Aníts, kom a Dios tu konchal ku támkun abal ki kʼakʼnaʼ. An Biblia in ulal: «Xowéʼits ti lej exbadh ki kulbédhanchij in ichích an epchalchik, ku tʼajaxin ti kwéntaj abal ku tolmíxin, yab ki jilaʼ ku támkun» (Hebreos 10:24, 25).

 A Jesús in uluw axéʼ xi kaw: «Max chubax kit kʼanidháxin, tam patal an inikchik neʼets kin tsoʼóbnaʼ abal tatáʼchik pel tu lej exobalíl». Kʼal axéʼ xi kaw in tejwamédhaʼ abal in aykolil kwaʼal ka támkun abal kin kʼakʼnaʼ a Dios (Juan 13:35). Axéʼ xi kʼanidhomtaláb neʼets ki ejtow ki tejwamédhaʼ expidh max ku támkun kʼal jitaʼchik pel i aykol kʼal a Cristo. Jaxtám in yéjenchal ka waʼtsin juʼtáj ti ku támkun ani ku kʼalej tanáʼ (1 Corintios 16:19). Antsanáʼ neʼets ki kʼakʼnaʼ junax a Dios jantʼiniʼ junkats i yaneláb axi tin puwél an Tsabál (1 Pedro 2:17).

Yab expidh in yéjenchal ku támkun

 An Biblia in ulal abal patal i yéjenchal ku támkun abal ki kʼakʼnaʼ a Dios. Pero an Biblia yab in tejwamedhál max jun i atikláb in éjtowal kin kulbédhaʼ a Dios, expidh max ka támkun. Lej exbadh kin eyendhaʼ tin ejatal jawaʼ kʼwajat in exobnál. Jun i tʼiplab, an Biblia in ulal: «Max chubax i kʼakʼnál a Dios, neʼets ki tólmiy axi ódhinik ani axi pel i tsemchidh uxumchik, kʼal i yejenchixtaláb jawaʼ in kwaʼal. Neʼets ki alwaʼ béletnaʼ i ichích abal yab ka kidhabméj kʼal jawaʼ waʼats kidháb tejéʼ tsabál. Játs an lej kʼakʼnaxtaláb axi in kulbetnál a Dios» (Santiago 1:27, nota).