Biblia sumajta ckaachiáysh suj Tata Yaya tiasckanta. Astaanpas yachachiáysh astaan fe Tata Yayayshpi apináyshpaj, utilisanáysh tían unanchasckayshta y mana creenáysh tían religiunes yachachisckancunata (1 Juan 5:20; Romanos 12:1). Acúysh ckáaj imaina Biblia yachachiáysh Tata Yaya tiasckanta.

•   Ckaaptíysh universupé orden y cáusay tiasckanta, ckaachin pillapas chayta ’ruasckanta. Biblia nin: «Túcuy huasi pipasraycu ’ruascka can, pero pi túcuy imastis ’ruara Tata Yaya can» (Hebreos 3:4). Amapas caypi nisckanta sujcunata mana convenceyta atin, pero ashca persunastá cayta allít convenceyta atin. a

•   Túcuy nockáysh unanchayta munáysh imajchus causáysh, pero chayta mana yachaspá mana cusisckas cayta atíysh. Chayta yachanaaspa astaan can precisasckayshmanta ckaris ina o huarmis ina, chay can Biblia nisckanta «necesidar espiritual» y chaypas can deseayta Tata Yayát ’rejsiyta y payta adorayta (Mateo 5:3; Revelación [Apocalipsis] 4:11). Chay necesidar espiritual ckaachin suj Tata Yaya munaymanta tiasckanta, pipas ’ruaráysh chá necesidaruan cusisckas canáyshpaj, payta ’rejsis y adorapus (Mateo 4:4).

•   Ashca profecías Bibliamanta na cumplicorancu hasta utulitas imastispi ashca siglus chaymantá escribisckas casckancunamantapacha. Y chayna cumplicuspá hasta utulitas imastispi, ckaachin mana ckarismanta amusckanta (2 Pedro 1:21).

•   Picunas Bibliát escriberancu aperancu ashca conocimientus cenciamanta chá tiempuspachamanta. Suj ejemplu unaycuna persunas créej carancu Ashpa tiasckanta suj elefante saanpi, sacha cuchi, suj toro o suj animal saanpi. Pero Biblia yachachiáysh suj layata, chaype nin Tata Yaya Ashpata «huarcuscka tiasckanta mana ni imamantapas» (Job 26:7). Astaanpas ’rimaspa Ashpamanta, Biblia niáysh casckanta «suj múyoj» o «suj bola» (Isaías 40:22, Martín Nieto). Ashca persunáspaj chá escritores Bibliamanta aterancu escribiyta túcuy chá imastis Tata Yaya huillacuptin.

•   Biblia contestapun ashca tapunas mana Tata Yayáp creejcunata, imaina: Tata Yaya can alliníyoj y ancha ashca atiyníyoj, ¿ímaj ancha ashca sajras imastis tían y llaquíypaj? ¿Ímaj religiunes ’ruarancu ashca problemascka? (Tito 1:16). Biblia ckocusckanta respuestas ashca tapunáspaj y sujcunatapas yanapapuyta atin Tata Yayáp creéypaj.