Maera, Dachi Akõreba kʉ̃ria ɓuuɗeeba chi ẽbẽrarã ãbua chibʉrʉɗayu ichi kʉ̃riaɗapeɗa ũriɗayua. Chi Bibliaba jara ɓua: “Kauwa ochia duanaɗayua chi aɓaaɓaa jomaurã aiɗaɗayua chi kʉ̃ria nuree unubiayua mauɗe chi biʼia ɓee aseɗai baita, ãbua duanaɗayua ida ɓuiɗaabayua” (Hebreos 10:24, 25, nota).

 Jesusba jaraɗa baɗa ichi kaaɗe ãda nureerã maarã ẽbẽrarã biʼia ãrĩã organiza duanuuɗe panaɗayua, ichia naka asia: “Makaburu jomaurãba kuitaaɗayua machi mʉ kaaɗe ãda nureabarii: machi chiya kʉ̃ria panuubʉrã” (Juan 13:35). Chi Cristo kaaɗe tʉa nureerã unubiɗayua ãchi chiya kʉ̃ria nureerã mau waabenarã cristianorã ome biɗa nureaɗayua. Maka aseyua, congregacionɗe organiza nureaɗayua maabea kapichia chibʉrʉɗayua Dachi Akõre kʉ̃riaɗapeɗa ũriɗayua (1 Corintios 16:19). Ãbua duanaɗayua dachi ãbarã joma iujãaɗebenarã ome (1 Pedro 2:17).

Dachi religionɗe nii ara mauba ara ɓuu awẽebayua

 Bibliaba jara ɓuu ẽbẽrarã chibʉrʉɗayu Dachi Akõre kʉ̃riaɗapeɗa ũriɗayua. Maka ɓumina, jarawẽe ẽbẽra niiba bari Dachi Akõre kĩrajʉʉbi nibaabayu chi religionɗe niiɗeeba. Nesita ɓua chi nau religionba biʼia ɓuudu asebiyu. Mauɗe chi Bibliaba jara ɓua: “Chi religión biʼia ɓoapeɗa jayoaswẽa Dachi Akõre daaɗe naubʉ: aiɗabaraaɗai chi jẽrãmarãrã mauɗe pẽedrãarã ãchi supri duanuuɗe, mauɗe jayoaswãe nibayu nau iujãaɗe” (Santiago 1:27, nota).