Is die Koninkryk van God in jou hart?
Die Bybel se antwoord
Nee, God se Koninkryk is nie bloot ’n toestand in die hart van Christene nie. a Die Bybel toon waar dit werklik geleë is deur dit “die koninkryk van die hemele” te noem (Matteus 4:17). Kyk hoe die Bybel toon dat dit ’n werklike regering is wat vanuit die hemel regeer.
God se Koninkryk het heersers, onderdane, wette en ’n opdrag om God se wil in die hemel en op die aarde uit te voer.—Matteus 6:10; Openbaring 5:10.
God se regering, of Koninkryk, sal oor “al die volke, volksgroepe en tale” op die aarde regeer (Daniël 7:13, 14). Die Koninkryk se gesag om te regeer, kom nie van sy onderdane nie, maar regstreeks van God.—Psalm 2:4-6; Jesaja 9:7.
Jesus het vir sy getroue apostels gesê dat hulle saam met hom in die Koninkryk van die hemel sal wees en ‘op trone sal sit’.—Lukas 22:28, 30.
Die Koninkryk het vyande, en dit gaan hulle vernietig.—Psalm 2:1, 2, 8, 9; 110:1, 2; 1 Korintiërs 15:25, 26.
Die Bybel leer nie dat die Koninkryk van die hemel in jou hart is in die sin dat dit deur ’n persoon se hart regeer nie. Maar dit toon wel dat die “woord van die koninkryk” of die “goeie nuus van die koninkryk” ’n uitwerking op ons hart kan en moet hê.—Matteus 13:19; 24:14.
Wat beteken dit dat ‘die koninkryk van God binne-in julle is’?
Party mense is verward oor waar die Koninkryk is weens die bewoording van Lukas 17:21 in party Bybelvertalings. Die Ou Afrikaanse Bybelvertaling sê byvoorbeeld: “Die koninkryk van God is binne-in julle.” Om hierdie vers reg te verstaan, moet ons na die konteks kyk.
God se Koninkryk was nie in die hart van Jesus se onversetlike en moorddadige teenstanders nie
Jesus het met die Fariseërs gepraat, ’n groep godsdiensleiers wat hom teëgestaan het en ’n aandeel aan sy teregstelling gehad het (Matteus 12:14; Lukas 17:20). Maak dit sin om te dink dat die Koninkryk ’n toestand in hulle onversetlike harte was? Jesus het vir hulle gesê: “Binne-in is julle vol huigelary en wetteloosheid.”—Matteus 23:27, 28.
Ander vertalings toon duidelik wat Jesus bedoel het deur sy woorde in Lukas 17:21 akkuraat soos volg weer te gee: “Die koninkryk van God is hier by julle” (Ons kursiveer; Nuwe Afrikaanse Bybelvertaling). “Die koninkryk van God is onder julle” (voetnoot in NW). Die Koninkryk van die hemel was “by” of “onder” die Fariseërs omdat Jesus, die een wat deur God aangestel is om as Koning te regeer, voor hulle gestaan het.—Lukas 1:32, 33.
a Baie Christelike kerke leer dat die Koninkryk van God binne-in ’n persoon, of in ’n persoon se hart is. Byvoorbeeld, in die Verenigde State het die Suidelike Baptistekonvensie verklaar dat die Koninkryk van God deels “die heerskappy van God in die hart en lewe van die individu” is. Pous Benediktus XVI het eweneens in sy boek Jesus of Nazareth gesê dat “die Koninkryk van God by wyse van ’n luisterende hart kom”.
Jy sal dalk ook hiervan hou
BELANGRIKE BYBELLERINGE
Wat is God se Koninkryk?
Regdeur Jesus se bediening het hy mense meer oor God se Koninkryk geleer as oor enigiets anders. Sy volgelinge bid al honderde jare lank dat daardie Koninkryk moet kom.
VERDUIDELIKINGS VAN BYBELVERSE
Verduideliking van Markus 1:15 – “Die Koninkryk van God is op hande”
Het Jesus bedoel dat die Koninkryk alreeds begin regeer het?
DIE WAGTORING
Wie is die Koning van God se Koninkryk?
’n Hele paar Bybelskrywers het details neergeskryf wat die persoon identifiseer wat die Koning van God se Koninkryk sou word. In die hele geskiedenis pas net een persoon by daardie beskrywing.
ANTWOORDE OP BYBELVRAE
Wat sal God se Koninkryk tot stand bring?
Vind uit wat jy kan verwag wanneer God se regering oor die aarde heers.
BYBELLERINGE
Probeer ons Bybelstudieprogram
Studeer die Bybel gratis met ’n persoonlike onderrigter.