Mitte, pien Lubanga mito ni dano gucokke kacel ka wore. Baibul waco ni: “Myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel.”​—Jo Ibru 10:24, 25.

 Yecu onyuto ni lulub kore gibibedo i gurup acel i kare ma owaco botgi ni: “Pi man dano ducu bingeyo ni wun lupwonnyena, ka mer tye i kinwu.” (Jon 13:35) Yo acel ma pire tek ma lulub kor Kricito gitwero nyuto kwede mar i kingi aye ka gicokke kacel ki luye luwotgi. Gibibedo i te kacokke mapol ma gigure kare ki kare ka woro Lubanga. (1 Jo Korint 16:19) Dok gin ducu gibibedo macalo utmege ma gunotte kacel i twok lobo ducu.​—1 Petero 2:17.

Tye gin mukene ma mitte bene mapat ki bedo mere i dini mo

 Kadi bed Baibul waco ni myero wacokke kacel ka woro Lubanga, ento pe waco ni ngat moni twero yomo cwiny Lubanga tekke tye mere lamemba me dini mo. Wek cwiny Lubanga obed yom i komwa, myero dini ma watye iye ogud yo me kwowa ducu. Me labolle, Baibul waco ni: “Dini me ada maleng, ma cilo pe iye i nyim Lubanga Wonwa en ene: konyo litino kic ki mon ma coggi oto i kom can ma gitye kwede, ki gwokke ken i kom bal me lobo.”​—Yakobo 1:27.