Kobinali, Ebibliya ehânyire birhumire binji biyerekine oku ho Nnâmahanga aba. Erhuhire omurhima oku rhube n’obuyemere muli Nnâmahanga, ci arhali kuyemera kone nka mihûrha nk’oku madîni manji gakayigiriza, na ntyo bihûnyire rhukolese “obuhashe bw’okurhanya” n’“obukengere bw’okumanya.” (Abaroma 12:1, NWT; 1 Yowane 5: 20) Rhuganirirage birhumire biguma biguma biyimangire omu Bibliya byakarhuyemeza ntyo:

•   Okubaho kw’igulu n’okuliba lipanzirwe bwinja-bwinja n’okubona binahashikane abantu balilamemo kunayerekane oku haba Omulemi. Ebibliya edesire ntya: “Bulya ngasi nyumpa ejira owayiyubakaga, na Nnâmahanga ye wajiraga ebintu byoshi.” (Abahabraniya 3:4, Mashi Bible) Bantu banji basomire banabone oku ezo ntanya ziri za buhashe, ciru ankaba ziri ndembu okuhûgukwa. a

•   Bene bantu, banaburhwe n’irala ly’okulonza okuhugûkwa omuhigo gw’akalamo n’ebyarhumaga rhwalemwa. Er’irala liba nka nyorha omuntu agendekera okuyumva ciru n’amango amalagirire gage g’omubiri gamahikirizibwa. Er’irala lyo Ebibliya ehamagire “kukenerwa n’ebintu by’ekiroho,” lihiziremo okucifinja okumanya Nnâmahanga n’okumukolera. (Mateyo 5:3, NWT; Amafulûlo 4:11) Oko kukenerwa n’ebintu by’ekiroho ko kuyerekine oku Nnâmahanga hw’aba, cikone kandi kuyerekine oku aba Lulema orhuzigira anaba alonzize rhuhikirize ago malagirire girhu g’ekiroho.—Mateyo 4:4.

•   Ebibliya erimo obulebi buyumvikine bwayandikagwa myaka minji embere cikone bwanahikirira nk’oku bwanalebagwa. Okubona obo bulebi buba b’okunali bunayumvikine kunayerekane oku arhali mwene-muntu wabulebaga.—2 Petro 1:​21.

•   Abayandikaga Ebibliya ebi balimanyire lugenda esiyanse byalirhalusire ebi abandi basomire esiyanse ba mw’ako kasanzi balihugûsirwe. Kwa lwiganyo, mango mîra bantu banji bakagirhanya mpu igulu liba liyimangire oku tembo munene bwenene, erhi oku cihumbu erhi oku nkafu. Cikone lubero n’oko, Ebibliya edesire oku Nnâmahanga “igulu alimanika oku busha.” (Ayubu 26:7) Ko n’oko, Ebibliya eba eganirire n’obwalagale okw’igulu liba “civiringo,” erhi “globe.” (Izaya 40:22, NWT) Bantu banji banarhanye oku akaba abo bantu bayandikaga Ebibliya bahugûsirwe ebintu by’esayansi kulusha abandi bantu balilamire ago mango, kuli kubona oku emyanzi bayandikaga yoshi yarhengaga emwa Nnâmahanga.

•   Ebibliya ehânyire amashuzo oku madoso manji mazibu rhucidosa, n’ago madoso erhi gakabula amashuzo g’okurhimusa ganarhuma omuntu abula kuyemera oku ho Nnâmahanga aba. Kwa lwiganyo: Akaba Nnâmahanga aba wa buzigire n’ogala byoshi, bulya gurhi alekerire amalibuko n’obubi bugendekere omw’igulu? Bulya gurhi kanji-kanji idîni linakashumika abantu bajire amabi kulusha okubashumika bajire aminja?—Tito 1:16.