Gobran Ngöbökwe ye ñan jondron tä nitre kristiano brukwäte. a Gobran ye tä medente ye Biblia tä mike gare mrebe nie ñobätä ñan aune tä kädeke gobran kä kwinbiti (Mateo 4:17). Arato tä mike gare nie gobran ye metre aune nibira gobrane kä kwinbiti. Ani mike gare jai.

•   Gobran Ngöbökwe yete, ni ruäre tä gobrane nitre kwati yebiti aune ne tä ükaninte arato ne kwe Ngöbö töi rabadre bare kä kwinbiti aune kä tibienbätä (Mateo 6:10; Revelación [Apocalipsis] 5:10).

•   Gobran Ngöbökwe rabai gobrane nitre tä blite jene jene nitre tä nüne juta jene jene aune nitre jökrä nünanka kä tibienbätä yebiti (Daniel 7:13, 14). Nitre nünanka kä tibienbätä ñan gobran ne diainkä. Ngöbökwe gobran ye ükaninte aune niarakwe ja di biani gobran ne ie, ni kä tibienbätä jie ngwankäre (Salmo 2:4-6; Isaías 9:7).

•   Nitre apóstol ja ngwanka metre ye rabadi Jesube Gobrane kä kwinbiti käbämikani kwe ietre. ¿Drekäre? Niara ara käkwe niebare: Ne kwe mun rabadre täkäni kürä gobrankäre yete, ye abokän rabadre reire gwairebe Jesube (Lucas 22:28, 30).

•   Gobran Ngöbökwe käkwe ni ja mikaka rüere ye gaite (Salmo 2:1, 2, 8, 9; 110:1, 2; 1 Corintios 15:25, 26).

 Metrere, Gobran kä kwinbiti ye tä ni brukwäte ye Biblia ñan driere. Ye abokän, Gobran Ngöbökwe ngwanta ja brukwäte nie ñan raba. Kukwe kwin Gobran Ngöbökwe yebätä ye raba aune rabadre ni brukwä kwite yebrä drieta Bibliakwe (Mateo 13:19; 24:14).

¿Akwa, Gobran Ngöbökwe tä mun teri ye ñan niebare Jesukwe?

 Kukwe tä Lucas 17:21 ye Biblia ruäre tä kwite ne erere: Gobran Ngöbökwe tä mun teri (Biblia Americana San Jerónimo). Ye medenbätä Gobran Ngöbökwe tä ni brukwäte nütüta nitre kwatikwe. Akwa kukwe ne mikakäre gare kwin yekäre dre tä tikani känenkri aune ja känenkäre yebätä nikwe ja tötikadre.

 Kena, Jesukwe kukwe ye niebare nitre fariseo ie. Nitre ye ji ngwanka kukwe ngwarbebätä abokän brukwä nämäne kräke aune kukwe ükaninte kwetre mürie ketakäre (Mateo 12:14; Lucas 17:20). ¿Nitre käme ye nämene Gobran Ngöbökwe ngwen ja brukwäte gäräbare kwe? Ñakare. Niara ara käkwe niebare nitre ye ie: “Munta ja bä mike ni moto kuin kwrere ni mda mda okwäte, akwa mun moto amne töi abko te jändrän kämekäme tä munkwe” (Mateo 23:27, 28).

 Dre nie tö namani Lucas 17:21 ye Biblia ruärebätä tä kwitani mrebe aune kwin. El Nuevo Testamento original tä mike gare: Gobran Ngöbökwe nibira mun ken matare aune Traducción del Nuevo Mundo de las Santas Escrituras (con referencias) tä niere: Gobran Ngöbökwe tä mun ngätäite (nota mikadre ñärärä). ¿Ño abokän Gobran kä kwinbiti nämene nitre fariseo ken o ngätäite? Kukwe ne niebare ñobätä ñan aune Jesús nämene niaratre ngätäite, Ngöbökwe niara kädekani gobrankäre yebätä (Lucas 1:32, 33).