Ua haamata te mau Ite no Iehova i te patu i ta ratou pu rahi apî i pihai iho i te Sterling Forest Lake (parauhia roto Ninamu), i te mataeinaa o New York. Te aha nei ratou no te paruru i te mau animara e te heipuni?

Ua hamani te mau Ite no Iehova i te hoê aua paruru e ati aˈe te vahi paturaa ia ore te tahi huru ophi (crotale des bois) e e piti huru honu (tortue-boîte e tortue des bois) ia ô mai a pepe atu ai ratou. Te hiˈopoa-tamau-hia ra tera aua no te papu e eita iho â tera mau animara e ô mai i roto i te vahi raveraa ohipa a ore atu ai e nehenehe e hoˈi faahou i rapae. Ua oti anaˈe te ohipa paturaa, e tatarahia tera aua parururaa. E mai te peu e e itehia i muri aˈe i te tahi ophi i faahitihia i nia ˈtu i pihai iho roa i te paturaa? Ma te haapao maitai, e afaihia tera ophi i te tahi atu vahi na te hoê taata tei matau i tera ohipa.

Ua tapûpûhia te mau tumu raau i te tau toetoe no te ore e haafifi i te tahi manu (rouge-gorge bleu) i to ˈna tau ofaaraa. Ia oti te paturaa i tera mau vahi, e tamaumau te mau Ite no Iehova i te mau afata ofaaraa ia hoˈi faahou mai te mau manu.

Mai Atopa mai â e tae roa ˈtu i Mati, te faaafaro e te tamâ nei ratou i te tahi mau vahi ia purara te huero o te hoê raau tupu varavara (hysope calotte) e ia oteo te reira. Te na reirahia nei noa ˈtu e aita i ite-faahou-hia teie mau raau tupu i tera vahi paturaa i Warwich mai 2007 mai â.

I te hiti o te vahi paturaa, te vai ra te Sterling Forest Lake. E roto teie i reira e itehia ˈi te mau manu e ora ra i nia i te pape, oia atoa te iˈa (truite, bar, brochet e te perche). No te ore e haaviivii i te roto, ua maiti te feia hamani hohoˈa i te ravea paturaa rau o te ore e faaino i te heipuni. Ei hiˈoraa, te faanahoraa e ravehia no te tanu i te raau tupu i nia iho i te mau paturaa o te titia i te mau mea viivii no roto mai i te ûa a iti mai ai te pape o te tahe i roto i te natura. Hau atu â, te haapaohia ra e te paruruhia ra te mau raau tupu e ati aˈe te roto.

Te parau ra te hoê Ite no Iehova te apiti nei i teie mau tuhaa o te ohipa: “Noa ˈtu e e titau te reira i te faaineineraa hau e te taime hau, ua parau matou e e paruru matou i te heipuni i teie vahi i Warwick.”