Imbo, Refo ima syap farkarkor faro fawawi dunya risya ḇa, mboi dap roi ḇekur ḇe fawawi sismai ro dunya ine ido nasrow kaku. Mam roi riḇeso nane ḇefasnai fawawi ḇero dunya ine isrow kuker rosai Refo ikofen na. Oso wer ido, snonggaku ḇekenem ro fafisu sfas Refo ro fyor iwara, roi sikyar na iḇese kaku kuker roi ḇekaku Refo ikofen nane.

•   Farsyos sansoren ine nya randak. (Kejadian 1:1) Fama, fawar ḇekaku ḇa ḇebor na soḇe supswan farsyos komam ine naisya ro manggundi. Soḇe randak ya ryama ro roi ḇenapnap kaker, mura fyadwer ḇe roi ḇekain pyum radine. Kawasa Babilonia sikyar roi sor ḇe dewa-dewi ḇekapar supswan farsyos ine sramaker soren ḇeba ri suru. Fawar sinan ḇepon siwara kako soḇe supswan farsyos ine ryama ro pnor ḇebamantar.

•   Ras nakam, farsyos sansoren ine fyararur pyum kukro roi sor ḇe hukum alam ḇepyum na. Inja, ryama ro dewa sya marisen sne sena ḇa. (Ayub 38:33; Yeremia 33:25) Fawar ḇekaku ḇa ḇeraker supswan ine ḇesiper soḇe snonggaku koine kokara ḇepon ḇa ḇo dewa-dewi sine sifarfnak ko ma sifrur pyum ko ḇaḇeri ido, kopok ḇa mura koso monda roi sifrur yoḇ ko.

•   Supswan ine kyaf ro moḇ ḇebei. (Ayub 26:7) Snonggaku ḇebor ḇero fyor iwara sikyar supswan ine imnis ra rosaser ḇepyom ma ḇeyufepen na iso snonggaku ḇebamantar ḇaido aiwan, raris kerbau ḇaido waw.

•   Warḇeki ma warbukor ryamuma ro war ḇero soren ma moḇ ḇese ḇo ikḇai muryase, mura isapi kaḇer ḇe supswan ine ḇe mekem, salju, ḇaido es. (Ayub 36:27, 28; Pengkhotbah 1:7; Yesaya 55:10; Amos 9:6) Snonggaku Yunani ḇekwar siwara skara warḇeki ima ryamuma ro soren ḇeba ḇero saprop dori, ma sikyar roi nane kaker isof ro abad ḇe 18 ya.

•   Bam ḇaido bon na nsasyar ma nambrur, ma bam komam ro baboine naisya ro soren ya dori kwar. (Mazmur 104:6, 8) Fama, fawar ḇekaku ḇa sia soḇe dewa sya sifrur ḇeri bam raris komam ro moḇ isnai ro baboine raya.

•   Saranden kyadaunwarek ko fa koprei. Ro Sasoser Manseren Allah byuk faro er Israel sya, sismai parenta fa span ro snonggaku ḇemar sya baken sena kwar ido, sban sansun sena, ḇesmai dafduf ḇepampam skain ro moḇ ḇesisye, ma skapui famfnom awer. (Imamat 11:28; 13:1-5; Ulangan 23:13) Fama, ro fafisu anya kako, snonggaku Masir sya siḇyaren kapui sena kuker roi ono ḇo soḇe ima aryawin ḇo srir na ro par sena.

 Smam pyum kaku roi Refo ikofen na kwar, mboi kankarem ya iso nakam nasrow. Roi riḇeso sia soḇe Refo ya nasrow ḇa kuker fawawi dunya ḇero fafisu ine raris:

 Roi ḇekaku ḇa: Refo ya doḇe Sinan ḇeba ifrur farsyos sansoren ine ro swaf oras ri 24 kali wonem.

 Roi ḇekaku: Raris fasfas ro Refo ya, Manseren Allah ifrur farsyos sansoren ine ro awar madero, mboi kofawi mnis swaf ḇyena ḇa. (Kejadian 1:1) Oso wer ido, swaf Manseren Allah ifrur supswan ma roi ḇero dori nakam raris sfawar ro Kejadian fasal oser anya ima swaf ḇekwan, fama sap na ḇa. Isyadi wer, swaf Sinan ifrur farsyos ma supswan ine, Refo dap na ḇe swaf ”ras” oser.​—Kejadian 2:4.

 Roi ḇekaku ḇa: Komam kada, ori iso ḇefrur fa rokaker na nasur pyum raris roi sor ḇe fotosintesis, fama Refo ya doḇe Sinan ifrur rokaker na fafisu ori isya ḇaim.—Kejadian 1:​11, 16.

 Roi ḇekaku: Refo ya fyasnai kaku snar mak oso ro ”farsyos”, ima Sinan ifrur na fafisu ifrur rokaker na ḇaime. (Kejadian 1:1) Sananai kermgun ro ori isnai fawas supswan ine ro ”ras” ḇaido swaf ḇerandak na. Fafisu farsyos iyaswa isnai syadi wer ro ”ras” eḇe kyor ya, sananai ya isrow kuf kwar fa nasnai rokaker na fa nasur pyum. (Kejadian 1:3-5, 12, 13) Nari ḇarpur mura insape sananai ro ori ya isnai bos kaku.​​—Kejadian 1:​16.

 Roi ḇekaku ḇa: Refo ya doḇe ori iso ḇeyaryar supswan ine.

 Roi ḇekaku: Pengkhotbah 1:5 doḇe, ”Ori ya dek, ori ya isyun, mura isamamberen fa kyaḇer wer ḇe moḇ nari dek ro ya.” Imbape, wos ine ḇyeḇair monda mamam koḇena fafisu koḇarek ro supswan ine ḇo komam ori moḇ imbran raya. Fama ro baboine kako, kofawi supswan ine iso ḇeyaryar ori ya ḇesyaḇo kokofen ker ḇo koḇe ”ori dek” ma ”ori syun”.

 Roi ḇekaku ḇa: Refo ya doḇe supswan ine ipyom monda.

 Roi ḇekaku: Refo ya ikofenḇair snai roi nane kuker dap wos ”supswan pember ya” fa byukiḇair bar ḇeḇinggwan kaku ro supswan ine. Fama, roi ine ḇyeḇair ḇa supswan ine ipyom oroḇaido nya pum. (Farfyar 1:8; 13:47) Rupa radiri, wos ”supswan pember ri fyak” ima apap sbukifasnai supswan ine bori kam. Baboine kako kawasa sya sap monda bar wambarek, wamurem, wambrur, ma wamires fa sbukifasnai supswan ine kam.​—Yesaya 11:12; Lukas 13:29.

 Roi ḇekaku ḇa: Refo ya doḇe yaryar oser ima diameter rarwan ri kyor, mboi ḇekaku ya iso sekali na kuker pi (π), ḇaido rya karkor ya 3, 1416.

 Roi ḇekaku: ”Soren kansai” ḇero 1 Raja 7:23 ma 2 Tawarikh 4:2 nya diameter hasta ri samfur ma sfandun kabrai hasta ri samfur ri kyor fa iyaryar na. Baba ine rya ḇefanam monda. Diameter sap ine imbude kyur kako faro diameter baba ro bokor na, mboi yaryar sap nanema kyur faro bar bandum monda.