Ee, Baibol na ọ yẹrẹ ọwan imwẹro ro djephia taghene o nyerẹn. Ọ ta rẹn ọwan ne vwo esegburhomẹmro kpahen Osolobrugwẹ, orhiẹ nyoma uyono efian ẹga-a, ọrẹn nyoma ana ha “omẹgbanhon iroro” ọrhẹ “irherhe” ọwan ruiruo. (Romans 12:1; 1 John 5:20) Roro kpahen iroro ezẹko ra bọn kpahen Baibol na:

• Otọrakpọ na ra dabu rhe kwaphiẹrhọ ro ji vwo arhọ o djephia taghene o vwo Ọmemama. Baibol na ọrhọ ta: “Itiọrurhomẹmro, ohworho yọ bọn koghwa koghwa, ọrẹn ohworho rọ ma i kemru kemru yẹ Osolobrugwẹ.” (Hebrews 3:4) Dedevwo udje ọnana ọ lọhọre, ọrẹn egba irherhe buebun i kwerhọ ye. *

• Re rhiẹ ituakpọ na, ọwan i vwo ọdamẹ ọgbogbanhon re ne vwẹruọ oborẹ akpenyerẹn o ghini mevirhọ, ọnana aruẹ orhọmo rẹ emaren ugboma ọnọ jọ sabu ti nie. Ọnana yẹ oborẹ i Baibol na o seri ‘ọdamẹ re ne yono kpahen Osolobrugwẹ,’ nime a maren ọwan rhẹ ọdamẹ re ne rhe Osolobrugwẹ jeghwai ga ye. (Matthew 5:3; Revelation 4:11) Ọdamẹ ọnana o vwo djephia taghene Osolobrugwẹ o nyerẹn ọvo-o, ọrẹn o ji djephia taghene ọye Ọmemama ro vwo ẹguọlọ, rọ guọlọre nẹ ọwan i vwo evwẹnvuọn.—Matthew 4:4.

• A ya aruẹmẹrẹn ri ha uvuẹn i Baibol na ọke jijiri ri vrẹnren, aye i ji ghini rugba lele oborẹ a mẹraro aye rhotọre. Ẹmro ọrhẹ oborẹ aruẹmẹrẹn na i dabu rugba lele, i djephia taghene aye i nẹ obẹ Osolobrugwẹ rhe.—2 Peter 1:21.

• Eri ya i Baibol na i vwo irherhe isayẹnsi ghwẹ otu ihworho ri nyerẹnren uvwre ọke aye. Jerẹ udje, ọke ahwanren, ihworho buebun i vwo imwẹro taghene otọrakpọ na ọ ha oberun aranmo jerẹ eni, etiegbo, yanghene erhuẹn. Ọrẹ ovẹnẹ, Baibol na ọ tare taghene Osolobrugwẹ “ọ ha akpọ na kpahen oberun emru owuorowu-u.” (Job 26:7) Habaye, Baibol na ọ ji dabu djeyi phia taghene otọrakpọ na o “kinhariẹ.” (Isaiah 40:22) Ihworho buebun i mẹrẹnvwrurhe taghene Osolobrugwẹ yọ yẹ ihworho ri ya i Baibol na irherhe rẹ aye a sabu dje ẹmro enana fiotọre.

• Baibol na ọ kpahenrhọ enọ egbogbanhon, aruẹ enọ enana arha dabu mẹrẹn ẹkpahenrhọ ri vuọn evwa-an, ọnọ sabu lẹrhẹ ohworho je vwo imwẹro kpahen Osolobrugwẹ. Aruẹ enọ jerẹ: Orhianẹ Osolobrugwẹ ohworho ẹguọlọ ro ji vwo omẹgbanhon ephian, mesoriẹ oja ọrhẹ obiobiomu ọ vuọn akpọ na? Mesoriẹ ẹga a riẹriẹ ihworho ruẹ obiobiomu ọgbọ buebun ukperẹ ono rhiẹ orhorhomu?—Titus 1:16.