Yu Ting God i Stap Tru?

PLEI

Bekim bilong Baibel

Yes, ol tok bilong Baibel i kamapim ol evidens olsem God i stap tru. Em i kirapim yumi long yusim “gutpela tingting” na “opim tingting” bilong yumi na kisim pasin bilong bilip long God, na yumi no bilip nating long ol tok bilong ol lotu. (Rom 12:1; 1 Jon 5:20) Skelim ol dispela gutpela tingting bilong Baibel:

Ol samting i gat laip long yunives i wok gut wantaim i soim olsem i gat Krieta. Baibel i tok: “Olgeta wan wan haus i gat man i bin wokim, tasol man i bin wokim olgeta samting em God.” (Hibru 3:4) Maski dispela tok i stret, planti man i gat bikpela save ol i hatwok long bilipim. a
Yumi ol man i gat wanpela strongpela laik long save long as na yumi stap laip, dispela i olsem wanpela kain hangre we maski yumi kaikai, hangre i stap yet. Em samting Baibel i kolim olsem “hangre long kisim save long God,” dispela i makim tu laik bilong lotuim God. (Matyu 5:3; Revelesen 4:11) Dispela laik bilong kisim save long God em evidens olsem God i stap tru, na tu em Krieta i gat pasin laikim na em i laik inapim laik bilong yumi long kisim save long em.—Matyu 4:4.
Ol i bin raitim ol tok profet long Baibel inap planti handret yia paslain na bihain ol truim bilong ol i kamap olsem ol tok profet i kolim. Ol samting long ol dispela tok profet i kamap tru na i soim olsem wanpela man i gat bikpela strong i winim yumi ol man i as bilong ol dispela tok profet.—2 Pita 1:21.
Ol man bilong raitim Baibel i save long ol samting bilong saiens winim ol man i stap long taim bilong ol. Eksampel, long bipo planti man i bilip olsem graun i stap antap long wanpela animal, olsem elefan, welpik, o bulmakau. Tasol Baibel i tok God “i mekim dispela graun i hangamap nating.” (Jop 26:7) Na tu, Baibel i stori gut long seip bilong graun olsem em i “raunpela,” o olsem “bal.” (Aisaia 40:22; Douay Version) Planti man i ting olsem dispela kain bikpela save ol man bilong raitim Baibel i kamapim i mas kam long God.
Baibel i bekim planti bikpela askim, tasol sapos man i no kisim bekim bilong dispela kain askim em inap kisim tingting olsem i no gat God. Olsem: Sapos God i gat pasin laikim na em i gat olgeta strong, wai na i gat pen na hevi na pasin nogut long graun? Wai na planti taim ol samting lotu i mekim i kirapim ol man long mekim ol pasin nogut?—Taitus 1:16.

a Olsem, wanpela saientis i dai pinis em Allan Sandage, i tok long yunives olsem: “Mi no inap bilip olsem ol samting inap bihainim stret ron bilong ol i kamap long ol samting em pastaim ol i stap nabaut nabaut. I mas i gat lo i stiaim ron bilong ol. Mi no kliagut long God, tasol i mas i gat wanpela krieta i stap bikos i no gat wanpela samting inap kamap nating.”