Nyo Ker pa Mungu ni i adundewa?

NG'II DHOK M'IMARU

Lembe ma Biblia udwoko

Ungo, Ker pa Mungu utie ngo kite m’adunde Jukristu utie ko. a Biblia unyutho kaka ma tap ma Kerne nwang’ere i iye kinde m’elwong’e nia “Ker mi polo.” (Matayo 4:17) Kenen lembe moko ma Biblia uyero m’unyutho nia etie ker mandha m’ubebimo niai kud i polo.

Ker pa Mungu utie ku jubim, lwak, cik, man etie ku tic: niketho yeny pa Mungu utimere i polo man iwi ng’om.—Matayo 6:10; Lembanyutha 5:10.
Bimobim pa Mungu kunoke Ker pare bibimo wi “kodhidhanu ceke, man thek ceke, ku dhok ceke” mi ng’om. (Daniel 7:13, 14) Mungu re m’umiyo ire dito, ento ungo lwak mi Kerne.—Zaburi 2:4-6; Isaya 9:7.
Yesu uyero ni jukwenda pare ma gigwoko bedoleng’ migi nia gibidikiri kude i Ker mi polo man ‘gibijany iwi komker.’—Luka 22:28, 30.
Kerne utie bende ku jukwor m’ebinyotho i nindo m’ubino.—Zaburi 2:1, 2, 8, 9; 110:1, 2; 1 Jukorintho 15:25, 26.

Biblia uponjo ngo nia Ker mi polo ni i adunde dhanu, niwacu nia ebebimo nikadhu kud i i adundejo. Enre enyutho nia “lembe mi Ker” kunoke ‘lembanyong’a mi Ker’ maeno copo man ucikere nibedo ku matoke iwi adunde ng’atini.—Matayo 13:19; 24:14.

Wec ma nia “Ker pa Mungu n’i kindwu” thelembene tie ang’o?

Kite ma juloko ko Luka 17:21 i Biblia moko unyotho wi dhanu ma pol uketho ging’eyo ngo nia Ker pa Mungu ni kani. Ku lapor, Biblia King James Version uyero nia “ker pa Mungu ni iwu.” Kara wanyang’ ma ber i verse maeni, ukwayu wakeng’ii i lembe ma jubino weco i wie.

Ker pa Mungu ubino ngo i adunde dhanu ma reco ma gibino jai ni Yesu man gibino sayu ninege

Yesu ubino weco ku Jufarisayo ma gibino judong dini ma gijai i kume man gibino sayu yore ma giromo nege ko cen. (Matayo 12:14; Luka 17:20) kNyo etie lembe ma winjere niyero nia Ker pa Mungu ubino i adunde jujai maeno? Yesu uyero igi kumae: “Yor i iwu wupong’ kud umbili man ku dubo.”—Matayo 23:27, 28.

Lok mange uyero wec pa Yesu ma nwang’ere i Luka 17:21 i ayi ma tap, eyero kumae: “Ker pa Mungu ni keni karacelo kudwu.” (wan re ma waketho evuto avuta; Contemporary English Version) “Ker pa Mungu n’i kindwu.” (Biblia—Lok mi ng’om ma nyen) Ker mi polo ubino “karacelo” kunoke i “kind” Jufarisayo, pilembe Yesu ma tie ng’atu ma Mungu ung’iyo ubed Ubimo mi Kerne ucungo i kindgi keca.—Luka 1:32, 33.

a Dini ma pol ma giyero nia gitie Jukristu giponjo nia Ker pa Mungu ni i ng’atini kunoke ni i adundene. Ku lapor, i ng’om mir États-Unis, dini moko (Southern Baptist Convention) giwacu nia i kadhiri moko Ker pa Mungu utie “bimobim pa Mungu i adunde ng’atini kunoke i kwo pa ng’atini.” Rom rom kumeno, i buku moko m’ekiewo (Jésus de Nazareth ) papa Benoît XVI uwacu nia “Ker pa Mungu bino nikadhu kud i i adunde ma winjo lembe.”