Yup. Even tho da Bible not one science book, da ting line up wit science. We go spock out some exampos of how da Bible an science, dey stay line up wit each odda an wuz diffren from wat guys wen believe at da time da ting wuz written.

•   Da universe had one start. (Da Start 1:1) Plenny ol stories say dat da universe no wuz created. Da ting jus wen happen by chance. Da Babylonian guys wen believe dat da gods wen come from two oceans an dose gods wen give birth to da universe. Odda stories wen tell da universe wen come from one huge egg.

•   Da universe iz run by natural laws. (Job 38:33; Jeremiah 33:25) But stories tell dat da universe stay run by da gods, an dey da ones dat make stuff happen.

•   Da eart hang wea no moa nottin fo hold um. (Job 26:7) Plenny peopo from befo time dey wen tink dat da eart wuz flat an either one giant o one animal, like one buffalo o one honu, wuz holdin um up.

•   Da sun pull out da watta from da ocean an odda places an put um inside da rain, da snow, an da hail as fresh watta an dat feed da rivas an odda stuff. (Job 36:27, 28; Da Teacha 1:7; Isaiah 55:10; Amos 9:6) Da Greek guys from befo time wen believe dat da watta dat stay inside da rivas wen come from undagroun ocean watta, an dey wen believe dis all da way up to da 18^th century.

•   Da moutains move up an down, an today’s mountains we get, da ting wuz unda watta befo. (Songs Fo God 104:6, 8) Stories say dat da moutains wuz created jus da way dey stay now by da gods.

•   Being clean proteck yoa health. Da law da Israel guys had wen tell dem dat if dey wen touch one mahke guy dey had fo clean up real good. If guys wuz sick dey had fo stay away from erybody else. An afta you go bathroom, how fo get rid of um so dat erybody can be safe. (Da Prieses 11:28; 13:1-5; Da Rules Secon Time 23:13) Da same time da Israel guys had dese laws fo keep dem safe da Egypt guys wuz mixin doo doo wit odda stuff fo heal dea cuts.

 Wen you look at da Bible good, da ansa iz no. We go check out some of da wrong stuff peopo tink about science an da Bible:

 Wat peopo tink: Da Bible say dat da universe wuz made in six 24-hour days.

 Da trut: Da Bible tell dat God wen create da universe befo time. (Da Start 1:1) Da days of creation in chaptah 1 of Da Start, we donno how long da days wuz o wen had start. In fact, da whole time dat da eart an da heavens wuz made, dey call um one “day” too.”—Genesis 2:4 NW.

 Wat peopo tink: Da Bible tell dat da plants wuz made befo da sun wuz dea fo keep dem alive.—Da Start 1:11, 16.

 Da trut: Da Bible tell dat one of da firs tings God wen make wuz da sky. (Da Start 1:1) An cuz da sun stay part of da sky, we know wuz made befo da plants. Light from da sun wen reach da eart’s surface during wat da Bible call da firs “day” of creation. By da third day da light from da sun wuz strong enuff fo make da plants grow (Da Start 1:3-5, 12, 13) Ony layta on could see da sun from da eart.​—Da Start 1:16.

 Wat poepo tink: Da Bible tell dat da sun move aroun da eart.

 Da trut: Teacha 1:5 tell: “Da sun come up an da sun go down one side, an fas come up da odda side!” Dis scripcha ony sayin how da sun look like from da eart. Even today we say da sun rise an da sun set, but we know da eart iz da one movin aroun da sun.

 Wat peopo tink: Da Bible tell dat da eart iz flat.

 Da trut: Da Bible use da words “the ends of the earth”, but dis means “all ova” da eart; dis no mean dat da eart iz flat o get one edge. (Acts 1:8 NW; footnote) Like wen da Bible use da words “the four corners of the earth”, dat not sayin dat da eart get four corners, but dass one way fo say da whole surface of da eart.​—Isaiah 11:12 NW; Luke 13:29 NW.

 Wat peopo tink: Da Bible tell dat da outside of one circle iz exactly three times how wide it iz. But iz actually litto bit moa big, about 3.1416.

 Da trut: Da measuremets fo “da big tank fo watta” at 1 Kings 7:23 an 2 Records 4:2 show dat da ting wuz “fifteen feet from one side to da odda side, an bout 45 feet aroun.” Dese measurements could have been jus da closest whole numbas, o could be dat da thickness of da medal of da watta tank wen make um so da measurements no match up perfeck.