Yes, nomata Bible hem no wanfala science textbuk, olketa samting wea hem storyim hem stret witim science. Bae iumi storyim samfala example wea showim science and Bible agree witim each other. Samfala lo olketa samting hia wea Bible storyim wea stret witim science, hem barava difren from biliv blo pipol lo taem wea olketa raet abaotem datwan.

•   Universe hem garem start. (Genesis 1:1, NW) Bat, staka kastom story bifor sei universe no garem start. Olketa sei firstaem evri samting hem olobaot then gogo hem organize. Pipol lo Babylon bifor bilivim universe hem born lo olketa god wea kam from tufala sea. Olketa nara kastom story sei universe hem kam from wanfala big maeti egg.

•   Disfala universe hem waka bikos lo olketa law blo nature, and no bikos olketa god seknomoa disaed for duim samting. (Job 38:33; Jeremaea 33:25) Olketa kastom story evriwea lo world sei pipol no savve duim eniting for protectim olketa seleva bikos olketa god hia raf tumas and no tingim eniwan.

•   God hem wakem earth and putim lo ples wea no eni samting hem holem. (Job 26:7) Staka pipol lo bifor bilivim earth hem flat and wanfala giant or animal olsem buffalo or turtle nao holem.

•   Wata wea gohed flow insaed olketa river and olketa stream hem kam from wata wea evaporate go ap lo skae from sea and olketa nara samting. Then datfala wata hem foldaon kam bak lo earth olsem rain, snow, and hail. (Job 36:27, 28; Eklesiastes 1:7; Isaiah 55:10, NW; Emos 9:6) Pipol lo Greece bifor tingse wata wea flow insaed lo olketa river hem kam from big pool wata andanit lo graon, and disfala idea pipol gohed garem go kasem samting olsem 300 year go finis.

•   Firstaem olketa maunten wea stap distaem sea hem kavarem. (Sams 104:​6, 8) Bat, samfala kastom story sei olketa god nao wakem olketa maunten.

•   For duim olketa samting for keepim iumi klin datwan savve protectim health blo iumi. Law wea God givim lo nation blo Israel bifor sei for man mas swim and wasim kaleko blo hem bihaen hem tasim dead body, olketa wea garem sik mas quarantine, and eniwan wea toilet mas berem toilet blo hem. (Levitikas 11:28; 13:​1-5; Diutronomi 23:13) Bat lo semtaem wea olketa Israelite kasem olketa law hia, pipol lo Egypt garem wanfala medicine wea olketa mixim toilet blo man insaed wea olketa savve iusim for putim lo wanfala big kat lo body blo man.

 Sapos man tingting gud raonem wanem Bible talem, bae hem luksavve ansa hem no. Bae iumi storyim olketa idea wea no stret wea pipol garem abaotem samfala samting wea Bible storyim wea stret witim science:

 Tingting wea no stret: Bible sei God creatim disfala universe lo sixfala 24-hour day.

 Tru samting: Bible no talem date wea God creatim disfala universe. (Genesis 1:1, NW) Hem no talem tu hao long nao olketa day blo creation wea Genesis chapter 1 storyim, wea each day savve minim staka year. Bible kolem full taem wea God creatim earth and skae, wanfala “day.”​—Genesis 2:4, NW.

 Tingting wea no stret: Bible sei God creatim olketa plant and olketa tree bifor hem wakem sun wea sapotim photosynthesis.​—Genesis 1:​11, 16, NW.

 Tru samting: Bible sei sun, wea hem wanfala lo olketa star wea stap lo “skae,” God wakem firstaem bifor hem wakem olketa plant and olketa tree. (Genesis 1:1) Laet from sun hem kasem earth lo first “day” blo creation. Lo mek-thri “day” blo creation, taem atmosphere hem klia, laet from sun wea sapotim photosynthesis just kasem earth. (Jenesis 1:​3-5, 12, 13) Gogo, bihaen nao olketa lo earth just lukim sun.​—Jenesis 1:​16.

 Tingting wea no stret: Bible sei sun hem go raonem earth.

 Tru samting: Ecclesiastes 1:5 (NW) sei: “Evriday sun kamap lo morning and go daon lo evening. Then hem hariap go lo ples wea bae hem kamap moa lo next day.” Bat disfala scripture storyim hao pipol lo earth lukim sun hem muv. Distaem tu man savve talem “sun kamap” and “sun go daon,” bat still hem savve earth hem go raonem sun.

 Tingting wea no stret: Bible sei earth hem flat.

 Tru samting: Taem Bible storyim “fofala kona blo earth” datwan no minim earth garem fofala kona. Taem iumi readim disfala toktok hem mekem iumi tingim full earth, wea garem olketa area lo north, east, west, and south.​—Isaiah 11:12, NW; Luke 13:29.