Oho, ɔsom nyina nnyɛ kor. Bible no ma yehu ɔsom ahorow a ɔnnsɔ Nyankopɔn n’enyi. Yebotum akyɛ dɛm ɔsom ahorow yi mu ebien.

Dza odzi kan: Hɔn a wɔsom abosom

 Bible no ka ator enyame a wɔsom hɔn no ho asɛm dɛ “egyangyandze” nye “ndzɛmba a mfaso bi nnyi mu.” (Jeremiah 10:​3-5; 16:19, 20) Jehovah a Nyankopɔn dze ahyɛdze maa tsetse Israelman no dɛ: “Mma nnya enyame afofor nnka mo ho.” (Exodus 20:​3, 23; 23:24) Aber a Israelfo no soom enyame afofor no, ‘Jehovah n’ebufuw dzɛɛwee.’​—Nkanee 25:3; Leviticus 20:2; Atsɛmbuafo 2:​13, 14.

 Dɛmara na ndɛ so Nyankopɔn enyi nngye ho dɛ obi bɔsom “dza wɔfrɛ hɔn enyame pii” no. (1 Corinthfo 8:​5, 6; Galatiafo 4:8) Ɔahyɛ hɔn a wɔpɛ dɛ wɔsom no no dɛ, mma wɔnye hɔn a wɔdze hɔnho hyɛ ator som mu no mmbɔ. Ɔkaa dɛ: “Hom mfi hɔn mu mbra, na hom ntsew homho.” (2 Corinthfo 6:​14-​17) Sɛ ɔsom nyina yɛ kor na sɛ ne nyina kyerɛ nkorɔfo kwan kɔ Nyankopɔn nkyɛn a, ɔyɛ dɛn ntsi na Nyankopɔn dze ahyɛdze yi mae?

Dza otsia ebien: Hɔn a wɔsom nokwar Nyankopɔn no wɔ ɔkwan a ɔnnsɔ n’enyi do

 Ɔtɔfabi a, nna Israelfo no dze ator som mufo hɔn gyedzi nye hɔn ndzeyɛɛ forafora ɔsom a nna wɔdze ma Nyankopɔn no mu, naaso Jehovah anngye ɔsom a ɔtse dɛm no annto mu. (Exodus 32:8; Deuteronomy 12:​2-4) Jesus kasaa tsiaa nyamesom akandzifo a nna wɔwɔ ne ber do no osian ɔkwan a nna wɔfa do som Nyankopɔn no ntsi; wɔ nyimpa enyi do no nna ɔtse dɛ dza wɔrosom Nyankopɔn araa ma, naaso nna wɔyɛ ndabrabafo. Ɔkaa hɔnho asɛm dɛ ‘woegyaa mbra no mu dza ɔyɛ dur no, kyerɛ atsɛmbu, nye ehumbɔbɔr nye gyedzi.’​—Matthew 23:23.

 Ndɛ so, ɔsom a ne nkyerɛkyerɛ gyina nokwar no do na ɔkyerɛ nkorɔfo kwan kɔ Nyankopɔn nkyɛn. Yehu dɛm nokwar no wɔ Bible no mu. (John 4:​24; 17:17; 2 Timothy 3:​16, 17) Ɔsom ahorow a hɔn nkyerɛkyerɛ nye Bible no nnhyia no ma nkorɔfo twe hɔnho fi Nyankopɔn ho. Nkyerɛkyerɛ ahorow pii wɔ hɔ a nkorɔfo susu dɛ Bible no foa do. Bi nye Baasakor, ɔkra a onnwu da, nye nkorɔfo a wɔbɛyɛ hɔn ayaayaadze daa no. Naaso dɛm nkyerɛkyerɛ yi yɛ hɔn a wɔsom ator enyame no hɔn gyedzi. Ɔsom ahorow a wɔhyɛ dɛm nkyerɛkyerɛ yi ho nkuran no ‘yɛ gyan’ anaa mfaso biara nnyi hɔn do, osiandɛ wɔdze ɔsom mu atsetsesɛm ahyɛ dza Nyankopɔn hwehwɛ dɛ yɛyɛ no ananmu.​—Mark 7:​7, 8.

 Nyankopɔn kyir ɔsom mu ndabraba. (Titus 1:​16) Sɛ ɔsom bi botum aboa nkorɔfo ma wɔaabɛn Nyankopɔn a, ɔsɛ dɛ dɛm som no boa nkorɔfo ma hɔn abrabɔ yɛ papa na ɔnnyɛ dɛ wɔbɛhyɛ nkorɔfo ma wɔdze hɔnho ahyɛ amandze ahorow bi mu bi a. Dɛ nhwɛdo no, Bible no ka dɛ: “Sɛ obi dwen noho dɛ ɔyɛ nyamesomnyi, na ɔannto ne tɛkyerɛma ndabraka, na ɔdaadaa nankasa n’akoma a, dɛm nyimpa no ne nyamesom yɛ kwa. Nyamesom a ho tsew na ho nnyi fi wɔ hɛn Egya Nyankopɔn, enyim nye dɛ, ebɔhwɛ ngyanka nye ekunafo wɔ hɔn ahohia mu, na eyi woho efi wiadze nkekaa mu.” (James 1:​26, 27)