Yes, Bible storyim olketa pruv wea showim God hem stap. Bible encouragem iumi for garem faith lo God and no bilivim nomoa eni samting wea olketa religion talem. Bat, Bible sei for iumi iusim “gudfala tingting” and for “chekim evri samting.” (Rome 12:1; 1 Thess 5:​21) Bae iumi lukluk lo samfala pruv wea Bible storyim:

•   Evri samting wea laef lo universe wea followim order pruvim wanfala Creator hem stap. Bible sei: “Iumi savve, evri haos man nao wakem, bat man wea wakem evri samting hem God.” (Hebrew 3:4) Nomata wat disfala verse storyim hem simpol staka savveman agree witim datwan. a

•   Iumi olketa man born witim feeling for laek savve lo wat nao mining blo laef. Nomata iumi garem olketa physical need, bae iumi no satisfae kasem taem iumi savve wat nao mining blo laef. Diswan join witim wat Bible talem wea sei iumi “needim God.” Hem wei blo iumi olketa man for laek savve lo God and worshipim hem. (Matthew 5:3; Revelation 4:​11) Diswan no pruvim nomoa God hem stap bat hem showim tu hem wanfala Creator wea lovem iumi and laekem iumi for savve lo hem and worshipim hem.​—Matthew 4:4.

•   Olketa profesi lo Bible olketa raetem staka handred year bifor hem happen, and taem olketa kamap tru hem barava happen nao olsem hao olketa storyim. Hao olketa samting insaed lo olketa profesi hia hem kamap tru and hem stret, hem barava pruvim olketa profesi hia hem kam from samwan wea garem paoa winim iumi.​—2 Peter 1:​21.

•   Olketa man wea raetem Bible savve lo samfala samting saed lo science wea pipol lo datfala taem no savve yet. Olsem example, staka pipol lo taem blo olketa bilivim earth stap antap lo wanfala animal olsem elephant, wild pigpig, or buluka. Bat Bible sei, God “mekem disfala wol stap long ples wea no enisamting i holem hem.” (Job 26:7) Bible storyim tu sheip blo earth hem olsem wanfala “ball.” (Isaiah 40:22 footnote, NW) Staka pipol sei for olketa man wea raetem Bible savve lo olketa information olsem, God nao mas mekem olketa for savve lo datwan.

•   Bible garem ansa for staka kwestin wea pipol no savve faendem ansa for hem. Sapos pipol no kasem ansa for olketa kwestin hia, olketa maet tingse God hem no stap. Olsem example, sapos God lovem iumi and hem garem big paoa, why nao pipol safa and olketa nogud samting happen lo world? Why nao staka taem religion bihaenem pipol for duim nogud samting bat hem no bihaenem pipol for duim gud samting?​—Titus 1:​16.