Joʼkan tzʼaqal, li Yos naraj naq li teʼloqʼoninq re teʼxchʼutubʼ ribʼ. Li Santil Hu naxye: «Chiqilaq qibʼ chiqibʼil qibʼ re xkʼeebʼal xkawubʼ qachʼool chi rahok joʼwiʼ chi xbʼaanunkil li chaabʼil kʼanjel. Miqakanabʼ li qachʼutam»​ (Hebreos 10:24, 25, Li Santil Hu, Sociedad Bíblica de Guatemala, SBG).

 Li Jesús kixye: «Rikʼin aʼin chixjunilebʼ teʼnawoq re naq laaʼex intzolom: wi nekera eeribʼ cheribʼil eeribʼ» (Juan 13:35, SBG). Re naq ebʼ li xtzolom li Jesús teʼxkʼutbʼesi li rahok tento naq teʼloqʼoninq saʼ komonil. Re xbʼaanunkil aʼin tento naq rajlal teʼxkʼubʼ ribʼ saʼ chʼuutal re xloqʼoninkil ru li Yos (1 Corintios 16:19). Aʼin tixbʼaanu naq toowanq joʼ junkabʼal saʼ chixjunil li ruuchichʼochʼ (1 Pedro 2:​17).

Ma tzʼaqal rikʼin xyeebʼal naq wank qapaabʼal

 Li Santil Hu naxkʼut naq ebʼ li kristiʼaan tento teʼxchʼutubʼ ribʼ re xloqʼoninkil ru li Yos. Maabʼar naxye naq tzʼaqal rikʼin xyeebʼal naq wank qapaabʼal. Aajel ru naq taayuʼami. Jun eetalil, li Santil Hu naxye: «Li tzʼaqal paabʼank li maakʼaʼ reekʼ ut loqʼ chiru li Yos Yuwaʼbʼej, aʼan aʼin: xtenqʼankilebʼ li maakʼaʼebʼ chik xnaʼ xyuwaʼ ut ebʼ li xmalkaʼan li wankebʼ saʼ rahilal ut maajun naʼaatinak chirixebʼ, joʼ ajwiʼ xkolbʼal qibʼ chiru li xmaaʼusilal li ruuchichʼochʼ chi maakʼaʼaq qamuxul»​ (Santiago 1:​27, SBG).