Ɛɛn, ɖó Mawu ba ɖɔ gbɛtɔ́ lɛ ni nɔ kpɔ́ bo sɛn emi. Biblu ɖɔ: “Mi nú mǐ na kpé nukún dó mǐɖée wu, bo na flɔ́ wanyiyi sín zo dó lanmɛ nú mǐɖée, . . . bo na nɔ flɔ́ ɖagbewiwa sín zo dó lanmɛ nú mǐɖée, . . . Mǐ ma jó agun e mɛ mǐ nɔ yì é dó . . . ó.”—Eblée lɛ 10:24, 25.

 Jezu ɖexlɛ́ ɖɔ ahwanvu emitɔn lɛ na nyí gbɛ̌ta e è bló tuto na é ɖé, hwenu e é ɖɔ xó elɔ nú ye é: “Wanyiyi e mi na ɖó nú miɖée ɔ, wɛ na ɖexlɛ́ mɛ lɛ bǐ ɖɔ mi nyí ahwanvu ce nǔgbo.” (Jaan 13:35) Ali taji e nu ahwanvu Klisu tɔn lɛ na ɖè wanyiyi enɛ xlɛ́ ɖè é wɛ nyí ɖɔ ye na nɔ kplé ɖó kpɔ́ xá nǔɖitɔ́ hatɔ́ yetɔn lɛ. È bló tuto nú ye dó agun lɛ mɛ bɔ ye nɔ kplé hwɛhwɛ bo nɔ sɛn Mawu. (1 Kɔlɛntinu lɛ 16:19) Ðò bǔ ɔ, ye nyí kplékplé nɔví lɛ tɔn e gbɔn gbɛ̀ ɔ bǐ mɛ é ɖé.—1 Piyɛ́ɛ 2:17.

Sinsɛn ɖé mɛ ninɔ kpowun ko kpé ǎ, é byɔ nǔ hú mɔ̌

 Biblu xlɛ́ ɖɔ gbɛtɔ́ lɛ ɖó na kplé bo sɛn Mawu có, é kplɔ́n mɛ ɖɔ nú mɛɖé ɖò sinsɛn ɖé mɛ kpowun ɔ, é kún ko kpé bonu nǔ tɔn na nyɔ́ Mawu nukúnmɛ ó. Bonu mɛɖé sín nǔ na nyɔ́ Mawu nukúnmɛ ɔ, mɛ ɔ ɖó na nɔ zán gbɛ̀ gbè bǐ gbè sɔgbe xá nǔ e é nɔ kplɔ́n ɖò sinsɛn tɔn mɛ é. Ði kpɔ́ndéwú ɔ, Biblu ɖɔ: “Sinsɛn e nyí sinsɛn mímɛ́, sinsɛn nǔgbo nǔgbo ɖò Mawu Tɔ́ ɔ nukɔn ɔ ɖíe: è ni kpé nukún dó tɔ́cyɔvǐ nɔcyɔvǐ lɛ kpo asúkúsi lɛ kpo wu ɖò wuvɛ̌ yetɔn lɛ mɛ; è ni cɔ́ mɛɖée dó nǔ e wà wɛ mɛ e nyí gbɛ̀ ɔ tɔn lɛ ɖè lɛ wu, bo ma hɛn mɛɖée blí ó.”—Jaki 1:27.