Kilhtamaku 14 xla septiembre kata 2013, max 10,500 kilakgolh kʼgraduación xla clase 135 xla Escuela Bíblica de Galaad de la Watchtower, nema tatlawalh niku kamasiyanikan xtatayananin Jehová, anta kPatterson (Nueva York). Uma escuela kamakgtaya xtatayananin Jehová tiku lhuwata kata skujnanimakgo Dios xlakata tlakg tlan naskujnanikgo.

Guy Pierce, kgolotsin tiku makgpulalin xtatayananin Jehová, wa tiku matsukilh tamakxtumit. Limatsukilh Mateo 28:19, 20, nema wan: «Kapitit, [...] kamasiyunikgotit xlipaks akgmakgat chixkuwin, [...] namasiyunikgoyayatit mpi natlawakgoy xlipaks yuma ntu kkalimapakgsinitan».

Tala Pierce wa pi umakgolh xtachuwin Jesús lu makgtayanalh chu asta la uku chuntiyaku makgtayanama. Kstalaninanin Cristo kamasiyanikgo xlimapakgsin Jesús tiku kamakgalhtawakgekgo, nema na kilhchanima natalichuwinan «xalakwan xalaksasti tamakatsin xla xtamapakgsin Dios» (Mateo 24:14, TNM). Chuna, xasasti kstalaninanin na lichuwinankgo Dios chu masiyakgo xlakata Tamapakgsin. Chuna la wa Pierce, uma tlawanit pi chuna la talhuwitilhamakgo latamanin xlikalanka katiyatni, xkachikin Dios na talhuwitilhama.

«Tlakg mastakgolh ni xawa tuku tlan xmastakgo.» Thomas Cheiky, chatum tiku makgtapakgsi kComité de Sucursal xalak Estados Unidos, mastalh uma taʼakgchuwin nema takilhtinit 2 Corintios 8:1-4. Maski nitu xkgalhikgo, congregaciones xalak Macedonia xalak pulana siglo tasaskinkgolh pi xkamaxkika talakaskin xmastakgolh xpalakata xnatalankan xalak Jerusalén tiku nitu xkgalhikgo. Tiku kilakgolh kʼGalaad nachuna lhuwa tuku mastakgonit chu wi tuku limakgxtakgkgonit.

Wa xlakata, liwana kilikatsitkan pi kstalaninanin Cristo xalak Macedonia, maski lhuwa tuku mastakgolh, chuntiya kakuentajtlawakgolh xfamiliajkan chu ni makgxtakgkgolh la kskujnanikgo Dios. Tiku mastalh taʼakgchuwin kawanilh tiku kilakgolh kʼescuela pi nachuna xtlawakgolh la xalak Macedonia.

«Sputli escuela.» Chatum kgolotsin tiku makgpulalin xtatayananin Jehová, tala Samuel Herd, kawanilh tiku kilakgolh kʼescuela pi xlakapastakkgolh tuku titaxtukgolh kʼEscuela de Galaad. Wa pi chuna la akgtum lu stlan tatlakgni tlan tantaku nalakapastakaw, tuku tlan titaxtukgolh kʼescuela tlan xlakapastakkgolh chu xkamakgtayalh kputum xlatamatkan.

Tala Herd na wa pi xtalakapastakna Jehová ni tatsama. Dios kawilininit xtukuwanikan lhuwa billones staku nema wilakgolh talhman chu nipara akgtum patsankga (Salmo 147:4). Wa xlakata, xla na ni katipatsankgalh la xlilhuwa skujkgolh tiku kilakgolh kʼescuela. Jehová lu lakstlan tuku makinit xlakata xchatunukan, chu niti katikgalhalh uma lu laklanka xtapalh nema tamakinit kʼakgapun (Mateo 6:20).

Tiku xʼakgchuwinama wa pi komo Dios makinit kxtalakapastakna putum tuku tlawakgolh tiku kilakgolh kʼescuela, chu nachuna tapaxkit nema limasiyakgolh, xlakan na tlan nalakapastakkgo putum tuku tlawakgolh kʼGalaad. Tala Herd kawanilh tiku kilakgolh kʼGalaad: «Akxni tuku lu tlan titaxtutit kʼuma escuela nakamakgapaxuwayan, kalakapastaktit pi wa Jehová tiku kamaxkin chu kapaxtikatsinitit. Chuntiya kalakapastaktit tuku tlan titaxtutit, xlakata nakgalhiyatit lhuwa tasikulunalin».

«Kgalhiyatit lanka xlitliwakga Jehová.» Sam Roberson, chatum tiku kamakgalhtawakgalh kʼescuela, kawanilh tiku kilakgolh kʼGalaad pi akxni xkgalhikgolh akgtum taʼakglhuwit xlipawankgolh xlitliwakga Jehová chu ni xlitliwakgakan. Anta kʼEfesios 3:20 wa pi Dios «namalakastuka xlipaks nkatuwa ntu maski tlakg laktlanka ni xawa wa ntu skinaw, su akgatakgsaw, wa xpalakata litliwakga ntu nkinkamaxkiyan». Akinin nila akgatekgsaw la xlilhuwa kgalhi Jehová tuku tlan nakinkalimakgtayayan. Chu ni akchan tachuwin akxni wanaw pi Jehová «tlakg laktlanka» xliputum tuku akinin lakpuwanaw, xlakata versículo wan pi Jehová tlakg lhuwa tuku tlawa.

Jehová wan pi nakamaxki xalanka xlitliwakga putum kskujnin. Akxni tawila taʼakglhuwit xla litaxtu la «tiku kgalhi lanka litliwakga», o «chatum soldado tiku lu pekuanikan» (Jeremías 20:11; El libro del Pueblo de Dios). Tiku xʼakgchuwinama kawanilh tiku kilakgolh kʼescuela pi Jehová nakamakgtaya xlakata natayanikgo putum taʼakglhuwit nema nakgalhikgo.

«Chuntiya tlan kakaʼakxilhkantit kxtaskujut Tamapakgsin.» Achatum tiku kamakgalhtawakgalh, William Samuelson, wa pi tlawakan xtaskujut Tamapakgsin pulaktiy la kamaxkinit kakni tiku kilakgolh kʼGalaad. Pulana, kamaxkinit talakaskin nalimasiyakgo pi tlan likatsikgo akxni nina xʼankgo kcurso chu akxni anta xwilakgolh. Chu nachuna kamaxki kakni, xlakata palakachuwinankgo tamapakgsin nema tlakg xlakaskinka xliputum kakilhtamaku, xTamapakgsin Dios.

¿La tlan ni namakgatsankgakgo uma kakni? Tala Samuelson kawanilh pi xmalankikgolh Jehová chu xkamaxkikgolh kakni amakgapitsin. Jesús tlan kalikatsinilh amakgapitsi, asta akxni kastakyawalh o kawanilh pi nitlan tuku xtlawamakgolh. Nachuna, apóstol Pablo malankilh xtaskujut chu ni lakpuwa pi wa namalankikan (Romanos 11:13). Nachuna, komo tiku kilakgolh kʼGalaad chuna natlawakgo tlan nakamaxkikan kakni.

«Xlitliwakga [kawayu], anta liwi kxkilhnikan.» Michael Burnett, achatum makgalhtawakgana xalak Galaad masiyalh pi akxni limaklakaskinaw tuku katsiniw ktamakxtumit xlakata lakatanks nalichuwinanaw Dios makgtayananaw xlakata nakgantaxtu tuku wan Apocalipsis, o Revelación, 9:19. Alistalh, titaxtukgolh makgapitsi tiku kilakgolh kʼGalaad nema wankgolh o limasiyakgolh la kakitaxtunilh kcurso akxni xlichuwinankgo Dios. Akgtum liʼakxilhtit, chatum kgalhskilh tiku kskujma kʼgasolinera: «¿Tukuya kilhtamaku tsukulh chu sputli «kilhtamaku nema lilhkawilikanit laklanka kachikinin?» (Lucas 21:24, TNM). Akxni lakgampa uma chixku, makgtayalh xlakata xtekgsli xtakgalhtin chu maklakaskilh libro xla Daniel capítulo 4 chu xtatakgatsin libro ¿Tuku xlikana masiyay Biblia?

«Kamaxkinitan litliwakga kminakujkan.» Achatum tiku makgtapakgsi kComité de Sucursal xalak Estados Unidos, wanikan Adrián Fernández, kakgalhskilh akgtiy tamakgaxtokgat tiku kilakgolh kʼGalaad. Tala Helge Schumi wa pi komo kBiblia talichuwinan kskujnin Dios tiku tlanka kamakgkatsika akxni wi tuku kalakgayawalh Dios, lu tlan pi kʼGalaad malakapastaknankan natataktujukan (2 Crónicas 26:16). Tala Peter Canning na watiya lichuwinalh chu wa tuku tlan kitaxtu akxni katsinikan atanu tachuwin: «Ni tlanka kakamakgkatsikantit; nitu kapuwantit maski natamamaxaniyatit». Kgalhtati tiku kakgalhskinka wankgolh pi lu paxtikatsinikgo xlakata putum tuku xkatsinikgonit kʼescuela: kamaxkilh litliwakga xlakata tlan natlawakgo xtaskujutkan chu kamatliwakglhnilh xnakujkan (Hebreos 13:9).

«Nkalipaxuwatit mpi wa mintukuwinikan, anta ntatsokgnit nkʼakgapun.» (Lucas 10:20.) Geoffrey Jackson, kgolotsin tiku makgpulalin xtatayananin Jehová, wa lichuwinalh tlakg xlakaskinka taʼakgchuwin xla uma programa. Xla wa pi nina makgas, atsinu ni putum tiku ankgo kʼGalaad ni kalakgayawakan niku lu tlan tuku natitaxtukgo chu ni kamalakgachakan niku niti lichuwinan Dios. ¿La milimakgkatsitkan?

Akxni masputukgolh xtaskujutkan 70 kstalaninanin nema kamalakgachalh Jesús, lu lipaxuw wankgolh pi xkamaxtukgonit demonios kxtukuwani Jesús (Lucas 10:1, 17). Maski Jesús na paxuwalh, kawanilh: «Ni wa ntilipaxuwayatit yuma, mpi kalakgachixkuwikgoyan ni xatlan spiritu; wampi wata wa nkalipaxuwatit mpi wa mintukuwinikan, anta ntatsokgnit nkʼakgapun» (Lucas 10:20). Chuna liwana masiyalh pi ni putum kilhtamaku tlan xʼama kakitaxtuni kstalaninanin. Wa xlakata, ni wa xliʼakxilhatkan tuku tlan nakakitaxtuni, wata ni namakgatsankgananikgo Jehová xlakata xtukuwanikan “natatsokga kʼakgapun”.

Tala Jackson wa: «Tuku Jesús kawanilh 70 kstalaninanin akinin na lu kinkamakgtayayan». Ni nalakpuwanaw pi chuna la nakinkakitaxtuniyan akxni lichuwinanaw Dios wa tuku nakinkamakgapaxuwayan chu ni wa litasiya pi ni makgatsankgananiyaw Dios. Komo tlan natalalinaw Jehová chu nalakputsayaw tlakg naskujniyaw, xlikana napaxuwayaw chu Jehová naʼakxilha pi ni makgatsankgananiyaw.

Jesús na titaxtulh tuku max xmaxlajwanilh. Akgtum liʼakxilhtit, akxni kamawilh akglhuwa mil latamanin tsukukgolh stalanikgo (Juan 6:10-14, 22-24). Pero, akxni kgaxmatkgolh akgtum xtamasiy Jesús, lhuwa lisitsikgolh chu makgxtakgkgolh. Wa xlakata sputli tapaxuwan akxni lhuwa tiku kstalanimakgo makgxtakgkgolh (Juan 6:48-56, 60, 61, 66). Maski chuna, xʼapóstoles ni makgatsankgananikgolh chu ni makgxtakgkgolh Jesús. Xlakan ni wa lu xlakaskinka akxilhkgolh tuku tlan kitaxtulh, wata xlakaskinka akxilhkgolh ni namakgatsankgananikgo chu tlan natalalinkgo Jehová (Juan 6:67-69).

Lisputli. Akxni mastaka diplomas, chatum tiku kilalh kʼescuela likgalhtawakgalh maktum carta niku xpaxtikatsinikgo putum xalak escuela. Tala Pierce wa pi kakilhtamaku ni kapaxkikgo xlakskujnin Dios chu na anta makgtanumakgo tiku kilakgolh kʼGalaad (Hechos 4:13; 1 Corintios 1:27-31). Pero, Jehová makgamakglhtinan xlakata tamakamastaninitaw chu kinkamaxkiyan espíritu santo. Max ni kaks lilakawan xlakata tamakamastaninitaw, pero, chuna la wa tala Pierce, «lakgati xlakata ni makgxtakgaw, ni makgatsankgananiyaw chu xlakata kaj wa kakninaniyaw».