ʼE Nofo Koa Te Puleʼaga ʼo Te ʼAtua ʼi Tou Loto?
Te tali ’i te Tohi-Tapu
Kailoa. Ko te Puleʼaga ʼo te ʼAtua ʼe mole ko he aluʼaga ʼi te loto ʼo te tagata. a ʼE mole ʼi te loto ʼo te ʼu Kilisitiano. ʼE fakaha ʼi te Tohi-Tapu te nofo’aga ʼo te Puleʼaga ʼo te ʼAtua ʼi tana ui ʼae “te Puleʼaga ʼo selo.” (Mateo 4:17, Bible du roi Jacques) ʼE ina fakaha ko he Puleʼaga moʼoni ʼe takitaki mai te lagi.
Ko te Puleʼaga ʼo te ʼAtua ʼe ʼi ai ʼana takitaki, tana haha’i fakalogo, ʼana lao pea mo tana fakatu’utu’u: Ko te tokaga ke fai te finegalo ʼo te ʼAtua ʼi te kele ohage ko selo.—Mateo 6:10; Apokalipesi 5:10.
Ko te Puleʼaga ʼo te ʼAtua ʼe ina takitaki anai “te hahaʼi ʼo te ʼu puleʼaga mo te ʼu lea kehekehe” ʼo te kele. (Taniela 7:13, 14) Ne’e mole fakanofo ia ia e te hahaʼi fakalogo ke pule, kae ko te ʼAtua totonu.—Pesalemo 2:4-6; Esaia 9:7.
Ne’e ui fenei e Sesu ki ’ana apositolo agatonu ’e natou ’afio anai mo ia ’i tona Pule’aga ’ae ’i selo pea ’e natou “heheka ’i he ’u heka’aga fakahau.”—Luka 22:28, 30.
’E ’i ai te ’u fili ’o te Pule’aga pea ’e ina pulihi anai natou.—Pesalemo 2:1, 2, 8, 9; 110:1, 2; 1 Kolonito 15:25, 26.
ʼE mole ako’i mai ʼi te Tohi-Tapu ʼe ko te Puleʼaga ʼo selo ʼe afio ʼi te loto ʼo he tahi. Kae ʼe ina fakamahino mai ʼe ko te “logo ʼo te Puleʼaga” pe’e ko te ‘logo lelei ʼo te Puleʼaga,’ e tonu ke malave ʼi ʼotatou loto.—Mateo 13:19; 24:14.
Kotea te fakaʼuhiga “ko te Puleʼaga ʼo te ʼAtua ʼe nofo ia koutou”?
Ko ʼihi hahaʼi ʼe faigataʼa tanatou mahino ki te nofo’aga ʼo te Puleʼaga ʼo te ʼAtua ʼuhi ko te ʼu faʼahiga fakaliliu ʼo te vaega ʼo Luka 17:21 ʼi te tahi atu ʼu Tohi-Tapu. Ohage la, ko te Tohi-Tapu Bible du roi Jacques ʼe ina fakaliliu fenei te vaega “ko te Puleʼaga ʼo te ʼAtua ʼe nofo ia koutou.” Kapau ʼe tou fia mahino ki te fakaʼuhiga totonu ʼo te vaega, ʼe tonu ke tou vakaʼi te ʼu vaega ʼo te ʼu kapite ʼae ʼe tu’u ki mu’a atu peʼe hoa mai.
Neʼe palalau ia Sesu ki te kau Faliseo, neʼe ko te kutuga takitaki lotu ʼe fakafeagai kia te ia pea ʼe natou felogoi fakalogologo ke matehi ia ia. (Mateo 12:14; Luka17:20) ʼE fakapotopoto koa te manatu ʼae ko te Puleʼaga neʼe nofo ʼi ʼonatou loto fefeka? Neʼe ui age e Sesu kia natou: “ʼI loto ʼe kotou fonu ʼi te malualoi pea mo te manuki ki te lao.”—Mateo 23:27, 28.
Ko te tahi ʼu fakaliliu ʼe natou fakamahino te ʼuhiga totonu ʼo te ʼu palalau ʼa Sesu ʼae ʼe tou ma’u ia Luka 17:21: “Ko te Puleʼaga ʼo te ʼAtua ʼe nofo mo koutou.” (C’est nous qui soulignons, Contemporary English Version) “Ko te Puleʼaga ʼo te ʼAtua ʼe ʼi te lotolotoiga ʼo koutou.” (Fakaliliu ’o te malama fo’ou) Ko te Puleʼaga ʼo selo ne’e “nofo” mo te kau Faliseo peʼe ne’e ʼi te “lotolotoiga” ia natou he ko Sesu, ʼae ne’e fili e te ʼAtua ke Hau ʼi te Puleʼaga, ne’e tu’u ia mu’a ʼo natou.—Luka 1:32, 33.
a ʼE lahi te ʼu lotu Fakakilisitiano ʼe natou ui ʼe nofo te Puleʼaga ʼo te ʼAtua ʼi te loto ʼo te tagata. Ohage la ʼi Amelika, neʼe ui e te lotu Baptiste ʼo te potu saute, ko te Puleʼaga ʼo te ʼAtua ʼe “ko te ʼafio ʼa te ʼAtua ʼi te loto pea mo te maʼuli ʼo te tagata.” ʼE toe feia pe mo te Tuʼi Tapu ko Benoît XVI, neʼe ina ui ʼi tana tohi Jésus de Nazareth (Sesu Mai Nasaleti) “ʼe haʼu ia te Puleʼaga ʼo te ʼAtua mai te loto ʼo he tahi ʼe fia logo.”