya 40:22.) Ŵanthu anyinji owona kuti kafotokozedwe kaweme kamene aka pa mfundo yomvwika yamene iyi n’kakuti ŵanthu elemba Baibolo enzelondela uthenga wawo kufumila kuli Mulungu.

•   Baibolo yuyankha makonsho anyinji ovuta, ndipo ŵantu ayakine akaleka kufwana mayankho okata ntima, angayambe kukaikila kuti kuli Mulungu. Mwachisanzo monga akuti: “Keno Mulungu ni wachikondi komasoti wamphamvu zonse, ndaŵa yanji pa chalo pali matamano komasoti vinthu viipa? Ndaŵa yanji kanyinji-kanyinji vipembezo vulimbikisa ŵanthu kuchita vinthu viipa osati viweme?—Tito 1:16.