Ue sesuai. Amin gia Pustaka si Badia labo buku ilmu pengetahuan, tapi tepat kerina si ikatakenna kerna ilmu pengetahuan. Perdiateken piga-piga contoh si mbuktiken maka ilmu pengetahuan e sesuai ras Pustaka si Badia. Janah perdiateken ka maka keterangen Pustaka si Badia kerna ilmu pengetahuan e benar, amin pe sanga keterangen e itulis, la seri ras pendapat jelma si enterem.

•   Alam semesta lit perban iciptaken. (Kejadin 1:1) Tapi melala cerita kuno si njelasken maka alam semesta enda labo iciptaken, tapi terbentuk arah kai si la teratur janah alu manjar-anjar jadi teratur. Kalak Babilon tek maka alam semesta ilahirken dewa-dewi si rehna arah dua samudra nari. Cerita si deban ngataken maka alam semesta lit arah telur si seh kel galangna.

•   Lit hukum alam si ngatur alam semesta tiap wari janah e la tergantung senang ntah lang sangana ukur dewa-dewa. (Jop 38:33; Jeremia 33:25) Tapi cerita si la tuhu arah belang-belang doni, ngajarken maka la lit kengasupen manusia ngelawan dewa-dewa si perbahanenna la terduga janah mon-mon kejam.

•   Doni enda la lit si natangsa. (Jop 26:7) Tapi, mbarenda enterem kalak si tek maka bentuk doni enda bagi piringen si rata janah si natangsa eme raksasa ntah pe binatang, bagi kerbo ntah kura-kura.

•   Lau si lit bas samudra ras si debanna menguap, jenari nusur ku doni jadi udan, salju, ntah pe udan es, kenca si e maler ka jadi sungai ras jadi mata lau. (Jop 36:27, 28; Pengerana 1:7; Jesaya 55:10; Amos 9:6) Tapi, mbarenda kalak Junani erpengakap maka sungai rehna arah samudra si lit i teruh taneh, janah e me si iteki kalak e ngayak abad 18.

•   Gunung si lit gundari, situhuna mbarenda enggo lit bas dasar samudra, reh dekahna reh ganjangna piah enggo ndauh ganjangen asangken samudra. (Masmur 104:​6, 8) Tapi, cerita-cerita si la tuhu ngataken maka si nciptaken gunung eme dewa-dewa janah ciptakenna gunung e mis bagi bentuk si gundari.

•   Adi sijaga kebersihen banci kita sehat. Bas Undang-Undang Musa si ibereken man bangsa Israel, lit aturen kerna nuci uis kenca njemak mayat, aturen karantina man kalak si kena penakit menular, ras aturen kerna buang kotoren. (Imamat 11:28; 13:​1-5; Ulangen 23:13) Tapi bas jaman Undang-Undang e ibereken man kalak Israel, kalak Mesir nggunaken campuren kotoren manusia jadi tambar luka.

 Adi sipereksa Pustaka si Badia alu cara si masuk akal, situhuna jawapenna lang. Enda piga-piga contoh kerna ilmu pengetahuan si lit bas Pustaka si Badia si rusur erban kalak salah paham:

 Cerita si la tuhu: Nina Pustaka si Badia alam semesta iciptaken bas enem wari, maksudna enem kali 24 jam.

 Faktana: Menurut Pustaka si Badia, enggo ndekah kel iciptaken Dibata alam semesta enda janah la siteh ndigan pastina. (Kejadin 1:1) Selain si e, wari penciptan si itulis bas Kejadin pasal 1, eme jangka waktu si la ijelasken asa kai dekahna. Malahen kerina jangka waktu penciptan doni ras langit ikataken ka sada “wari.”​—Kejadin 2:4.

 Cerita si la tuhu: Nina Pustaka si Badia, sinuan-sinuan enggo iciptaken lenga pe lit matawari si iperluken guna proses fotosintesis.​—Kejadin 1:11, 16.

 Faktana: Arah Pustaka si Badia banci siteh maka matawari, eme salah sada bintang bas “langit” si leben iciptaken asangken sinuan-sinuan. (Kejadin 1:1) Sitik cahaya ntah pe terang arah matawari mulai seh ku doni bas “wari” pertama masa penciptan. Kenca reh cerahna langit bas “wari” peteluken, enggo bias cahaya guna proses fotosintesis. (Kejadin 1:​3-5, 12, 13) Tapi bas pudi wari me maka matawari teridah jelas arah doni.​—Kejadin 1:​16.

 Cerita si la tuhu: Nina Pustaka si Badia matawari erputar ngelilingi doni.

 Faktana: Nina Pengerana 1:5, “Matawari terbit janah terbenam, jenari meter ia mulihken ku inganna terbit.” Tapi situhuna, kata-kata enda nceritaken pergeraken matawari si teridah arah doni. Gundari pe, sikataken “matawari terbit” ras “matawari terbenam,” amin pe situhuna siteh maka doni nge si erputar ngelilingi matawari.

 Cerita si la tuhu: Nina Pustaka si Badia doni enda rata.

 Faktana: Bas Pustaka si Badia igunaken istilah “ujung doni” guna njelasken bagin si ndauh arah doni, labo maksudna doni enda rata ntah pe lit ujungna. (Perbahanen Rasul-Rasul 1:8) Bage ka pe, istilah “empat ujung doni” iban jadi gambaren si maksudna belang-belang doni. Gundari pe, gunaken kalak ka nge istilah empat mata angin guna nggambarken belang-belang doni.​—Jesaya 11:12; Lukas 13:29.