Arí, bibliapa nisqanqa tupanmi yachaysapa runakunapa nisqankuwanqa. Qatiqninpim chaymanta astawan yachachkasun.

•   Bibliam nin allpa pachanchik Diospa unanchasqan kasqanta (Genesis 1:1, Chuya Qellqa, CQ). Ñawpaq runakunam ichaqa nirqaku kikillanmanta rikurirusqanta. Babilonia llaqtayuq runakunañataqmi nirqaku lamar quchamanta lluqsimuq iskay taytachanku kay allpa pachanchikta ruwasqankumanta. Wakinñataqmi ninku, kay allpa pachanchikqa hatu-hatun runtumanta rikurisqanta.

•   Bibliam nin Diospa munaynillanpi kay pachapi hinaspa hanaq pachapi tukuy imakunapas maymi kananpi kasqanta (Job 38:33; Jeremias 33:25, CQ). Runakunam ichaqa ninku kikillanmanta imapas kasqanta hinaspa llutanpi imapas pasakusqanta, wakin llaqtayuqkunaqa ninkum pantay dioskuna tukuy imata munaychakusqanta.

•   Bibliam nin kay allpa pachanchikqa “mana imapa hawanpi” kasqanta (Job 26:7, CQ). Ñawpaq runakunam ichaqa nirqaku kay allpa-pachanchikqa huk hatun animalpa hawanpi kasqanta.

•   Bibliam nin mayuqa chaynataq quchaqa parawan kasqanmanta, parañataq lamar-qucha chaynataq mayukuna waspisqanrayku kasqanmanta (Job 36:27, 28; Eclesiastes 1:7; Isaias 55:10; Amos 9:6, CQ). Ñawpaqtam ichaqa griego runakuna nirqaku mayukunaqa lamar quchapa yakunwan kasqanmanta.

•   Biblia nin urqukunaqa yakukuna asllayasqanrayku rikurisqanmanta, chaynataq urqukunaqa huqarikusqanmanta (Salmos 104:6, 8, CQ). Ichaqa runakunam ninku urqukunataqa taytachakuna ruwasqankumanta.

•   Bibliapim Israel runakunata nirqa mana unqurunankupaq imata ruwanankumanta. Diosmi paykunata kamachirqa wañusqa animalta hapiruspankuqa makinkuta mayllakunankupaq, chaymantapas kamachirqam ratakuq unquyniyuq kaqtaqa sapaqchanankupaq. Chaynataq hatun ispayta ispakuspankupas pampanankupaq (Levitico 11:28; 13:1-5; Deuteronomio 23:13, CQ). Chay tiempopi Egipto runakunam ichaqa hatun ispaywan heridankuta hampikuqku.

 Wakin runakunam ninku, bibliapa wakin nisqanqa yachaysapa runakunapa nisqanwan mana tupasqanta, ichaqa sumaqta yachaykusqaqa manam chaynachu. Qatiqninpiyá chaymanta yachaykusun.

 Ninkum: “Bibliaqa ninmi tukuy imata suqta punchawllapi Dios unanchasqanta”, nispa.

 Bibliapa nisqan: Bibliaqa ninmi cielotawan kay allpa pachanchikta Dios qallariyllanpi unanchasqanmanta (Genesis 1:1, CQ). Ichaqa manamá ninchu haykapi unanchasqantaqa, manataqmi ninchu Genesis punta capitulopa punchawkunaqa achikyaymanta tutaykuqkamalla kasqantaqa. Chaymantapas cielokunatawan kay pachata unanchasqan tiempomanta rimaspanmi biblia nin: ‘Chay punchawmi Diosqa unancharqa’, nispa (Genesis 2:4, TNM).

 Ninkum: “Bibliapim nichkan Dios manaraq intita unanchachkaspanqa plantakunata unanchasqanmanta, ¿chayqa imaynataq kanman? Plantakunaqa intillawantaq wiñan”, nispa (Genesis 1:11, 16, CQ).

 Bibliapa nisqan: Bibliam nin manaraq plantakunata unanchachkaspan Diosqa cielokunata unanchasqanmanta. Cielokunata unanchaspanqa Diosqa lucerokunatapas hinaspa intitapas unancharqam (Genesis 1:1, CQ). Chaymi punta kaq punchawpiqa intipa kanchayninqa anta-antallapas allpa pachamanqa chayamurqaña. Kimsa kaq punchawpaqñataqmi aswan allintaña intiqa plantakuna wiñananpaq hinaña chayamurqa (Genesis 1:3-5, 12, 13, CQ). Chaymantañataqmi intiqa suma-sumaqtaña kanchamurqa (Genesis 1:16, CQ).

 Ninkum: “Bibliapim nichkan allpa pachanchikta inti muyurisqanta”, nispa.

 Bibliapa nisqan: Chaynataqa ninku Eclesiastes 1:5 kaynata nisqanraykum: ‘Intim qispimun. Intim siqaykun. Maymi lluqsimusqanmanmi kallpan. Kasqallan qispimunanpaqmi kallpan’, nispa. Kayqa rimachkan manam kay allpa pachanchikta inti muyusqanmantachu, aswanqa ñuqanchikpa ima rikusqallanchikmantam rimachkan, chaymi ninchik: “Intim lluqsimuchkanña, intim siqaykuchkanña”, nispa. Ichaqa yachasqanchikpi hinapas kay allpa pachanchikmi intitaqa muyuchkan.

 Ninkum: “Bibliapim nichkan kay allpa pachanchikqa pampalla kasqanta”, nispa.

 Bibliapa nisqan: Biblia kay pachapa “cantonmanta” rimaspanqa, nichkan manam kay allpa pachanchik patayuq kasqanmantachu, aswanqa rimachkan karullay-karupi tarikuq llaqtakunamantam (Hechos 1:8). Aswanmi bibliaqa Isaias 40:22 nin allpa pachanchikqa “ruyrunpa” kasqanta.