Mbwino Obwami bwa Nyamuhanga Buli omo Muthima Wawu?
Ekya Biblia yikasubiraya
Eyihi, Obwami bwa Nyamuhanga si yowa eriri omwa mithima y’Abakristayo. a E Biblia yikakanganaya aho buli yithi “Obwami bw’elhubulha.” (Matayo 4:17) Thalhangira ngoku e Biblia yikabugha yithi ni gavumente eyonyine-nyine eyikathabalira elhubulha.
Obwami bwa Nyamuhanga bunawithe abathabali, abakathabalhawako, ebilhaghiro, n’obuthoki obw’erihanganiaho erisonda lya Nyamuhanga omwa lhubulha n’okwa kihugho.—Matayo 6:10; Eribisulirwa 5:10.
Egavumente ya Nyamuhanga, kutse Obwami, bukendi syathabalha okwa “bandu bosi n’ebihanda, n’emibughe” y’ekihugho kyosi. (Danieli 7:13, 14) Obuthoki bwabu sibulilhua okwa bakathabalhawa, aliwe bukalhua oku Nyamuhanga.—Esyonyimbo 2:4-6; Isaya 9:7.
Yesu mwabwira abakwenda biwe abathaleghulha athi banga muyiyungireko omo Bwami bwa Nyamuhanga bw’elhubulha “n’erikalha okwa bithumbi by’Obwami.”—Luka 22:28, 30.
Obwami buwithe esyonzighu, esyo bukendi syathoghothya.—Esyonyimbo 2:1, 2, 8, 9; 110:1, 2; 1 Abanya Korinto 15:25, 26.
E Biblia siyiri kangiriraya yithi Obwami bwe lhubulha buli omwa muthima wawu eribya nga bukathabalha erilhabira omwa muthima w’omundu. Aliwe, yikakanganaya yithi “ekinywe ky’Obwami” kutse “engulhu yuwene y’Obwami” kyangana hamba okwa mithima yethu kandi ku kitholere kithya.—Matayo 13:19; 24:14.
Ebinywe “Obwami bwa Nyamuhanga buli omw’iwe” bikamanyisayaki?
Abandi bandu babirithalha busana n’ebyo syombindulha ndebe sye Biblia sikabugha oko aho Obwami buli erikwamana n’ebiri omu Luka 17:21. Ng’eky’erileberyako, e King James Version yikabugha yithi “obwami bwa Nyamuhanga buli omw’iwe.” Eriyitheghererya erisako lya ndeke, thutholere ithwalebya enzuko y’omwatsi.
Obwami bwa Nyamuhanga si bwabya omwa mithima y’abahakani ba Yesu ababi kandi abithi
Yesu abya akakania n’Abafarisayo, egurupu y’abakulhu b’edini ababya bakamuhakanisya n’erisangira omw’ithegheka erimwitha. (Matayo 12:14; Luka 17:20) Mbwino ikyanabya ky’amenge ibo erilengekania bathi Obwami lyabya iyowa eriri omwa mithima yabu? Yesu mwababwira athi: “Nikwa omw’isi muswire amathebo n’amalholho.”—Matayo 23:27, 28.
Esindi mbindulha sikabugha ndeke-ndeke okwa binywe bya Yesu ebiri omu Luka 17:21 sithi: ‘Obwami bwa Nyamuhanga bune hano nawu.’ (Contemporary English Version) ‘Obwami bwa Nyamuhanga bune omwakathi-kathi kenyu.’ (E Biblia y’Ekinandi eya 1980) Obwami bwa Nyamuhanga bwabya ibune “haghuma” kutse “omwakathi-kathi” k’Abafarisayo, ni bugha ambu, Yesu oyusombwerwe na Nyamuhanga erithabalha ng’Omwami, abya iniane embere syabu.—Luka 1:32, 33.
a Amadini mangyi akakangiriraya athi Obwami bwa Nyamuhanga buli omw’isi sy’omundu, kutse omwa muthima. Ng’eky’erileberyako, omwa United States, ekanisa ndebe y’Ekibbabbutisti muyabugha yithi Obwami bwa Nyamuhanga ni kitsweka ky’okwa “erithabalha lya Nyamuhanga omwa muthima n’omwa ngebe y’obuli mundu.” Kuthya, omwa kitabu kiwe ekya Jesus of Nazareth, Papa Benedict XVI mwabugha athi “Obwami bwa Nyamuhanga bukasa erilhabira omwa muthima w’obwowa.”
You May Also Like
ESSENTIAL BIBLE TEACHINGS
Obwami bwa Nyamuhanga Niki?
Omw’ithulira liwe eryosi, Obwami bwa Nyamuhanga bwa Yesu akangirirayako kwilhaba owundi mwatsi wosi-wosi. Ahabw’ebighonye bingyi, abigha biwe babirisaba bathi Obwami obo bwase.
AKALEBERYO
Omwami w’Obwami bwa Nyamuhanga Nindi?
Abahandiki bangyi be Biblia mubahandika ebikaminyikalhaya oyuwangabere Mwami w’Obwami bwa Nyamuhanga. Omwa bandu bosi abamathabyaho, ni mundu mughuma musa oyuwalhabire omw’ebi.