Yes, maski Baibel i no buk bilong saiens, tok bilong en i stret taim em i stori long ol samting bilong saiens. Skelim sampela eksampel i soim olsem tok bilong saiens i wanbel wantaim tok bilong Baibel, na Baibel i kamapim ol samting i pruvim olsem tok bilong saiens i stret na dispela i narakain tru long ol bilip bilong planti man i stap long dispela taim ol i bin raitim Baibel.

•   Yunives i gat kirap bilong en. (Stat 1:1) Tasol planti stori nating bilong bipo i tok God i no wokim yunives, em i kamap long rot bilong ol samting em pastaim ol i stap nabaut nabaut na bihain ol i bung na wok gut wantaim. Ol Babilon i bilip olsem ol god em ol i kamapim yunives ol i kam long tupela bikpela solwara. Ol narapela stori tumbuna i tok yunives i kamap long wanpela traipela kiau.

•   Long olgeta wan wan de i gat ol lo i bosim ol samting long yunives, na ol i no kamap long laik bilong ol god. (Jop 38:33; Jeremaia 33:25) Ol stori nating bilong olgeta hap i skulim ol man olsem ol samting i kamap long laik bilong ol na sampela taim ol i kamap long ol wok nogut bilong ol god.

•   Graun i hangamap nating long emti spes (Jop 26:7) Planti man bilong bipo i bilip olsem graun i bin raun na flet na i sindaun antap long wanpela traipela samting o animal, olsem bafalo o trausel.

•   Ol wara i ron na ol hulwara i kisim wara i kam long wara em san i pulim long ol bikpela solwara na ol narapela samting i go antap long skai na bihain i pundaun gen long graun olsem ren, sno, na ren ais. (Jop 36:27, 28; Eklisiastis 1:7; Aisaia 55:10; Amos 9:6) Ol Grik bilong bipo i ting olsem i gat bikpela solwara i stap aninit long graun na i save givim wara long ol wara i ron, na dispela tingting i stap strong i kam inap long yia 1700 samting.

•   Ol maunten long nau i bin stap aninit long solwara. (Buk Song 104:6, 8) Tasol sampela stori nating i tok ol tait wara bilong ol god i kamapim ol maunten.

•   Pasin bilong mekim ol samting i stap klin i protektim helt. Long Lo God i givim long lain Israel, i gat ol lo tu long ol i mas waswas bihain long ol i tatsim bodi bilong daiman, ol man i gat sik we i save kalap ol i mas kwarantin, na digim graun na haitim pekpek. (Wok Pris 11:28; 13:1-5; Lo 23:13) Tasol wanpela samting em ol Isip i yusim olsem marasin, long dispela taim ol Israel i bin kisim ol dispela lo, ol Isip i save miksim sampela samting wantaim pekpek bilong man na putim long sua.

 Sapos yu skelim gut tok bilong Baibel bai yu lukim olsem bekim em nogat. Hia em sampela tingting kranki long ol tok tru em Baibel i mekim long ol samting bilong saiens:

 Stori nating: Baibel i tok God i wokim yunives insait long 6-pela de i gat 24-aua long en.

 Tok tru: Baibel i tok, God i bin wokim yunives long wanpela haptaim long bipo bipo tru. (Stat 1:1) Na tu, ol de bilong God i wokim ol samting em Buk Stat sapta 1 i stori long en em wanpela haptaim, na Baibel i no kolim longpela bilong dispela haptaim. Na dispela haptaim em God i bin wokim graun na heven, Baibel i kolim tu olsem “de.”—Stat 2:4.

 Stori nating: Baibel i tok God i wokim ol diwai na gras samting paslain long em i wokim san bilong sapotim fotosintesis.—Stat 1:11, 16.

 Tok tru: Baibel i kamapim olsem God i wokim san, em wanpela bilong ol sta we i stap long “ples antap,” paslain long em i wokim ol diwai samting. (Stat 1:1) Ol liklik hap lait bilong san i sut i kam long graun long namba 1 “de,” o dispela haptaim bilong God i wokim ol samting. Taim ples i wok long klia, long namba 3 “de” bilong God i wokim ol samting, lait i strong inap sapotim fotosintesis. (Stat 1:3-5, 12, 13) Tasol bihain lait bilong san i kamap bikpela na ples i stap klia.—Stat 1:16.

 Stori nating: Baibel i tok san i muv i go raunim graun.

 Tok tru: Eklisiastis 1:5 i tok: “San i save kam antap, na san i save go daun; na bihain em i save hariap i go bek long ples em i kamap long en.” Tasol dispela tok i stori tasol long wokabaut bilong san taim man i stap long graun i lukim. Long nau tu, man inap yusim ol dispela tok “san i kam antap” na “san i go daun,” tasol em i save olsem graun i save muv i go raunim san.

 Stori nating: Baibel i tok graun i flet.

 Tok tru: Dispela tok “4-pela kona bilong graun” i no makim olsem graun i gat 4-pela kona. Taim yumi ritim dispela tok yumi save olsem em i makim graun olgeta.—Aisaia 11:12; Luk 13:29.