Uvie Osolobrugwẹ ọ ha Uvuẹn Ọmuduo?
Ẹkpahenrhọ i Baibol na
Ẹjo, Uvie Osolobrugwẹ rhẹ iroro rọ ha uvuẹn ọmudu Ilele Kristi-i. * Baibol na o dje ekete rọ havwọ phia ọke ro seyi “uvie idjuwu na.” (Matthew 4:17, King James Version) Baibol na o tare taghene Uvie na ono suon nẹ obẹ odjuwu rhe.
Uvie Osolobrugwẹ o vwo ere suien, ihworho ro suẹn, ọrhẹ irhi rọ nọ lẹrhiẹ ha Uvie na mwu obẹ odjuwu ọrhẹ uvuẹn otọrakpọ na.—Matthew 6:10; Revelation 5:10.
Uvie Osolobrugwẹ ono suẹn “ihworho, egbamwa ọrhẹ edjadjẹ ephian” ri ha otọrakpọ na. (Daniel 7:13, 14) Osolobrugwẹ yo vwo omẹgbanhon usun na, rhẹ ihworho ri ha obotọre usun ọnẹye-en.—Psalm 2:4-6; Isaiah 9:7.
Jesu ọ ta rẹn inyikọ ye ri fuevwan taghene aye ine lelie “siyẹ aga usun” uvuẹn Uvie ọrẹ idjuwu na.—Luke 22:28, 30.
Uvie na o vwo evwreghrẹn rọ nọ ghwọghọ.—Psalm 2:1, 2, 8, 9; 110:1, 2; 1 Corinthians 15:25, 26.
Baibol na o yono taghene Uvie ọrẹ idjuwu na ọ ha uvuẹn ọmudu ọwa-an. Ọrẹn ọ tare taghene “ẹmro ọrẹ Uvie na,” yanghene “iyẹnrẹn esiri Uvie na,” ọnọ sabu hobọte ọmudu ọwan.—Matthew 13:19; 24:14.
Me yẹ ẹmro na “uvie Osolobrugwẹ ọ ha uvuẹn ọmuduo” o mevirhọ?
Ẹhẹn ihworho ezẹko i taghare kpahen ekete Uvie Osolobrugwẹ ọ havwọ, fọkiẹ oborẹ i Baibol ezẹko i rhian Luke 17:21 lele. Jerẹ udje, Baibol ọrẹ King James Version ọ tare taghene “uvie Osolobrugwẹ ọ ha uvuẹn oma ọwan.” Na sabu vwẹruọ ekete i Baibol ọnana, ene vi ni ẹmro erọrọ uvuẹn oghwẹmro na so.
Uvie Osolobrugwẹ ọ ha uvuẹn ọmudu ihworho ra kparahasuiẹ na-a
JJesu ọ tẹmro rẹn otu i Pharisee na, ri rhiẹ ilori ẹga ra kparahasuiẹ, ra ji djiroro aye ine kpe yi. (Matthew 12:14; Luke 17:20) O ghini dje ọhọ phia aye ine roro taghene Uvie Osolobrugwẹ ọ ha uvuẹn ọmudu aye? Jesu nọ ta rẹn aye: “Irueruo omeru ọrhẹ irhi egbeghwu yọ vuọn oma are.”—Matthew 23:27, 28.
Erhianrhian i Baibol erọrọ i dje ẹmro i Jesu rọ ha uvuẹn Luke 17:21 fiotọre: “Are rhẹ Uvie Osolobrugwẹ yi gba havwiẹ.” (Contemporary English Version) “Uvie Osolobrugwẹ ọ ha uvwre are.” (New World Translation, ekete ra djokarhọ) Uvie ọrẹ idjuwu na ọ “ha uvwre” otu i Pharisee na, nime Jesu ro rhiẹ ohworho Osolobrugwẹ ọ ha mwu no rhiẹ Orodje Uvie na, ọ ha uvwre aye.—Luke 1:32, 33.
[EKETE RA DJOKARHỌ]
^ Udjoghwẹmro 1 Ẹga Ilele Kristi sansan e yono taghene Uvie Osolobrugwẹ oborẹ ọ ha uvuẹn ọmudu onyakpọ. Jerẹ udje, uvuẹn ẹkwotọre i United States, Southern Baptist Convention nọ tare taghene Uvie Osolobrugwẹ o “suẹn uvuẹn ọmudu owuowọnwan.” Habaye, Pope Benedict XVI rọ ya ọbe na Jesus of Nazareth, ọ tare taghene “Uvie Osolobrugwẹ ọnọ rhiọ orhianẹ a ha ọmudu ọwan tẹnrovie.”
You May Also Like
ESSENTIAL BIBLE TEACHINGS
Me Yẹ Uvie Osolobrugwẹ?
Uvuẹn owian aghwoghwo ọnẹyen, Uvie Osolobrugwẹ yẹ oborẹ i Jesu ọ mai ta kpahen ọke ro yono ihworho. O jiri ne rẹ idibo yi a nẹrhomo nẹ Uvie ọrana ọ rhe.
