Iiyi, Bbayibbele litondeezya kuti Leza mpali. Litusungwaazya kuti tube aalusyomo muli Leza “kwiinda mukubelesya maano” eesu kutali kusyoma zintu zyaambwa aabasizikombelo. (Baroma 12:1; 1 Johane 5:20) Atubone tumwi twaambo tuli muBbayibbele:

•   Mbiipangidwe nyika akukonzya kupa kuti zintu zili mukati kazipona zitondeezya kuti kuli Mulengi. Bbayibbele lyaamba kuti: “Ncobeni, iŋanda iili yoonse kuli wakaiyaka, pele ooyo wakapanga zintu zyoonse ngu Leza.” (Bahebrayo 3:4) Nikuba kuti kaambo aaka kalaantanganana, pesi bantu biingi bayiide baamba kuti takamvwisisiki pe. a

•   Zili mulindiswe tubantu kuyanda kuziba kuti tuponenaanzi alubo chiyandisyo chakuziba eezi tachimani pe nikuba kuti twajana zintu nzituyanda zyakumubili. MuBbayibbele, chiyandisyo eechi chaambwa kuti nkuyanda “kusololelwa a Leza,” eezi ziswaanizya kuyanda kumuziba akumukomba. (Matayo 5:3; Ciyubunuzyo 4:11) Kuyanda kuzulwidwa aaLeza takupi kuti tujinkile aakusyoma kuti mpali luzutu pesi kutugwasya kuti tubone kuti Leza Mulengi siluyando uuyanda kuti tuzulwidwe aanguwe.—Matayo 4:4.

•   Zintu zili muBbayibbele zyakalembwa chiindi kazitanachitika pe pesi zyakazoochitika kweendelana ambuzyakaambwa. Kuzuzikizigwa kwabupolofita oobu kutondeezya kuti bwakaambwa aamuntu ulaabusongo bwiinda bwabantu boonse.—2 Petro 1:21.

•   Balembi baBbayibbele bakali kuzimvwisisisya zintu zyasayensi kwiinda bantu bakapona muchiindi nchibakali kupona. Muchikozyano, chiindi bantu bakali kusyoma kuti nyika yakakkede aamunyama uuli mbuli nzovu, ngulube naakuti mupule wang’ombe. Kusiyana azeezi, Bbayibbele lyaamba kuti Leza wakaanzika, “nyika aatakwe cintu.” (Jobu 26:7) Alubo Bbayibbele lyaamba kuti nyika ili mbuli ‘mubalo.’ (Isaya 40:22) Bantu biingi bakabona kuti bupanduluzi bulembedwe muBbayibbele butondeezya kuti basikulilemba bakali kulemba zintu zyakali kuzwa kuli Leza.

•   Bbayibbele lisandula mibuzyo myiingi loko iikataazya, kuti muntu taazijana nsandulo zyamibuzyo eeyo zilakonzya kupa kuti atasyomi kuti Leza mpali. Muchikozyano, kuti Leza kali aaluyando alubo kalaamanguzu nkamboonzi nalekelede mapenzi abubi munyika? Nkamboonzi zikombelo nizipa kuti bantu bachite zintu zibi kutali zibotu?—Tito 1:16.