I roto i te Bibilia, te vai ra te mau haapapuraa e faaite ra e aita Iesu i faaipoipohia, noa ˈtu aita te reira i papai-roa-hia. a E hiˈopoa anaˈe i to muri nei mau haapapuraa.

1.   Pinepine te Bibilia i te faahiti i to Iesu utuafare, oia atoa i te mau vahine tei apiti ia ˈna i te roaraa o ta ˈna taviniraa e tei tia i pihai iho ia ˈna i to ˈna haapoheraahia. Aita roa ˈtu râ e faahitiraa no nia i te hoê vahine ta ˈna i faaipoipo atu. (Mataio 12:46, 47; Mareko 3:31, 32; 15:40; Luka 8:2, 3, 19, 20; Ioane 19:25) No te aha aita te Bibilia i faahiti aˈe i te reira? Te tumu papu roa ˈˈe, teie ïa: Aita Iesu i faaipoipo aˈe.

2.   No nia i te feia tei faaoti i te ore roa ˈtu e faaipoipo no te tavini atu â i te Atua, teie ta Iesu i parau i ta ˈna mau pǐpǐ: “Te taata e tia ia ˈna ia farii i te reira [te oraraa taa noa], a farii ïa.” (Mataio 19:10-12) Ua horoa o ˈna i te hiˈoraa maitai i te feia tei maiti i te oraraa taa noa no te tavini atu â i te Atua.—Ioane 13:15; Korinetia 1, 7:32-38.

3.   Hou o ˈna a pohe ai, ua faanaho Iesu i te ohipa ia aupuruhia to ˈna metua vahine. (Ioane 19:25-27) Mai te peu ua faaipoipohia Iesu aore ra ua tamariihia, e faanaho atoa ïa o ˈna i te ohipa ia haapaohia taua mau fetii piri ra, e ere anei?

4.   I roto i te Bibilia, ua riro Iesu ei hiˈoraa maitai no te mau tane. Aita râ e faahitiraa no nia i te huru o Iesu i nia i te hoê vahine ta ˈna i faaipoipo atu. Te na ô ra hoi te Bibilia: “Outou te mau tane faaipoipo, a here noa i ta outou iho vahine, mai te Mesia atoa i here i te amuiraa e i horoa i to ˈna ora no te amuiraa.” (Ephesia 5:25) Mai te peu ua faaipoipohia Iesu i to ˈna oraraa i nia i te fenua, e faahiti ïa tera irava i to ˈna hiˈoraa tia roa ei tane faaipoipo, e ere anei?

 E, e ono taeae e tuahine to Iesu. Te vai ra to ˈna mau teina o Iakobo, Iosepha, Simona e Iuda e e piti atu â paha tuahine. (Mataio 13:54-56; Mareko 6:3) E tamarii tera na Maria, te metua vahine o Iesu, e na Iosepha, te tane a Maria. (Mataio 1:25) Te parau ra te Bibilia o Iesu te “tamaiti matahiapo” a Maria, te auraa ïa e e tamarii â to Maria.—Luka 2:7.

 No te haapapu e ua vai paretenia o Maria i to ˈna oraraa taatoa aore ra aita o ˈna i taoto aˈe i te hoê tane, te parau ra vetahi e e rave rau auraa to te taˈo “taeae.” Ei hiˈoraa, te parau ra vetahi no nia i te mau taeae o Iesu, o te mau tamaiti a Iosepha ïa noaahia i te hoê faaipoiporaa matamua. Tera râ, te faaite ra te Bibilia e na Iesu i fanaˈo i te tiaraa mana arii fafauhia ia Davida. (Samuela 2, 7:12, 13; Luka 1:32) Mai te peu e tamaiti paari aˈe to Iosepha ia faaauhia ia Iesu, ia au i te ture, o ˈna ïa te fanaˈo i tera tiaraa.

 Ua faahitihia anei te taˈo “taeae” no ta Iesu mau pǐpǐ aore ra taeae pae varua? Aita tera manaˈo e tu ra i to te Bibilia inaha te na ô ra te hoê irava: “Aita hoi to ˈna mau teina e faatupu ra i te faaroo ia ˈna.” (Ioane 7:5) Ua faataa ê maitai te Bibilia i te mau teina o Iesu i ta ˈna mau pǐpǐ.—Ioane 2:12.

 No te tahi atu, te mau taeae o Iesu, e mau fetii ïa aore ra te mau tamaiti o te hoê taeae aore ra tuahine o to Iesu na metua. Tera râ, i roto i te mau Papai Heleni, mea ê te taˈo faaohipahia no “taeae” e no “fetii.” (Luka 21:16; Kolosa 4:10) Ei hiˈoraa, ia au i te hoê buka aivanaa no nia i te Bibilia, ua faaohipahia te taˈo “taeae” no te mau tamaiti a Maria e Iosepha, te mau taeae iho o Iesu i te pae o to ˈna metua vahine.—The Expositor’s Bible Commentary. b