Ja Biblia wa xyaʼa meran pruebaʼik bʼa meran sakʼan ja Dyosi. Cha wa sjeʼakitik bʼa oj ajyukujtik skʼuʼajel bʼa Dyos tʼilani oj katik makunuk ‹tsʼikan lek ja jpensartiki›, sok mi ja oj katik makunuk ja pensarik yiʼoje ja relijyoniki (1 Juan 5:20; Romanos 12:1). La kiltik jujuntik pruebaʼik bʼa Biblia bʼa wa xchiktes meran sakʼan ja Dyosi.

•   Ja jastal chapan ay lek ja bʼa sutsatkʼinali sok ja sakʼanili wani sjeʼa ayni jun kʼuluman. Ja Biblia wa xyala: «Kada naʼits ayni maʼ yaʼunej kʼeʼuk, pe ja maʼ skʼulunej yibʼanal ja jastik junuki yeʼnani ja Dyosi» (Hebreos 3:4). Ama ja prueba it lajansok mi jel chaʼanyabʼaliluk, pe jitsan kristyano bʼa jel chapane wani skʼuʼane lek. a

•   Jastal kristyanoʼik ayni kiʼojtik ja kʼankʼunel bʼa yajel ajyuk stojol ja sakʼanili, jun jasunuk ke ta mi xkatik ajyuk mini xyijan jun smajlajel. Ja kʼankʼunel it mini jaʼukta ja jastik wa xmakuni ja bʼa sakʼanili, jani ti chʼikan ja jas wa xya sbʼiʼiluk ja Biblia ja ‹stʼilanil snebʼjel sbʼaja Dyosi›, bʼa cha ti chʼikan ja kʼankʼunel bʼa snajel sbʼaj sok yajelyi stoyjel ja Dyos (Mateo 5:3; Apocalipsis 4:11). Ja stʼilanil it bʼa snebʼjel sbʼaja Dyosi wa xchiktes ke ay jun Dyos bʼa yajalkʼujol, ja maʼ skʼulanotik soka kʼankʼunel jaw bʼa oj kabʼtik stsamalil sok bʼa ajyel gusto (Mateo 4:4).

•   Jitsan ja jas alubʼalkan ja bʼa Biblia kʼotni smeranil jastalni mero yala sigloʼik tsaʼan yajni tsʼijbʼajikani. Ja jastal tsʼikan lek kʼotel smeranili, juni prueba bʼa mi ti yawe el bʼa spensare ja matik stsʼijbʼanekani (2 Pedro 1:21).

•   Ja matik stsʼijbʼane ja Biblia ayni yiʼoje snajel bʼa cientificoʼik jel chapane ja bʼa styempoʼe. Jun sjejel, ja bʼa tyempo jaw wani skʼuʼane ke ja Luʼumi kuchubʼalyuj jun elefante, jun chitam, jun toro ma pilan chante. Pe ja Biblia wa xyala ke ja Dyos mini ‹jas yaʼunej syam ja luʼumi› (Job 26:7). Chomajkil, yajni wa xcholo jastal tojbʼel ja Luʼumi, ja Biblia wa xyala ke ‹setan ay› (Isaías 40:22; Martín Nieto). Bʼa jitsan kristyanoʼik, ja xcholjel mas chikan yuja kʼot snaʼe ja jastik jaw ja tsʼijbʼanumik bʼa Biblia, eske jani aji snaʼe yuja Dyos.

•   Ja Biblia wa xyaʼa sjakʼjel jitsan sjobʼjel ayiʼoje ja matik mi skʼuʼane ta meran sakʼan ja Dyosi, jastalni: Ta ja Dyos jel lek sok yeʼn ja Maʼ kechan jel ja yipi, ¿jas yuj jel ja wokoli sok ja bʼa malo? ¿Jas yuja relijyonik jel yaʼuneje ajyuk wokolik? (Tito 1:16). Ja sjakʼjel wa xyaʼa ja Biblia sbʼaja sjobʼjelik it sok tuk ojni bʼobʼ skoltayex bʼa oja kʼuʼukex meran sakʼan ja Dyosi.