Reʼ Santo Laj Huuj iruyeew juʼjun taqeh ehtalil reʼ irukʼuhtaaj chi reʼ Dios wilik. Eh irukʼuhtaaj woʼ qeh, chi mi inqaaj chi ne inkʼihik i qakojbʼal chi riij i Dios ko ruman chi ne iruyeew «qanaʼojbʼal» chuwach chi ne inooj qakʼux chi riij taqeh kikapebʼaal i juʼjun chi nimanik (1 Juan 5:20; Romanos 12:1). Qilow juʼjun taqeh ehtalil re’ irukʼuhtaaj chi wilik jenaj Dios.

•   Re kʼacharik wilik wach akʼal irukʼuhtaaj chi wilik xtzʼuhkrisanik reh. Reʼ Santo Laj Huuj iruqor: «Qehtʼal noq reʼ juʼjun chi paat wilik inyej-anik reh. Eh chuʼnchel i xa chibʼih jariik wilik, reʼ i Dios xyej-anik cho reh» (Hebreos 3:4). Korik, reʼ ehtalil wilih, mareh maʼ nim ta wach. Xa reʼ laʼ, reʼ taqeh poninaq pan nimaq taq tijinbʼal inkireq chi riij. a

•   Reʼ taqeh kʼachareel inkaaj kireqem i rukorkiil i kikʼachariik eh wilaʼ maʼ xkireq, maʼ suq ta kikʼux. Atoobʼ ta wilik kiwaʼ kihaaʼ, inkikʼraaj chi ko wilik i aajwaal wach chi keh eh reʼ i wilih irukʼam riibʼ ruukʼ iruqʼor i Santo Laj Huuj noq iruqʼor chi atoobʼ keh ajwach inkireq chi riij chi ko wilik i aajwaal wach chi keh ruukʼ i kinimaniik (Mateo 5:3; Apocalipsis 4:11). Eh jeʼ reʼ ne inabʼjik eh ne inloqʼjik wach i Dios. Rureqariik chi riij chi ko wilik i aajwaal wach chi qeh iraaj ruqʼorom chi wilik jenaj Dios ajkʼaxool, reʼ xojrutzʼuhkrisaj reh chi ne inqanabʼeej wach eh chi suq qakʼux (Mateo 4:4).

•   Kʼih taqeh qʼorooj cho rubʼiral xiʼooj eloq wach chi manlik, atoobʼ ta jenaj chik ciento haabʼ xtzʼihbʼjik. Wilaʼ inooj eloq wach taqeh qʼorooj cho rubʼiral, irukʼuhtaaj chi maʼ reʼ ta ruukʼ jenaj kʼachareel inchalik (2 Pedro 1:21).

•   Reʼ taqeh xitzʼihbʼanik reh i Santo Laj Huuj kehtʼal naq nikʼwach i ruwiiʼ i akʼal pan kiqʼijil. Xa reʼ laʼ, juʼjun taqeh kʼachareel reh najtir inkikoj naq wach chi reʼ akʼal jenaj naq elefante, jabalí, toro oon tokoom chik chikop inihqinik reh. Xa reʼ laʼ, reʼ Santo Laj Huuj iruqʼor chi reʼ Dios xuyejaaʼ i wach akʼal chi xa pan teew wilik (Job 26:7). Eh noq inqʼorik chi riij i ruwiiʼ i akʼal, reʼ Santo Laj Huuj irukoj i qʼorik «tolotik» oon «sirisik» (Isaías 40:22, TNM). Reʼ taqeh kʼachareel inkiqʼor chi reʼ Dios xuqʼor keh taqeh ajtzʼihbʼaneel reh i Santo Laj Huuj nikʼwach naq i ruwiiʼ i akʼal eh jeʼ reʼ xkinabʼeej nikʼwach naq i ruwiiʼ i akʼal.

•   Reʼ Santo Laj Huuj iruqʼor rubʼehel chi riij i kipahqanik taqeh maʼ inkikoj ta chi wilik jenaj Dios, jeʼ rukabʼ: Mi laʼ reʼ Dios atoobʼ eh nim rajaawriik, ¿chaj woʼ reet wilik i maʼ holohik ta laj bʼanooj eh tiʼ kʼaxik?¿Chaaj woʼ reet inkibʼan i tiʼ kʼaxik taqeh maʼ manlik ta nimanik? (Tito 1:16.) Reʼ iruqʼor i Santo Laj Huuj chi riij taqeh pahqanik wilih eh tokoom chik, ne tirutobʼeej reh chi ne nakoj wach chi wilik jenaj Dios.