Le Bibliaoʼ ku yaʼalik baʼax oʼolal jeʼel u páajtal k-creertik yaan Dioseʼ. Tsʼoʼoleʼ ku kaʼansikeʼ utiaʼal u yantal k-fe tiʼ Dioseʼ unaj u yantaltoʼon naʼat yéetel k-ilik wa jaaj le baʼax ku kaʼansik le religiónoʼoboʼ (Romanos 12:1; 1 Juan 5:20). Koʼox ilik baʼaxoʼob ku yaʼalik le Biblia eʼesik jach tu jaajil yaan Dioso’:

•   Le baʼaxoʼob yanoʼob teʼ kaʼan yéetel teʼ Luʼumaʼ tu tsoolol yaniloʼob yéetel yaneʼ kuxaʼanoʼob, lelaʼ ku yeʼesikeʼ yaan máax beetmiloʼob. Le Bibliaoʼ ku yaʼalik: «U jaajileʼ tuláakal najeʼ yaan máax beetmil, chéen baʼaleʼ le máax beet tuláakal le baʼaloʼoboʼ Dios» (Hebreos 3:4). Yaan tiʼ le máaxoʼob kaʼanchajaʼan u xookoʼoboʼ ku creerkoʼob le baʼax ku yaʼalik le Bibliaaʼ. a

•   Tuláakal máak taak u yojéeltik baʼaxten kuxaʼan. Wa maʼ tu yojéeltik lelaʼ maʼ kiʼimak u yóoliʼ. Desde ka beetaʼab máakeʼ ku yuʼubik u kʼaʼabéetil u «nuʼuktaʼal tumen Dios», lelaʼ u kʼáat u yaʼaleʼ ku tsʼíiboltik u kʼaj óoltik yéetel u adorartik Dios (Mateo 5:3; Apocalipsis 4:11). Lelaʼ ku yeʼesikeʼ yaan juntúul Dios u yaabiltmoʼon, letiʼeʼ u kʼáat ka k-kʼaj óolte utiaʼal ka kiʼimakchajak k-óol (Mateo 4:4).

•   Yaʼab tiʼ le profecíaʼob yaan teʼ Bibliaoʼ béeychajoʼob kex tsʼoʼok u máan kʼiin aʼalaʼak. Úuchik u béeytal jach jeʼex tsʼíibtaʼaniloʼ ku yeʼesikeʼ maʼ chéen wíinik aʼaliʼ (2 Pedro 1:21).

•   Le máaxoʼob tsʼíibt le Bibliaoʼ u yojloʼob yaʼab baʼaloʼob maʼ úuch ojéeltaʼak tumen le científicoʼoboʼ. Úuchjeakileʼ ku creertaʼaleʼ le Luʼumaʼ tiaʼan yóokʼol juntúul elefante, juntúul kitam, juntúul wakax wa yóokʼol uláakʼ baʼalcheʼ. Chéen baʼaleʼ le Bibliaoʼ ku yaʼalikeʼ ka tu beetaj Dios le Luʼumaʼ «chʼúuykab úuchik u pʼatik, mix tuʼux etsʼekbal» (Job 26:7). Tsʼoʼoleʼ ku yaʼalik xaneʼ le Luʼumaʼ «wóolis» (Isaías 40:22). Yaʼab máax aʼalikeʼ Dios tsʼáa tu tuukul le máaxoʼob tsʼíibt le Biblia le baʼaloʼobaʼ.

•   Le Bibliaoʼ ku núukik le baʼaloʼob taak u yojéeltik le máaxoʼob maʼatech u creerkoʼob Diosoʼ. Jujunpʼéeloʼobeʼ letiʼe jeʼeloʼobaʼ: Wa Dios uts yéetel yaan u podereʼ, ¿baʼaxten ku muʼyaj máak? ¿Baʼaxten le religiónoʼ maʼ tu péeksik máak u beet baʼax uts? (Tito 1:16). Le baʼax ku yaʼalik le Biblia yoʼolal le baʼaloʼobaʼ jeʼel u yáantkech a creert yaan Dioseʼ.