Itech tonal 14, metstli septiembre, xiuitl 2013, kanaj 10,500 tlaltikpaktlakamej omonechikojkej pampa otlanki Tlamachtil 135 ika Biblia tlen kichiua Watchtower itech Galaad itech altepetl Patterson (Nueva York). Nin tlamachtil kinpaleuia iTlaixpantijkauan Jehová akinmej kuali tetlapouiaj pampa okachi kuali ma kichiuakan inteki.

Guy Pierce, akin poui itech Cuerpo Gobernante tlen kipiaj iTlaixpantijkauan Jehová okiyekanki nin nechikol, opejki tlajtoa itech tlen kijtoa Mateo 28:19, 20, nin tlaxelol kijtoa: “Axa, xiwiah iwa xikinmachtikah nochteh n tlaltikpaktlakah para mamochiwakah notlamachtijkawah [...]. Xikinmachtikah makiyektlakitakah nochi tlan yonomechnawati”.

Tokni Pierce okijto tlen okijto Jesús okipeualti se tekitl tlen hasta itech ninmej tonalmej mochijtok. Akinmej kichiuaj ken Cristo, kinmiluiaj tlen uelis kichiuaskej akinmej kinmachtiaj pampa kitlakamatiskej tlen okijto Jesús. Ken kitlakamatiskej tlanauatil pampa tetlapouiskej “nin kualitlájtoli” itech iTekiuajkayo toTajtsin Dios (Mateo 24:14). Ijkon akinmej tikinmachtiaj, uelis noijki tetlapouiskej uan tlamachtiskej itech Tekiuajkayotl. ¿Ken tlapaleuia nin tlamachtil? Tokni Pierce okijto: “Tlaltikpaktlakamej okachi momiaktiliaj, non kichiua noijki ma momiaktilikan okachi iTlaixpantijkauan Jehová”.

“Okachi okichijkej.” Thomas Cheiky, akin poui itech akinmej tlayekanaj itech Betel itech Estados Unidos, okipanolti se tlapoualistli tlen kisa itech 2 Corintios 8:1-4. Maski amo miak tlamantli okipiayaj, tlanechikolmej tlen okatkaj itech altepetl Macedonia itech achto siglo, okinekiayaj kitemakaskej seki tomin pampa kinpaleuiskej inmikniuan tlen okatkaj itech altepetl Jerusalén. Akinmej omomachtijkej itech Galaad noijki kitemakaj ika nochi inyolo.

Kuali tikmatij akinmej okichiuayaj ken Cristo itech altepetl Macedonia, tlen otlapaleuijkej, amo keman okinkajkej inkalchanejkauan itlaj ma kinpolo uan okitekichiuilijkej toTajtsin Dios. Tokni Cheiky okimilui akinmej okiselijkej nin tlamachtil ma kichiuakan ken macedonios uan ma kitakan ken tlapaleuiskej.

“Otlanki tlamachtil.” Okse tokni Samuel Herd, akin poui itech Cuerpo Gobernante tlen kipiaj iTlaixpantijkauan Jehová, okimilui tleka moneki kilnamikiskej nochi tlen omomachtijkej itech Galaad. Okimilui ijkon ken se tlatsotsonalistli uelis tikilnamiktoskej nochi tonal, tlen omomachtijkej itech Galaad uelis kilnamiktoskej uan kinpaleuis itech nochi inyolilis.

Tokni Herd noijki okinmilnamikti Jehová nochi ueli kilnamiki. ToTajtsin Dios okintokayoti sapanoa miak sitlalimej itech nochi semanauak, uan nion se amo keman kilkaua (Salmo 147:4). Ik non, Jehová amo keman kilkauas ken omochijchikajkej akinmej omomachtijkej. Kuali kilnamiktok nochi tlen okichijkej ika miak tlasojtlalistli, uan amo ikaj uelis kichiuas ma kilkaua Jehová tlen kipia itech ikuayejyekol (Mateo 6:20).

ToTajtsin Jehová nochipa kilnamiktos tekitl tlen okichijkej uan ken kitlasojtlaj, uan ninmej tokniuan noijki moneki kilnamiktoskej tlen omomachtijkej itech Galaad. Tokni Herd okijto: “Ijkuak nankilnamikiskej nochi tlen onankichijkej ijkuak onanmomachtijkej namechpaleuis. Nochipa xiktlasojkamatilikan Jehová. Amo keman xikilkauakan tlamantli tlen kuali, pampa tlateochiualismej amo keman nankilkauaskej.”

“Nankipiaskej ichikaualis Jehová.” Sam Roberson, akin noijki tekiti itech Tlamachtilmej pampa akinmej kichiuaj ken Cristo, okimilui ijkuak kipiaskej se ouijkayotl ma tlaneltokakan itech ichikaualis Jehová. Itech Efesios 3:20 kijtoa toTajtsin Dios “akin kipia miak weletílistli para kichiwas okachi miak de tlan tejwah tiktlajtlani noso tiknejnewiliah por iweletilis non tekiti totech”. Ichikaualis sapanoa ueyi, ik non, amo uelis tikajsikamatiskej. Maski tikijtoskej “kipia miak weletílistli para kichiwas okachi miak de tlan tejwah tiktlajtlani” ichikaualis okachi miak tlamantli ueli kichiua.

Jehová kinmaka ichikaualis akinmej kichiuaj ken Cristo. Ijkuak tikpiaj ouijkayotl ye techpaleuia (Jeremías 20:11). Tokni Roberson okinmilnamikti akinmej omomachtijkej Jehová nochipa kinpaleuis ijkuak kipiaskej ouijkayotl.

“Xikpatioitakan tekitl itech Tekiuajkayotl.” Tokni William Samuelson, akin tlamachtia itech Galaad, okinyekilui akinmej omomachtijkej tekitl itech Tekiuajkayotl kinpaleuia itech ome tlamantli. Achto, okinpaleui pampa ma kiteititikan yejuan yolkualmej ijkuak ayamo omomachtiayaj uan ijkuak omomachtijtokaj. Uan okse tlamantli, pampa yejuan kipaleuiaj Tekiuajkayotl itech nochi semanauak, ik non, kichiua ma kintlakaitakan.

¿Ken uelis kichiuaskej nochipa ma kintlakaitakan? Tokni Samuelson okimilui ma kiueyichiuakan toTajtsin Jehová uan ma kintlakaitakan tlaltikpaktlakamej, ijkon ken okichi Jesús akinmej inauak okatkaj, uan maski okinnojnotski nochipa okintlakaitak. ¿Ken otlapaleui nin? Ijkon ken tlatitlanil Pablo okiueyichi tekitl tlen okichi uan amo okinek ye ma kiueyichiuakan, ijkon moneki kichiuaskej akinmej omomachtijkej (Romanos 11:13).

“Inweletilis nonteh kabayojteh okatka itech inkamak.” Tokni Michael Burnett, akin noijki tlamachtia itech Galaad, okijto mochiua tlen kijtoa Apocalipsis 19:9 ijkuak tikchiuaj tlen timomachtiaj itech tonechikoluan pampa titetlapouiskej ika chikaualistli. Okiteititi seki neskayomej tlen okinpanok akinmej omomachtijtokaj itech Galaad ijkuak otetlapouiayaj. Se tokni tlen omomachtijtoka okitlajtlani se tlakatl tlen tekiti kanin kinemakaj gasolina: “¿Keman opejki uan otlanki ‘kichijtokeh n tlakah non amo judíojteh’?” (Lucas 21:24). Satepan ijkuak omokuepki, tokni okipaleui tlakatl pampa kajsis itlanankilis, okitekitilti itech Biblia itech Daniel tlakotonal 4, noijki okitekitilti amochtli ¿Tlen melauak tlamachtia Biblia? itech okseki tlamachtilmej.

“Okachi onanmoyolchijkajkej.” Adrián Fernández, akin poui itech akinmej tlayekanaj itech Betel itech Estados Unidos, okichiuili seki tlajtlanilmej naui tokniuan tlen yomonamiktijkej. Tokni Helge Schumi, okijto itech Biblia tlajtoa itech seki tlaltikpaktlakamej tlen sapanoa omoueyinekiayaj ijkuak okiselijkej se tekitl tlen miak ipati, miak ipati akinmej omomachtijkej itech Galaad amo ijkon ma kichiuakan (2 Crónicas 26:16). Noijki, tokni Peter Canning, okinmilnamikti tlen okinmiluijkej itech tlamachtil pampa momachtiskej se yankuik tlajtoli: “Amo ximoueyinekikan, xikselikan maski itlaj tepinati ma namechpano”. Naui tokniuan tlen okinchiuilijkej tlajtlanilmej okitlasojkamatkej nin tlamachtil tlen okiselijkej uan ken okinpaleui pampa okinyolchika kichiuaskej tekitl ika miak chikaualistli uan ika inyolo chikauak (Hebreos 13:9).

“Xipakikah porke nomotokah ya ijkuilitok ilwikak.” (Lucas 10:20.) Tokni Geoffrey Jackson, akin poui itech Cuerpo Gobernante tlen kipiaj iTlaixpantijkauan Jehová, okipanolti se tlapoualistli tlen miak ipati. Okijto yikipia seki xiuitl sekimej tlen okiselijkej nin tlamachtil amo okiselijkej se tekitl tlen sapanoa kuajkualtsin noso okinpanok itlaj tlen sapanoa kualtsin ijkuak otetlapouijkej kanin ayamo ikaj tetlapouia. ¿Ken moneki nankitaskej?

Ijkuak 70 imachtijkauan Jesús okintitlanki ma tetlapouikan uan ijkuak omokuepkej, ika miak pakilistli okijtoayaj tlen okichijkej ika itoka Jesús (Lucas 10:1, 17). Jesús okimatiaya tlen okimachiliayaj intech inyolo, uan okimilui: “Pero amo xipakikah porke nomechtlakitah n espíritus amokualteh, yej xipakikah porke nomotokah ya ijkuilitok ilwikak” (Lucas 10:20). Jesús okiteititi amo nochipa kuali yetoskej itech tekitl tlen kichiuaj. Amo omonekiaya kitaskej tekitl tlen kichiuaj, okachi kuali, omonekiaya yetoskej yolmelajkej inauak Jehová pampa intoka ma “ijkuilitok ilwikak”.

Tokni Jackson okijto: “Tlen Jesús okimilui 70 imachtijkauan noijki techpaleuia”. Amo ma timokuayejyekokan tekitl tlen kuali kisa itech tetlapouilistli non kichiua ma tiyolpakikan nion pampa tiyetoskej yolmelajkej. Melauak tiyolpakiskej uan tiyetoskej tiyolmelajkej tla kuali timouikaj iuan Jehová uan tla timochijchikauaj pampa tiktekichiuiliskej ika miak pakilistli.

Jesús noijki okixnamik seki tlamantli tlen uelis kichiuaskia ayakmo ma yolpaki. Se neskayotl, ijkuak okichij se milagro uan miakej okintlamakak, tlaltikpaktlakamej okitokakej (Juan 6:10-14, 22-24). Okse, ijkuak okikakej tlen otlamachtiaya Jesús, miakej amo okinpakti uan okikajkej, ik non, sapanoa miakej okikajkej (Juan 6:48-56, 60, 61, 66). Pero itlatitlaniluan Jesús amo okikajkej. Amo omotekipachojkej itech tlamantli tlen opanok, yejuan omochijchikajkej pampa yetoskej yolmelajkej uan kuali mouikaskej iuan toTajtsin Dios (Juan 6:67-69).

Ken otlanki. Akinmej omomachtijkej okinselijkej diplomas, satepan se tokni akin okiseli nin tlamachtil okitlajtolti se amatlajkuilol pampa nochtin akinmej omomachtijkej ika motlasojkamatij. Tokni Pierce okijto tlaltikpaktlakamej amo kintlakaitaj akinmej kitekichiuiliaj toTajtsin Dios, uan noijki akinmej omomachtijkej itech Galaad (Hechos 4:13; 1 Corintios 1:27-31). Jehová kiselia nochi tlen tikchiuaj uan techmaka iespíritu santo. Uelis Jehová amo kitlajtlachialtia nochi tlen tikmatij, pero ken okijto tokni Pierce: “Kitlajtlachialtia ijkuak tiyolmelajkej, ijkuak amo tikauaj uan tikueyichiuaj”.