Diospa Gobiernonqa mana sonqonchejpichu kashan. a Bibliaqa sut’ita willawanchej maypichus chay Gobierno kashasqanta, chayrayku nin “cielopi kaj Gobiernoqa”, nispa (Mateo 4:​17). Chantapis Biblia nillantaj, chay Gobierno cielomantapacha kamachimushasqantaña. Imaynachus chay kasqanmanta parlarina.

•   Diospa Gobiernonpeqa tiyan kamachejkuna, yanapajkuna, leyes ima. Chantapis chay Gobiernoqa Diospa munaynin cielopiwan jallpʼapiwan juntʼakunanpaj churasqa kashan (Mateo 6:​10; Apocalipsis 5:​10).

•   Diospa Gobiernonqa ‘tukuy nacionesmanta kaj runasta, tukuy parlaymanta kaj runasta ima’ kamachenqa (Daniel 7:​13, 14). Chay Gobiernotaqa mana runaschu ajllanku, manaqa Dios ajllan. Paymantaj atiyta qon kay jallpʼapi runasta kamachinanpaj (Salmo 2:​4-6; Isaías 9:7).

•   Jesusqa cheqa sonqo apostolesninman nerqa, paywan khuska cielopi Diospa Gobiernonpi kanankuta. ¿Imatá chaypi ruwankuman karqa? Jesusllataj nerqa: “Kamachina tiyanaspitaj tiyaykukunkichej”, nispa (Lucas 22:28, 30).

•   Diospa Gobiernonqa enemigosninta chinkachenqa (Salmo 2:​1, 2, 8, 9; 110:​1, 2; 1 Corintios 15:25, 26).

 Rikunchej jina, Bibliaqa mana ninchu Diospa Gobiernon sonqonchejmantapacha kamachinanta. Chayrayku Diospa Gobiernonqa mana sonqonchejpichu kashan. Astawanpis Biblia niwanchej, ‘Diospa Gobiernonmanta sumaj willaykuna’ chayri ‘Diospa Gobiernonmanta willay’ sonqonchejman chayajtin cambiachiyta atiwasqanchejta (Mateo 13:19; 24:14).

¿Imaraykutaj Jesús nerqa “Diospa reinonqa qankuna ukhupiña kashan” nispa?

 Waj Bibliaspi Lucas 17:21 versículo nin: “Diospa reinonqa qankuna ukhupiña kashan”, nispa (Qheshwa Biblia). Chayrayku runas yuyanku Diospa Gobiernonqa sonqonchejpi kashasqanta. Jinapis Lucas 17:21 versiculota entiendenapajqa, ñaupaj versiculosninta leerina.

 Jesusqa chayta nerqa fariseosman. Paykunaqa judiospa religionninkuta ñaupajman apajkuna karqanku. Jesustataj mayta chejnikoj kanku, wañuchinankupajpis yachachinakorqanku (Mateo 12:14; Lucas 17:20). Jesusqa mana ninmanchu karqa chay sajra runaspa sonqonkupi Diospa Gobiernon kashasqanta. Imaraykuchus payllataj nerqa: “Ukhuykichejtaj puraj uya kaywan, sajra ruwaykunawan juntʼa kashan”, nispa (Mateo 23:27, 28).

 Lucas 17:21 versículo imatachus niyta munasqanta waj Biblias sutʼita willawanchej. Mosoj Testamento (1956) nin: “Diospa gobiernonka kancuna uqhupimin cashan”, nispa. Mosoj jallpʼapi kausajkunapaj Diospa Palabran Bibliataj nin: “Diospa Gobiernonqa chaupiykichejpi kashan”, nispa. ¿Imaraykutaj Jesús fariseosman nerqa, Diospa Gobiernonqa “chaupiykichejpi kashan” chayri “kancuna uqhupimin cashan” nispa? Imaraykuchus Jesús kikin paykunawan kasharqa. Jesustaqa Dios ajllarqaña Rey kananpaj (Lucas 1:​32, 33).