Imbo, Manseren Allah imarisen fa kawasa Ḇyesi siryur fa sisyom I. Refo ya doḇe, ”Mkorama kokarayaye insa kodifyae ko, insa kofrur roi ḇeḇye ma kofasna saswarya. Koḇinkwanbur awer fananjur kayam ro ḇaḇeari koḇena.”​—Ibrani 10:24, 25.

 Manseren Yesus ikofen ḇepon kwar bo doḇe nari ḇeso i sya sifrur raryur sfasos pyum kwar. Doḇe, ”Mko swar yae mko ido snonkakusya kam nari sifawi mboi manfamyan ayesi mko, rofyor mko swar yae mko kada.” (Yohanes 13:35) Nyan ḇepon kaku sfasnai saswar ine iso sfanjur kayamyam kuker naek srar ḇena kakyar oser sesya. Sfasos pyum si fa siryur ro sidang-sidang jemaat insama seari kuker nyan ḇepyum. (1 Korintus 16:19) Sidang-sidang jemaat ansine seoser ro supswan ine ḇesiper.​—1 Petrus 2:17.

Koryur ro agama oso kwar ido isrow kwar ke?

 Refo ya doḇe koryur ro agama oso ima roi ḇefandun nairi. Fama, Refo ikofenḇair ḇa snar roi ine isrow kwar fa Manseren Allah imarisen. Snonggaku oso imbe ifrur fa Manseren Allah imarisen ido, fandun fa iso pyum roi fyarkor kwar ro agama ḇyeja. Imnis ra, Refo ya doḇe, ”Ḇaḇeari [ḇaido, agama] ḇekaku ma ḇefarorewḇa ro Allah, Kma koḇedi ḇarpon ḇyedi, isoine ryakaki awak param ma kabomsya ro ananjar sena, ma ḇyesasor mankundi insa supswan ine ifrur mamas aweri.”​—Yakobus 1:27.