Eyo, pilembe Mungu ubemito dhanu gicokiri karacelo pi niwore. Biblia uwacu kumae: “Dong’ iwa pid piwa ng’atuman pi wadi man pi wadi kara wacwalara i mer man i tic ma beco, man kud wawek nicokara karacelo.”​—Juebrania 10:24, 25.

 Yesu unyutho nia julub pare gibibedo i ungu acel, kinde m’eyero igi kumae: “Ni kum lembe maeni dhanu ceke bing’eyo nia wu julubna, tek wumeruru i kindwu.” (Yohana 13:35) Yo ma kwong’a ma julub pa Kristu ginyutho ko mer maeno utie nidikiri karacelo ku juyic wagi. Gicoko dhoggi i cokiri ma tung’ tung’ man gibed girombo karacelo wang’ ma pol pi niworo Mungu. (1 Jukorintho 16:19) I wang’ ng’om zoo, gitie umego ku nyimego.​—1 Pethro 2:17.

Nibedo i dini moko abeda kende uromo ngo

 Kadok nwang’u Biblia unyutho nia kwayu jucokiri karacelo pi niworo Mungu de, re eyero ngo nia ng’atini copo nyayu anyong’a i Mungu kan ebedo abeda kende i dini moko. Kara Mungu ujol ng’atini, ecikere nitio ku lembe m’ebeponjo i dini pare i kwo pare ma kubang’ ceng’. Ku lapor, Biblia uyero kumae: “Kum i wang’ Mungu ma Wegwa, dini m’umbe cilo ni e: Nigwoko nyithikic ku montho i masendi migi man nigwokiri i kum cilo m’i ng’om.”​—Yakobo 1:27, korolembe mi there.