Ina. Bhibhiliya yi ngu hi ninga sighelo nya singi si hi girago hi khodwa gu khethu Nungungulu womo, iyo yi ngu hi phasa gu tiyisa gukhodwa gwathu ga Nungungulu. Kha hi yeli gu khodwa ga satshavbo esi dzitshetshe dzi si ganeyago, ganiolu hi yede gu thumisa “mapimo” yathu gasi hi “pwisisa” gwadi lisine. (Varoma 12:1; 1 Johane 5:20) Wona edzi Bhibhiliya yi hi phasago khidzo.

•   Edzi mafu ni ndzadzi si vangidwego khidzo so yeyedza gu khiso womo Muvangi. Bhibhiliya yo ganeya gu khiyo: “Kha nga hi dzitigo, nyumba ni nyumba yi vbahidwe khu muthu nyo khaguri, ganiolu oyu a giridego silo satshavbo khu Nungungulu.” (Vahebheru 3:4) Ambari olu mahungu yaya ma si garadzigo gu ma pwisisa, ayo ma ngu phasa vathu nya vangi ngudzu. a

•   Hatshavbo hi ngu vbweta gu pwisisa gu khethu khu yavbini makungo nya womi. Ambari olu hi si kodzago gu gira satshavbo gasi hi tsaka, hi ngu vbweta ngudzu gu pwisisa gu khethu khu yavbini makungo nya womi. Isoso so girega khu gu hi ngu “vbweta gu thangedwa khu Nungungulu” hi bwe hi mu thumeya. (Matewu 5:3; Gutuledwa 4:11) Gudogoreya gwathu nya gu vbwete guti Nungungulu hi bwe hi mu thumeya, go yeyedza gu khugo Uye womo, a na ni lihaladzo khethu nigu a gu vbweta gu khuye hi tsaka. — Matewu 4:4.

•   Ambari olu siprofeto nya Bhibhiliya si nga lowa gale ngudzu, si tadzisegide khu gu vbeleya. Khu gu ba Bhibhiliya yi si kodzide gu si tshamuseya khu ndziya yeyi, iyo yi lovidwe khu muthu a gu na ni tshivba ngudzu. — 2 Pedro 1:21.

•   Valovi nya Bhibhiliya va di guti silo nya singi gu vbindra vatshavbo va nga ba va vbanya ga tepo yile. Khu giyeyedzo, gale vathu nya vangi va di gu khodwa gu khavo mafu momo vbatshani nya sirengo nya tshivba nya nga Elefante, dzikhumba dza khabini mwendro vbatshani nya mombe. Ambari ulolo, Bhibhiliya yo ganeya na yi tiyisegide gu khiyo: Nungungulu “a emis[ide] mafu ndrengelengeni.” (Joba 26:7) Khu ndziya nyo fane, Bhibhiliya yi ngu tshamuseya edzi mafu ma khadego khidzo, iyo yo ganeya gu khiyo mafu ma gu fana ni “bhola” (Isaya 40:22) Vathu nya vangi va gu khodwa gu khavo valovi nya Bhibhiliya va si kodzide gu lova silo si nga ba si si tidwi khu muthu kholu esi va si lovidego si di guta khiyo ga Nungungulu.

•   Bhibhiliya, khiyo basi yi hi ningago mihlamulo nya siwudziso nyo garadze ngudzu. Muthu a gu mba mana mihlamulo nya siwudziso sesi a nga vboheya mahegiso nya gu khuye Nungungulu mwalo. Khu giyeyedzo, abari gu Nungungulu a na ni lihaladzo ni tshivba yatshavbo, khu ginani gu gu na ni wuvivbi ni gu tshanisega tigoni? Khu ginani dzitshetshe nya dzingi dzi kutsedzeyago vathu nya vangi gu gira silo nya gu vivbe? — Tito 1:16.