Uyo onọ na họ Ee, keme Ọghẹnẹ ọ gwọlọ nọ ahwo a re kokohọ rọkẹ egagọ. Ebaibol na ọ ta nọ: “Joma roro kpahe ohwohwo re ma sai ru ohwohwo dhesẹ uyoyou je ru ohwohwo ru iruo iwoma, ma re gbabọkẹ omakokohọ mai hi.”​—Ahwo Hibru 10:24, 25.

 Ẹme nọ Jesu ọ ta u dhesẹ nọ ilele riẹ a ti kokohọ kẹ egagọ, ọ ta nọ: “Ẹkwoma onana ahwo kpobi a te rọ riẹ nọ whai yọ ilele mẹ, nọ wha te wo uyoyou evaọ udevie rai.” (Jọn 13:35) Edhere obọdẹ jọ nọ ma sai ro dhesẹ uyoyou nana họ, nọ ma te bi kuomagbe ebe Ileleikristi mai evaọ egagọ. Uvi Ileleikristi a te jọ ukoko je wo ọruẹrẹfihotọ nọ a re ro kuomagbe ẹsikpobi rọkẹ egagọ. (1 Ahwo Kọrint 16:19) Ofariẹ, uvi Ileleikristi a te jọ wọhọ uviuwou ovo evaọ akpọ na soso.​—1 Pita 2:17.

Orọnikọ ma te kuomagbe egagọ no yọ ẹme o re no ho

 Dede nọ Ebaibol na o dhesẹ nọ u wuzou re ma kokohọ kẹ egagọ, ma tẹ maki kuomagbe egagọ no yọ ẹme na o re no ho. Re ma sai wo ọjẹrehọ Ọghẹnẹ, u fo nọ egagọ nọ ma rrọ i re nwene uzuazọ mai. Wọhọ oriruo, Ebaibol na ọ ta nọ: “Oghẹrẹ egagọ nọ o rrọ fuafo nọ u gbeku hu evaọ aro Ọghẹnẹ gbe Ọsẹ mai họ: re a rẹrote emọ nọ i wo ọsẹ hayo oni hi avọ eyae-uku nọ e rrọ uye, jegbe re ohwo o ru omariẹ kare epe evaọ akpọ na.”​—Jemis 1:27.