Rwatte, kadi bed Baibul pe obedo buk me cayan, ento lok me cayan ducu ma kicoyo iye tye kakare. Nen kong labol mogo ma nyuto ni lok me cayan ki me Baibul rwatte, ki dok ni ngec mogo me cayan ma kicoyo i Baibul onongo dok pat ki tam pa dano ma gukwo i kare ma kicoyo lok meno.

•   Polo ki lobo gitye ki acakkigi. (Acakki 1:1) Ki tungcel, jo mapol me kare macon onongo giwaco ni pe kicweyo polo ki lobo acweya, ento gucakke ki i kom gin mo ma onongo dong tye con. Jo Babilon giwaco ni lubange ma gunywalo polo ki lobo gua ki i nam aryo. Onongo kiboko bene con ni polo ki lobo gua ki i tong gin mo madit adada.

•   Cik ma Lubanga oketo con aye doro jami ma timme i polo ki lobo ducu ento pe lubange mukene mapat. (Yubu 38:33; Jeremia 33:25) Kipwonyo i but lobe mapatpat ni lubange mogo gimiyo cik ni dano myero gutim gin mo me nongo cwakgi, ento lacen dok gitwero loko wigi woko ci gipwodo dano marac adada.

•   Pe kingabo lobo i kom gin mo. (Yubu 26:7) Jo mapol ma gukwo i kare macon onongo giwaco ni lobo opette apeta dok ni ocung i wi obibi mo nyo lee mogo calo jubi nyo opuk.

•   Ka pii ma i nam mogo madongo oduny malo, ci cwer calo kot nyo pee dok pii meno aye pongo kulu ki wang it. (Yubu 36:27, 28; Latitlok 1:7; Icaya 55:10; Amoc 9:6) Lugrik me kare macon onongo gitamo ni pii ma a ki i nam ma i te ngom aye pongo kulu, dok tam man omedde wa i cencwari me 18.

•   Godi ma wanenogi i kare-ni onongo gitye i te nam. (Jabuli 104:​6, 8) Ki tungcel, jo mogo onongo giboko ni lubange mogo mapatpat aye gucweyo godi ma gitye i kare-ni.

•   Gwoko lengo weko wabedo ki yotkom. Cik ma kimiyo ki rok me Icrael onongo waco ni myero gulwok cinggi ka gugudo kom ngat muto, gupok jo ma tye ki two ma kobo wek gubed pat, ki dong guyik cet wa ka mabor. (Lulevi 11:28; 13:​1-5; Nwoyo Cik 23:13) Ki tungcel, i kare ma kimiyo cik man, onongo Luejipt girubo cet ki jami mogo ci giketo i wang bur.

 Ka wakwano Baibul maber, ci wanongo ni lagamme tye ni pe. Nen kong tam mogo ma pe tye atir ma oweko jo mukene giwaco ni lok me cayan ma kicoyo i Baibul pe tye kakare:

 Tam ma pe tye atir ni: Baibul waco ni kicweyo polo ki lobo pi nino abicel ma nongo nino acel acel tye ki cawa 24 keken.

 Lok ada: Ma lubbe ki gin ma Baibul waco, Lubanga ocako cweyo polo ki lobo wacon dok ninone kikome pe kitito. (Acakki 1:1) Dong, nino acel acel ma kiloko i kome i Acakki cura  1 pe onongo tero cawa 24 keken ento kare malac ma pe kinyuto. Ki lok ada, kilwongo bene kare ma Lubanga ocweyo iye polo ki lobo nicakke i acakkine me o i agikki ni “nino” acel.​—Acakki 2:4.

 Tam ma pe tye atir ni: Baibul waco ni kicweyo yadi, lum ki ginapita ka dong kicweyo ceng i ngeye wek ceng omi kero ki ginapita magi me yubo camgi.​—Acakki 1:​11, 16.

 Lok ada: Baibul nyuto ni kicweyo ceng ma bene tye i kin lakalatwer ma i dan ‘polo-ni’ ma peya kicweyo yadi, lum ki dong ginapita. (Acakki 1:1) Dero ma a ki i ceng ocako o i wi lobo i “nino” me acel me cwec. Ma colpiny woto ki rweny, i nino me adek-ke me cwec, onongo dero dong tye muromo ma romo miyo kero ki ginapita me yubo camgi. (Acakki 1:​3-5, 12, 13) Kong otero kare mo wek ceng ocak nen maber i wi lobo.​—Acakki 1:​16.

 Tam ma pe tye atir ni: Baibul waco ni ceng bedo ka wirre rumo lobo.

 Lok ada: Latitlok 1:5 waco ni: “Ceng tuc ci poto, ka dok lokke oyotoyot, dok ka ma en otuc ki iye.” Kadi bed kumeno, lok man onongo nyuto kit ma kitwero neno kwede ceng ka kitye i lobo. Kadi wa i kare-ni dano pud gitwero tic ki nyig lok ni “ceng tuc” ki ‘ceng poto’ kadi bed gingeyo ni lobo aye wirre rumo ceng.

 Tam ma pe tye atir ni: Baibul waco ni lobo opette apeta.

 Lok ada: Baibul otiyo ki lok ni “agikki lobo” me lok i kom lobe ma tye ka mabor loyo; man pe tyen lokke ni lobo opette apeta nyo ni agikkine tye. (Tic pa Lukwena 1:8) I yo acel-lu, kitiyo ki nyig lok ni “twok lobo angwen ducu” ka kitye ka lok i kom wi lobo lung; i kare-ni bene ngat moni twero wacci tung kumalo, kupiny, kunyango ki dong kupoto ceng ka tye ka lok i kom wi lobo ducu.​—Icaya 11:12; Luka 13:29.