E Koaua ae E Memena Ana Tautaeka n Uea te Atua i Nanom?
Ana kaeka te Baibara
E bon aki memena Ana Tautaeka n Uea te Atua i nanoia Kristian. a E kaotaki raoi n te Baibara nnena ni koaua ngke e aranna bwa “te Tautaeka n Uea mai karawa.” (Mataio 4:17, King James Version) Noria bwa e kangaa te Baibara ni kaotia bwa bon te tautaeka ni koaua ae kairiri mai karawa.
Iai n Ana Tautaeka n Uea te Atua taani kairiri, ana aomata, ana tua, ao te mwaaka ni kakororaoa nanon te Atua i karawa ao n te aonnaba.—Mataio 6:10; Te Kaotioti 5:10.
E na kairiri Ana Tautaeka n Uea te Atua i aoia “botannaomata, natannaomata, ao taian taetae” n te aonnaba. (Taniera 7:13, 14) E aki roko te mwaaka ni kairiri mairouia ana aomata, ma e bon roko mairoun te Atua.—Taian Areru 2:4-6; Itaia 9:7.
E tuangia Iesu ana abotoro aika a kakaonimaki bwa a na raonna n te Tautaeka n Uea i karawa n “tekateka i aoni kaintokanuea”.—Ruka 22:28, 30.
Iai taan ribaa te Tautaeka n Uea ake e na kamaunaia.—Taian Areru 2:1, 2, 8, 9; 110:1, 2; 1 I-Korinto 15:25, 26.
E aki angareirei te Baibara bwa e mena te Tautaeka n Uea ae bwaini karawa i nanom n te aro are e a kairiri mai nanon te aomata. Ma e oti bwa e kona ao e riai n rotaki nanora n “taekan te Tautaeka n Uea” ke te “rongorongo ae raoiroi ibukin te Tautaeka n Uea.”—Mataio 13:19; 24:14.
Tera nanon ae “e mena uean te Atua i nanomi”?
Iai tabeman aika a aikoa ota n rairai tabeua ake a raira Ruka 17:21, bwa e mena ia te Tautaeka n Uea. N te katoto, e rairaki n te Baibara ae Beingam bwa “e mena uean te Atua i nanomi.” Ngkana ti kan ota raoi n te kibu aei, ti riai n iangoa kanoan te kibu anne ni kabane.
E aki mena ana Tautaeka n Uea te Atua i nanon Iesu ao i nanoia aomata aika taani kakaaitara ao taan tiritiri
E taetae Iesu nakoia Baritaio, ake taani kairiri n Aaro aika a kaitaraa ao naake a bairea kamateana. (Mataio 12:14; Ruka 17:20) E riai iangoan ae e mena te Tautaeka n Uea i nanoia aika a buakaka? E tuangia Iesu ni kangai: “A on nanomi n te mamana-te-aba ma te buakaka.”—Mataio 23:27, 28, BG.
Tabeua rairai a kaeta raoi ana taeka Iesu are n Ruka 17:21 ni kangai: “E memena ana tautaeka n uea te Atua ma ngkami.” (Italics ours; Contemporary English Version) “E a mena i buakomi ana Tautaeka n Uea te Atua.” (Te Rairai ae te Aonnaba ae Boou) E mena te Tautaeka n Uea are i karawa “i rarikia” ke “i buakoia” Baritaio, ibukina bwa e mena i buakoia Iesu are e rineaki iroun te Atua bwa e na Uea.—Ruka 1:32, 33.
a A bati Aaro aika angareirei bwa Ana Tautaeka n Uea te Atua e mena i nanon te aomata. N te katoto, n te United States ao e taekinna n ana bwabwaro te Southern Baptist bwa Ana Tautaeka n Uea te Atua “e boni mena i nanoia ao ni maiuia aomata n tatabemania nako.” E korea naba anne te Pope Benedict XVI n ana boki are Jesus of Nazareth, ngke kangai bwa “e na roko Ana Tautaeka n Uea te Atua ngkana ti butimwaea ma nanora.”
Ko Bae Naba n Tangira
REIREI AIKA RANGI NI KAKAWAKI N TE BAIBARA
Tera Ana Tautaeka n Uea te Atua?
N ana mwakuri ni minita Iesu ao e bati riki ana tai n angareirei i aon taekan Ana Tautaeka n Uea te Atua. I nanon tienture aika bati, a a tia taan rimwina n tataroa rokon te Tautaeka n Uea anne.
TE TAUA-N-TANTANI
Antai te Uea n Ana Tautaeka n Uea te Atua?
Tabeman taani korea te Baibara a korei taekan teuare e na Uea n Ana Tautaeka n Uea te Atua. Bon akea te aomata temanna ae botau ma kabwarabwara akanne.
TITIRAKI AIKA KAEKAAKI MAN TE BAIBARA
Tera ae E na Kakororaoia Ana Tautaeka n Uea te Atua?
Reiakina te bae ko na kariaa ngkana e a kairiri ana tautaeka te Atua n te aonnaba ni kabutaa.