TEPET NA SARAY KABATAAN

Walay Nanggawa o Ebolusyon Labat?—Part 2: Akin et Dapat Labat ya Kuestionen so Ebolusyon?

I-PLAY

Agla amta nen Alex so panisiaan to. Sipor lan manisia ya walay Dios ya Amalsa ed amin. Pero diad subject ton biology, ipipilit na maestro to ya tua kuno so ebolusyon tan akabase kuno itan ed napantiwalaan iran research na saray scientist. Agmet labay nen Alex ya ompaway ya singa ignorante. Kuan tod sarili to, ‘Anto ni nagawaan ko ey, ta saray scientist lay angibaga ya tua so ebolusyon? Alangan ya kuestionen ko ra anta scientist ira?’

Agawa la yad sika? Seguro manlapu lad inkaugaw mo, manisia ka lad samay ibabaga na Biblia ya: “Diad gapo et pinalsa na Dios so tawen tan say dalin.” (Genesis 1:1) Pero ompan wala ray totoon mangokombinse ed sika ya is-istorya labat kuno itan ya ibabaga na Biblia tan say tua kuno et say ebolusyon. Kasin manisia kan tampol ed ibabaga ra? Akin et dapat labat ya kuestionen so ebolusyon?

Duaran rason no akin ya dapat labat ya kuestionen so ebolusyon

Anggan saray scientist et aliwan pareparehoy opinyon da ed ebolusyon. Anggano deka-dekada lan manre-research iray scientist, nanduruma nin siansiay eksplinasyon da ed ebolusyon tan agmanpapaknaay ibabaga ra.

Isipen pa: No anggan saray scientist et ag-ira makapanpapakna ed ebolusyon anta sikara dapat so eksperto ed satan, di duga labat sirin ya kuestionen mo itan ya teorya.—Salmo 10:4.
Importante no antoy papanisiaan mo. “No basta labat linmesa so bilay, di amin ya bengatla ed uniberso—pati say bilay tayo—et anggapoy kakanaan to,” so imbaga na kabataan ya si Zachary. Walay punto to. Ta no bilang tua so ebolusyon, di singa anggapoy kabaliksan na bilay tayo. (1 Corinto 15:32) Pero no tua ya walay Amalsa, naebatan iray tepet tayo. Singa bilang, no akin ya manbibilay tayo tan no antoy nagawa ed arapen.—Jeremias 29:11.

Isipen pa: Akin et importantin naamtaan mo no kasin tua so ebolusyon o andi? Tan antoy epekto ed sika no antam so tua?—Hebreo 11:1.

Saray tepet ya nepeg mon pannonotan

IBABAGA NA ARUM: ‘Amin ya walad uniberso et linmesa lapud big bang.’

Siopa o anto so nanlapuan na big bang?
Dinan so mas dugan isipen—amay amin ya bengatla et basta labat linmesa odino amay amin ya bengatla et walay nanggawa?

IBABAGA NA ARUM: ‘Saray totoo et nanlapud ayayep.’

No nanlapu tayod ayayep—singa bilang, diad bakes—akin balet et arawrawi talino tayo komparad saray bakes? a
Akin et anggan saray “sankasimplian” ya klase na bilay et komplikadon maong? b

IBABAGA NA ARUM: ‘Dakel so ebidensya ya tua so ebolusyon.’

Kasin samay toon mangibabaga ed satan et in-research ton mismo iray ebidensya?
Kasin dakel so manisia ed ebolusyon lapu labat ta imbaga na arum ed sikara ya atan so papanisiaan na saray matatalinon totoo?

NO ANTOY IBABAGA NA ARUM YA KABATAAN

Gwen

“Panon to no walay angibagad sika ya walay sinmabog ya panag-imprintaan tan tinmatalsik iray tinta diad padir tan kisame tan lapud satan et wala kunoy abuon diksionaryo? Manisia ka kasi? Siempre andi ta imposiblin nagawa ’tan! Kanian mas imposible ya basta labat linmesa so marakdakep ya uniberso lapu labat ed big bang!”

Jessica

“Wala ray ugali na totoo ya anggano anggapo iratan et nabilay tayo. Singa bilang, no walay mansasakit, aasikasoen tayo. No walay mankaukolan, tutulongan tayo. No tua may bangat na ebolusyon ya ‘matira ang matibay,’ akin balet et natural ed too so ontulong ed arum?”

Julia

“No manaakar kad kagubatan tan walay anengneng mon marakdakep ya abung ya gawad kiew, kasin isipen mo: ‘Ayos a! Seguro abuo yan abung ta dugarugay impakatumba na saray kiew.’ Siempre agmo ’tan isipen ta imposiblin nagawa ’tan! Kanian akin et isipen tayo ya basta labat linmesa so amin ya bengatla ed uniberso?”

a Ibabaga na arum ya mas matalino kuno iray totoo ta mas baleg so utek tayo nen saray bakes. Pian naamtaan moy rason no akin ya aliwa itan ya ibabaga ra, nengnengen so brosyur ya The Origin of Life—Five Questions Worth Asking, pahina 28.

b Nengnengen so brosyur ya The Origin of Life—Five Questions Worth Asking, pahina 8-12.