Ийе, ооң ылап шын бадыткалдары Библияда бар. Библия бисти Бурганга бүзүреливисти анаа-ла шажыннарның өөредиглеринге даянгаш эвес, а угаан-сарыылдыг бооп, хандыр шинчилеп тургаш, сайзырадырынче деткип турар (Римчилерге 12:1; 1 Иоанн 5:20). Библияга үндезилеттинген дараазында бадыткалдарны көөрүн силерге сүмелеп тур бис:

•   Октаргайда тургустунган чурум база ында бүгү амылыг бойдус Чаяакчы бар деп херечилеп турар. Библияда: «Оран-сава бүрүзүн бир-ле кижи туткан, а бүгү бар чүүлдү Бурган туткан болгай» деп бижээн (Еврейлерге 3:4). Бо бадыткал бөдүүн-даа болза, дээди эртемниг хөй-ле кижилер ону күштүг барымдаа деп санап турар a.

•   Кижи бүрүзүнде төрүмелинден-не чуртталганың ужур-утказын билип алыксаар күзел бар. Ол күзелди хандырар дизе, чүгле мага-боттуң хереглелдерин хандырары чедишпес. Библияда ону Бурган-биле харылзаа тудар хереглелдерге хамаарыштырып турар. Оон аңгыда, ол хереглелдерже Бурганны билип алгаш, Аңаа мөгеери база кирип турар (Матфей 5:3; Ажыдыышкын 4:11). Кижилерде ындыг хереглелдиң бар болганы Бурган херек кырында бар деп база Ол ынакшылдыг Чаяакчы болгаш, хереглелдеривисти хандырып алырывысты күзеп турар деп херечилеп турар (Матфей 4:4).

•   Өттүр билген медеглелдер чүс-чүс чылдар бурунгаар бижиттинген-даа болза, ында болуушкуннар айыткан үезинде күүсеттинген. Ол өттүр билген медеглелдерниң тодаргайы болгаш ылап шынныы ону кижилер биживээн деп шынзыдып турар (2 Пётр 1:21).

•   Библияны бижип турган улус, оларның-биле чаңгыс үеде чурттап чораан кижилерниң угаап-бодап шыдавазы билиглерлиг турган. Чижээ, ол үеде хөй-ле улус Черни чаан, черлик хаван, буга азы кандыг-бир өске дириг амытанның кырында турар деп бүзүреп чораан. Ынчалза-даа Библияга «черни куруг хоска азып каан» деп бижип каан турган (Иов 26:7). Оон аңгыда ында Черниң хевирин борбак деп бижээн (Исайя 40:22). Ол мерген-угаанныг билиглер Библияны бижип турган улуска Бургандан келген деп хөй улус санап турар.

•   Улус нарын айтырыгларның харыызын тып чадааш, Бурганга бүзүревес апарып болур, а Библия ол айтырыгларга харыылап турар. Чижээ, Бурган энерелдиг болгаш бүрүн күчүлүг болза, делегейде чүге ынча хөй каржы-бак, хилинчек-човалаң барыл? Чүге кижилер болганчок шажын-чүдүлгелерниң салдары-биле эки эвес, а багай херектер үүлгедип турарыл? (Титке 1:16).