Jo. Nájkiruka Biblia no libru máeka enga siensieri ambeeka, sési terukuntasïndi imani ambe jingoni engaksï sientifikuecha inbestigarikia. Ju je exeani máru ejempluecha engaksï xarhatajka eska ísïiska ka exeakajtsï eska ambe enga Biblia uandajka, méntku ménderueniska imani ambe jingoni engaksï k’uiripuecha jakajkuenga jiánisï enga Biblia karanhaka.

•   Iámindu ambe enga jaka, jindeesti jimboka kueraanhaska (Génesis 1:1). Joperu uánikua ióntki anapu uandantskuecha, uandasïrendiksï eska no nema kueraaska ambe, sino eska iámu ambe néna uéjki jarhaspkia ka eska sánhani arhispka sési niárani ambe. Babilonia anapuechaksï jakajkusïrendi eskaksï diosicha engaksï úpka unibersuni, tsimani k’érati oseanurhuksï uéraspka. Ka máteru uandantskuecha uandasïrendiksï eska unibersu k’éri ueburhu ma uéraska.

•   Iámindu ambe enga pauani pauani úkuarhijka unibersurhu, úkuarhisïndi jimboka ísï uaxastakata jarhaskia (Job 38:33; Jeremías 33:25). Joperu uápuru parhakpinirhisï jarhastiksï uandantskuecha engaksï uandajka eskaksï diosicha uákajtsïni na uéjki jatinisï no sési úchini.

•   Echeri no ma ambe jimbo tirhipakuarhitixati (Job 26:7). Ióntki anapu k’uiripuechaksï jakajkusïrendi eska Echeri no uirhipitispka sino pareju jándu ka eska k’éri acheeti ma o animali ma p’ínguxapka, komu búfalo ma o tortuga ma.

•   Ima itsï enga maricharhu ka máteru nanisï jaka, suárasïndi ka tátsekua nubecharhu uératini uekorhesïndi komueska janikua, iauakua o xanuata ka ini ambe jimbo méntkisïksï jarhasïndi riuecha ka ima lugaricha nani enga itsï uérajka (Job 36:27, 28; Eclesiastés 1:7; Isaías 55:10; Amós 9:6). Ióntki, Grecia anapuechaksï eratsesïrendi eskaksï riuecha jarhasïrenga jimboka marirhu anapu itsï, echerirhu kétsekisï nirasïrega paraksï riuecha no k’amakurhini. Ka ísïksï jakajkuspti asta uénani jámani uéxurhini 1700.

•   Máru juátechaksï uérasïndi ka máteruechaksï iásï nóteru jarhastia. Juátecha engaksï iásï jaka, ióntki ójchakurakataksï jarhaspti itsï jimbo (Salmo 104:6,8). Joperu máru uandantskuechaksï uandasïndi eskaksï diosicha meru ísï kueraaska juátechani eskaksï iásï na jaka.

•   Konsejuecha para no p’amenchani. Lei enga Tata Diosï íntsaapka Israeli anapuechani arhisïrendi eskaksï jatsispka para jupajkukuarheni engaksï uarhirini ma p’árhepiringa, eskaksï jatsispka para támu jatsiani imeechani engaksï p’amenchakua ma kámapiringa para no kéritpini ka ambe engaksï jatsipka para úni engaksï baniurhu nipiringa (Levítico 11:28; 13:1-5; Deuteronomio 23:13). Joperu Egipto anapuechaksï úrasïrendi kuatsïtani para pomada ambe úni paraksï atarekuarhini jima engaksï atakuarhipiringa.

 Máruksï uandasïndi eska Biblia no terukuntasïnga imani ambe jingoni enga siensia uandajka. Joperu enga ma sési arhintajka Bibliani, kuenta íntskukuarhisïndi ma, eska no ísïiska. Ju je exeni máru ambe enga uandanhajka:

 Chkuanderakua: Biblia uandasïndi eska iámindu ambe enga jaka kueraanhaska seisi jurhiatikua jimbo enga beintikuatru orerika.

 Ambe enga jurhimbitkueka: Biblia no uandasïndi káni meru kueraaski Tata Diosï iámindu ambe (Génesis 1:1). Ístu no uandasïndi na xánksï iónirispi ima jurhiatikuecha enga ima úraapka para kueraani iámindu ambe ísï eska na uandajka Génesis kapitulu 1. Ka iámu imani tiempu enga Tata Diosï úrapka para kueraani echerini ka auandani, Biblia “jurhiatikua” arhisïndi (Génesis 2:4).

 Chkuanderakua: Biblia uandasïndi eskaksï orheta kueraanhaska iámindu plantecha ka tátsekua Jurhiata, joperu enga Jurhiata no japiringa, no úpirindi úkuarhini fotosíntesisi (Génesis 1:11, 16).

 Ambe enga jurhimbitkueka: Biblia uandasïndi eska ante de plantechani kueraani, Tata Diosï orheta “kueraasti auandani”; ka ístu jóskuechani ka Jurhiatani (Génesis 1:1). Primeru “jurhiatikua” o tiempu enga Tata Diosï uénapka kueraani, Jurhiata t’íntskaspti Echerini, joperu no káni sési xarharasïrendi. Terseru “jurhiatikua” jimbo, auanda ambandesptia ka Jurhiata sési t’íntskasptia Echerini paraka úkuarhipiringa fotosíntesisi (Génesis 1:3-5, 12, 13). Tátsekua, Echerirhu uératini úndasptia xarharani Jurhiata (Génesis 1:16).

 Chkuanderakua: Biblia uandasïndi eska Jurhiata uirhipandasïnga Echerini.

 Ambe enga jurhimbitkueka: Eclesiastés 1:5 uandasïndi: “Jurhiata uérasïndi ka jurhiata inchajtsïkusïndi; ka sóntku kʼuanhatsentasïndi jima enga uérajka”. Ini uandakuecha jingoni, Biblia arhikuekaxati ambe engachi jucha exejka Echerirhu uératini, jimbokachi jucha ísï exesïnga enajki Jurhiatasï manakuarhijki. Ka nájkirukachi míteka eska Echerisï uantsïkuarhijka ka no Jurhiata, uánikuechaksï uandasïndi: “Jurhiata uérastia” o “jurhiata inchajtsïkustia”.

 Chkuanderakua: Biblia uandasïndi eska Echeri no uirhipitiska.

 FAmbe enga jurhimbitkueka: Enga Biblia uandajka ‘asta máteru ladurhu anapu Echeri’, arhikuekasïndi ‘asta jima enga sánderu iauanika’ ka no eska Echeri pareju jándu jarhaska o eska jarhaska límite ma nani enga Echeri k’amakurhijka (Hechos 1:8; nota, Traducción del Nuevo Mundo). Isaías 40:22 jimbo, Biblia sési uandasïndi eska Echeri uirhipitiska.