¿Atzpe taʼ Tkawbʼil Dios toj kyanmi xjal?
Aju in tzaj ttzaqʼweʼn Tyol Dios
Aju Tkawbʼil Dios, nya atz taʼ toj kyanmi okslal. a In tzaj tqʼamaʼn Tyol Dios qa aju kawbʼil lu atz taʼ «toj kyaʼj» (Mateo 4:17, Xjan Tuʼjil). Ax ikx in tzaj tyekʼin Tyol Dios qa jun gobierno jlu ex ya in kawin toj kyaʼj. Qo xnaqʼtzan tiʼj.
Ateʼ aj kawil toj Tkawbʼil Dios, ateʼ xjal tjaqʼ tkawbʼil, ateʼ ley toj, ax ikx at toklen tuʼn tbʼant tajbʼil Dios tuʼn toj kyaʼj ex twitz Txʼotxʼ (Mateo 6:10; Apocalipsis 5:10).
Kkawil Tkawbʼil Dios «kyuj kykyaqil nasyon» ex kyibʼaj «kykyaqil xjal junxitlchaq kyyol» twitz tkyaqil Txʼotxʼ (Daniel 7:13, 14). Nya aqe xjal ma che jaw jyonte aj kawil toj kawbʼil lu, sino a Dios ma jaw jyonte ex ma txi tqʼoʼn toklen tuʼn tkawin kyibʼaj xjal (Salmo 2:4-6; Isaías 9:7).
Xi tqʼamaʼn Jesús kye t-apóstol qa ax ikx kye che tel tukʼil toj Tkawbʼil Dios, aju at toj kyaʼj. ¿Tiquʼn? Tqʼama Jesús jlu: «Che bʼel qeʼye tuj qʼuqbʼil tuʼn kykawine» (Lucas 22:28, 30).
Ok che kbʼel najsaʼn qe aj qʼoj tuʼn Tkawbʼil Dios (Salmo 2:1, 2, 8, 9; 110:1, 2; 1 Corintios 15:25, 26).
Ik tzeʼn in nel qnikʼ tiʼj, mintiʼ in tzaj t-xnaqʼtzan Tyol Dios qa atz taʼ moqa atz in kawin Tkawbʼil Dios toj kyanmi xjal. Noqtzun tuʼnj, in tzaj t-xnaqʼtzaʼn Tyol Dios qa aju «tqanil bʼaʼn lu tiʼj tkawbʼil Dios» jaku tzʼonin tiʼj qanmi (Mateo 13:19; 24:14).
¿Pero nyapetzun tqʼama Jesús qa aju Tkawbʼil Dios «at toj kyanmin nimil»?
Ateʼ junjun Tyol Dios in kubʼ kyqʼoʼn yol ateʼ toj Lucas 17:21 ik tzeʼn jlu: «Ajo Tkawbʼil qMan Dios luʼ noql at toj kyanmin nimil» (Akʼaj Tuʼjil Tyol Qman). Tuʼntzunju ateʼ xjal in kubʼ kyximen qa atz taʼ Tkawbʼil Dios toj kyanmi xjal. Pero tuʼn tel qnikʼ tiʼj versículo lu, il tiʼj tuʼn qximen kyiʼj yol at kyoklen tukʼil texto lu.
Nya atztoq taʼ Tkawbʼil Dios toj kyanmi qeju kyajbʼiltoq tuʼn tkubʼ kybʼyoʼn Jesús.
Atz xi tqʼamaʼn Jesús yol lu kye fariseo, aju jun kʼloj okslal ikʼun twitz Jesús kyuʼn ex kyajbʼiltoq tuʼn tkubʼ kybʼyoʼn (Mateo 12:14; Lucas 17:20). ¿Tqʼamape Jesús qa atztoq taʼ Tkawbʼil Dios toj kyanmi qeju nya bʼaʼn xjal lu? Nya ik ttenju. Tuʼnju xi tqʼamaʼn jlu kye: «Tuj kyanmiye nojni tuʼn xmletzʼil ex tuʼn mya bʼaʼn» (Mateo 23:27, 28).
Atzun junjuntl Tyol Dios tzʼaqli in kubʼ kyqʼoʼn yol ateʼ toj Lucas 17:21. In tzaj tqʼamaʼn Aju Xjan Tuʼjil Tyol Dios jlu: «Porke aju tkawbʼil Dios ya at kyxole». Ax ikx in tzaj tqʼamaʼn Xjan Tuʼjil jlu: «Quʼn atitlteʼ tkawbʼil Dyos kxoleʼ». Attoq Tkawbʼil Dios kyxol fariseo, tuʼnju attoq Jesús kyxol toj ambʼil aju, aju aj kawil skʼoʼn maj tuʼn Dios tuʼn tkawin toj Tkawbʼil (Lucas 1:32, 33).
a Ateʼ nim iglesia in tzaj kyxnaqʼtzaʼn qa atz tkuʼx Tkawbʼil Dios toj kyanmi xjal. Jun techel, aju Convención de Bautistas del Sur, jun okslabʼil protestante nim toklen toj Estados Unidos, tzaj tqʼamaʼn qa «aju Tkawbʼil Dios atz taʼ toj kyanmi xjal ex qa in naqʼunan toj kyanqʼibʼil». Ex tqʼama papa Benedicto jlu toj tuʼj Jesús de Nazaret: «In tzaj Tkawbʼil Dios toj qanmi qa bʼaʼn qo bʼin. Atzun bʼe jlu te».
Bʼalo ax ikx tgana jlu
QE XNAQʼTZBʼIL NIM KYOKLEN TOJ TYOL DIOS
¿Tiʼ aju Tkawbʼil Dios?
Tej tten Jesús twitz Txʼotxʼ, mas yolin tiʼj Tkawbʼil Dios toj tpakbʼabʼil. Toj nimku ambʼil, o txi kyqanin xjal toj kynaʼj Dios tuʼn tul Tkawbʼil Dios.
AJU XQʼUQIL
¿Alkye aj Kawil toj Tkawbʼil Dios?
Nim xjal e onin tuʼn tkubʼ tzʼibʼit junjun tqanil toj Xjan Uʼj, aʼyeju in che onin tuʼn tel qnikʼ tiʼj alkye kʼokel te aj Kawil toj Tkawbʼil Dios. Oʼkx tiʼj Jesús in japun bʼaj tkyaqil yol lu.
QE XNAQʼTZBʼIL TOJ TYOL DIOS
Qaninxa jun t-xnaqʼtzbʼila tiʼj Biblia
Kʼamonxa jun t-xnaqʼtzbʼila tiʼj Tyol Dios noq kukx tukʼil jun testigo de Jehová.