¿Mi tey ta koʼontontik li Ajvalilal yuʼun Diose?

CHICHʼ TIJEL TA

Li kʼusi chal Vivliae

Li Ajvalilal yuʼun Diose maʼuk naka noʼox te oy ta yoʼonton li yajtsʼaklomtak Kristoe. a Li Vivliae jamal chal bu oy, yuʼun xi chalbe skʼoplale: «Li Ajvalilal ta vinajele» (Mateo 4:17). Chakʼ ta ilel xtok ti jaʼ jun Ajvalilal ta melele xchiʼuk ti te tspas mantal ta vinajele. Jkʼeltik batel.

Li ta Ajvalilal yuʼun Diose oy ajvaliletik yuʼun, oy buchʼutik tsventainan oy mantaletik yuʼun xchiʼuk chkʼot ta pasel yuʼun li kʼusi oy ta yoʼonton Dios ta vinajel jech kʼuchaʼal ta balumile (Mateo 6:10; Apokalipsis 5:10).
Li Ajvalilal yuʼun Diose jaʼ tsventain «li jteklumetike, li mukʼtik lumetike xchiʼuk li buchʼutik jeltos skʼopike» (Daniel 7:13, 14). Maʼuk laj yichʼ tʼujel yuʼun krixchanoetik li Ajvalil taje, yuʼun jaʼ tʼujat yuʼun li Diose, xchiʼuk jaʼ akʼbat yabtel yuʼun yoʼ sventain li krixchanoetike (Salmo 2:4-6; Isaias 9:7).
Li Jesuse laj yalbe li tukʼil yajtakboltak ti te chchiʼinat li ta Ajvalilal ta vinajele. ¿Kʼusi sventa? Xi laj yal stuke: «Sventa [...] chachotiik li ta chotlebal sventa ajvalil». Jaʼ xkaltik, ti koʼol ch-ajvalilajik xchiʼuke (Lukas 22:28, 30).
Li Ajvalilal yuʼun Diose tslajes skotol li yajkontratake (Salmo 2:1, 2, 8, 9; 110:1, 2; 1 Korintios 15:25, 26).

Li Vivliae muʼyuk chchanubtasvan ti tey tspas mantal ta koʼontontik li Ajvalilal ta vinajele. Jaʼ xkaltik, ti maʼuk ta koʼontontik oy li Ajvalilal yuʼun Diose. Li kʼusi chchanubtasutik li Vivliae jaʼ ti akʼo stij koʼontontik li «lekil aʼyejetik ta sventa li Ajvalilale» o «skʼoplal li Ajvalilale» (Mateo 13:19; 24:14).

¿Kʼusi skʼan xal ti te oy ta atojolalik li Ajvalilal yuʼun Dios xie?

Ta skoj ti kʼu yelan chchapbeik smelolal junantik li kʼusi laj yal Jesus ta Lukas 17:21, junantik krixchanoetike mu snaʼik lek bu oy li Ajvalilale. Jaʼ yuʼun, oy buchʼutik chalik ti te oy ta yoʼonton krixchanoetik li Ajvalilal yuʼun Dios ti laj yalbe skʼoplal Jesuse. Pe sventa xkaʼibetik lek smelolale jkʼelbetik li stsʼak tekstoe.

Mu onoʼox xuʼ te oy ta yoʼontonik li Ajvalilal yuʼun Dios li viniketik ti tskʼan ox tsmilik li Jesuse

Li Jesuse jaʼ yakal chalbe li fariseoetik taje, li jtsop jnitvanejetik ta relijion ti skontrainojik tajek li Jesuse xchiʼuk ti tskʼan tsmilike (Mateo 12:14; Lukas 17:20). ¿Mi jaʼ la skʼan laj yal Jesus ti te oy ta yoʼontonik li Ajvalilal yuʼun Dios li chopol viniketik taje? Moʼoj, yuʼun xi laj yalanbee: «Li avoʼontonike noj ta loʼlavanej xchiʼuk ta spasel choplejal» (Mateo 23:27, 28).

Li yan Vivliaetike chakʼik ta aʼiel ta melel li kʼusi skʼan xal li Lukas 17:21. Li Xchʼul Cʼop Jtotic Dios xi chale: «Yuʼun li ventainel yuʼun Diose liʼ xa oy ta atojolic». Xi chal xtok li Xchʼul Kʼop Dios sventa Achʼ Balumil: «Yuʼun liʼ oy ta oʼlol avuʼunik li Ajvalilal yuʼun Diose». ¿Kʼusi skʼan xal ti te oy ta stojolik o ta oʼlol yuʼunik li Ajvalilal yuʼun Dios li fariseoetike? Jaʼ skʼan xal ti te oy ta stojolalik li Jesuse ti jaʼ tʼujbil yuʼun Dios sventa x-och ta Ajvalile (Lukas 1:32, 33).

a Epal krixchanoetike chchanubtasvanik ti te la oy ta yut yoʼontonik li Ajvalilal yuʼun Diose. Jech kʼuchaʼal li Convención de Bautistas del Sur xi laj yalbe skʼoplal li Ajvalilal yuʼun Diose: «Li Ajvalilal yuʼun Diose te oy ta yoʼonton xchiʼuk ta xkuxlejal li jun krixchanoe». Li ta slivro slokʼesojik ti Jesús de Nazaret sbie xi laj yal li papa Benedicto XVI: «Li Ajvalilal yuʼun Diose jaʼ te chkʼot ta yoʼonton li buchʼu chchʼun mantale».