Pathian Ram Chu Thinlunga Awm A Ni Em?
Bible chhânna
Ni lo, Pathian Ram chu Kristiante thinlung dinhmun mai a ni lo. a Bible chuan chu chu “vân ram” tia sawiin, a awmna hmun dik tak a târ lang a ni. (Matthaia 4:17) Vân aṭanga rorêltu sawrkâr tak tak a nihzia Bible-in a târ lan dân hi lo ngaihtuah ta ila.
Pathian Ram chuan rorêltu te, khua leh tui te, leh dân leh hraite a nei a, Pathian duh zâwng lei leh vâna tih a nih theih nân thuneihna chu a hmang dâwn a ni.—Matthaia 6:10; Thu Puan 5:9, 10.
Pathian sawrkâr, a nih loh leh Lalram chuan leia “mi tin te, hnam tin te leh ṭawng tinte” chungah ro a rêl ang. (Daniela 7:13, 14) A rorêltute chu a khua leh tuite thlan ni lovin, Pathian ngeiin a thlan an ni.—Sâm 2:4-6; Isaia 9:7.
Isua’n a tirhkoh rinawmte hnênah vân ramah ama rualin ‘lalthutphahah an ṭhu’ dâwn tih a hrilh.—Luka 22:28-30.
Chu Lalram chuan hmêlma a nei a, chu chu tihboral a ni ang.—Sâm 2:1, 2, 8, 9; 110:1, 2; 1 Korinth 15:25, 26.
Bible-in vân Ram chu mite an thinlung rorêlsaktu thinlunga thil awm angin a zirtîr lo va. Mahse, “Ram thu,” a nih loh leh “Ram chanchin ṭha” chuan kan thinlungah nghawng a nei theiin, nghawng a nei tûr a ni tih erawh a târ lang a ni.—Matthaia 13:19; 24:14.
“Pathian Lalram chu nangmahni chhûnga awm a ni” tih chuan eng awmzia nge a neih?
Mi ṭhenkhatin Luka 17:21 Bible ṭhenkhatin a lehlin dân avângin Lalram awmna hmun chungchângah buaina an nei a. Entîr nân, Mizo King James Bible chuan “Pathian Lalram chu nangmahni chhûnga awm a ni,” tiin a sawi a. He châng hi dik taka hre thiam tûr chuan a chung a hnuai thute kan ngaihtuah tûr a ni.
Pathian Ram chu Isua tihhlum tumtu mi luhlulte thinlunga awm a ni lo
Hetah hian Isua chuan Pharisai amah dodâltu leh tihlum tûra ruahmanna siamtu sakhaw hruaitu ṭhenkhat a bia a ni. (Matthaia 12:14; Luka 17:20) Lalram chu an thinlung sual tak chhûnga awm anga ngaih chu thil inâwm a ni ang em? Isua’n anni chu: “In chhûng lamah erawh chuan vervêkna leh sualnain in khat si a,” tiin a hrilh a ni.—Matthaia 23:27, 28.
Luka 17:21-a Isua thusawi chu ṭawng lehlin dangte chuan dik leh fiah takin heti hian an letling a ni: “Pathian ram chu in hnênah a awm.” (Hawrawp âwn hi kan tihâwn a ni; Contemporary English Version) “Pathian ram chu in zîngah a awm.” (O.V. Re-edited) Vân Ram chu Pharisaite “hnênah,” a nih loh leh “zîngah” a awm tia Isua’n a sawi hian, Pathianin Lal tûra a ruat chu an hmaah a ding tih a sawina a ni.—Luka 1:32, 33.
a Kristian kohhran tam takin Pathian Ram chu mihring chhûng, a nih loh leh mihring thinlunga awm angin an zirtîr a. Entîr nân, United States rama, Southern Baptist Convention chuan Pathian Ram chu “mi mal nun leh thinlunga Pathian rorêlna” tiin a sawi a. Chutiang bawk chuan, a lehkhabu Jesus of Nazareth-ah, Pope Benedict XVI-na chuan, “Pathian Ram chu mihring thinlunga awm a ni,” tiin a târ lang a ni.
You May Also Like
ESSENTIAL BIBLE TEACHINGS
Pathian Ram Chu Eng Nge Ni?
Isua chuan rawng a bâwl chhûngin, thil dang zawng aiin Pathian Ram chanchin a zirtîr nasa ber a. Mite chuan kum zabi tam tak chhûng chu, chu Ram lo thleng tûrin an ṭawngṭai tawh a ni.
VENNAINSANG
Pathian Rama Lal Chu Tu Nge Ni?
Pathianin Bible ziaktu engemaw zât chu Pathian Rama Lal tûr kan hriat theih nâna min ṭanpuitu thute chhinchhiah tûrin thlarauvin a thâwk khum a. Mihring chanchin tluanchhuakah, chumi nêna inmil awm chhun mi pakhat chauh a awm.
BIBLE ZIRTIRNATE
Bible Sawihona Neih Dîlna
Mi pakhat nên a thlâwna phûrawm taka Bible sawihona nei rawh.